༄༅། །རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་རྟེན་གཞི་བྱས་པའི་ལྷོ་སྤྱི་ལས་ཁུངས་དང་བོད་ཁྱིམ་སྡོད་ཁང་ཐུན་མོང་གིས་ཕྱི་ལོ་ ༢༠༢༢ ཟླ་ ༨ ཚེས་ ༡༤ ཉིན་རྒྱ་གར་ལ་རང་བཙན་ཐོབ་ནས་མི་ལོ་ ༧༥ ཧྲིལ་པོ་འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་ཡོད་པ་དང་། དུས་དྲན་སྲུང་བརྩིའི་མཛད་སྒོར་བོད་དོན་རྒྱབ་སྐྱོར་བ་སྐུ་ཞབས་ཧར་ཞི་ཝར་ངྷན་ (Shri. Harsh Vardhan Umre) ལགས་དང་སྐུ་ཞབས་ཅེ་ལམ་ (Chelam) ལགས་སོགས་ཕེབས་ཡོད།

དེ་ཡང་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་སྐུ་ཞབས་ནཱག་རཇ་མོ་རི་ཡ་ (Nagaraj Mourya) ལགས་ལ་རྒྱ་གར་གྱི་རྩ་ཁྲིམས་བཟོ་བ་པོ་ཨམ་བྷི་དི་ཀར་ (Dr. B.R. Ambedkar) མཆོག་གིས་རྒྱ་གར་གྱི་རྩ་ཁྲིམས་སླད་དུ་ཞབས་འདེགས་གང་བསྒྲུབས་ཡོད་པའི་སྐོར་ངོ་སྤྲོད་གསུང་གནང་དུ་བཅུག་ཡོད། སྐུ་ཞབས་ཧར་ཞི་ཝར་ངྷན་ (Shri. Harsh Vardhan Umre) ལགས་ཀྱིས་རྒྱ་གར་གྱི་རང་བཙན་འཐབ་རྩོད་འཕེལ་རིམ་དང་མ་འོངས་གདོང་ལེན་གནང་ཕྱོགས་སོགས་ཀྱི་སྐོར་གསུང་བཤད་གནང་ཡོད།ཅེ་ལམ་ (Chelam) ལགས་ཀྱིས་རྒྱ་གར་གྱི་ཆོས་ལུགས་དང་། རིག་གཞུང་། སྐད་ཡིག་ནང་ཁུལ་བརྩི་བཀུར་ཞུ་དགོས་པའི་གལ་གནད་སོགས་ཀྱི་སྐོར་གསུངས། ལ་དྭགས་པའི་སྐུ་ཚབ་རིན་ཆེན་དབང་མོ་ལགས་ཀྱིས་བ་ཀུ་ལ་རིན་པོ་ཆེ་མཆོག་གིས་ལ་དྭགས་ཁུལ་དུ་ནང་པ་སངས་རྒྱས་པའི་བསྟན་པ་སྤྱི་དང་། ཡང་སྒོས་བོད་བརྒྱུད་ནང་བསྟན་ཇི་ལྟར་དར་སྤེལ་གནང་ཡོད་པའི་སྐོར་གསུངས་པ་མ་ཟད། བ་ཀུ་ལ་རིན་པོ་ཆེ་མཆོག་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྩེ་གཅིག་ཏུ་དད་པ་ཞུ་མཁན་ཞིག་ཡིན་པ་སོགས་ཀྱི་སྐོར་གསུངས་ཡོད།

ཕྱི་ཚེས་ ༡༥ ཉིན་གྱི་སྔ་དྲོ་བོད་ཁྱིམ་སྡོད་ཁང་གི་ལས་བྱེད་དང་སློབ་ཕྲུག་ཡོངས་ནས་ལྷོ་སྤྱི་ལས་ཁུངས་ཀྱི་མདུན་དུ་འདུ་འཛོམས་ཐོག་སྐུ་མགྲོན་གཙོ་བོ་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པའི་སྐུ་ཚབ་སྐུ་ཞབས་པུར་ཤོ་ཏམ་ (Dr K.J. Purushotham) ལགས་ཀྱིས་རྒྱ་གར་གྱི་རྒྱལ་དར་མཁའ་དབྱིངས་སུ་བསྒྲེངས་རྗེས་ཚོགས་བཅར་བ་ཡོངས་ནས་རྒྱ་གར་དང་བོད་ཀྱི་རྒྱལ་གླུ་བཏང་ཡོད།

ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་ཚོགས་བཅར་བ་ཡོངས་ལ་སྐུ་མགྲོན་གཙོ་བོ་སྐུ་ཞབས་པུར་ཤོ་ཏམ་(Dr K.J. Purushotham) ལགས་ཀྱི་སྐོར་ངོ་སྤྲོད་གསུང་བཤད་གནང་ཡོད་པ་བཅས།།