༄༅། །བོད་མིའི་སྒྲིག་འཛུགས་ནས་ལམ་སྟོན་གནང་བ་ལྟར་ཕྱི་ལོ་ ༢༠༢༢ ཟླ་ ༠༨ ཚེས་ ༡༥ ཉིན་ལྡི་ལི་བོད་སྒར་བསམ་ཡས་གླིང་ས་གནས་འགོ་འཛིན་ལས་ཁུངས་ཀྱི་གོ་སྒྲིག་འོག་ལྡི་ལི་བསམ་ཡས་གླིང་དུ་རྟེན་གཞི་བྱས་པའི་བོད་ཁྱིམ་ཉིན་སློབ་ཏུ་རྒྱ་གར་ལ་རང་བཙན་ཐོབ་ནས་མི་ལོ་ ༧༥ ཧྲིལ་པོ་འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་ཡོད།

དུས་དྲན་མཛད་སྒོར་སྐུ་མགྲོན་གཙོ་བོ་ལྡི་ལི་མངའ་སྡེའི་གྲོས་ཚོགས་འོག་མའི་འཐུས་མི་སྐུ་ཞབས་པྲ་ལཱཏ་སིངྒ་སཱཧ་ནེ་ (Parlad Singh Sawhney) ལགས་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་ཟུར་པ་ཨཅཱརྱ་ཡེ་ཤེས་ཕུན་ཚོགས་མཆོག དེ་བཞིན་ལྡི་ལི་སྐུ་ཚབ་དོན་གཅོད་ཁང་གི་ཟུང་དྲུང་བཟང་མོ་ལགས་དང་ལས་བྱེད་གཞན་ཁག་གཅིག ལྡི་ལི་བོད་སྒར་བསམ་ཡས་གླིང་ས་གནས་འགོ་འཛིན་ལས་ཁུངས་ཀྱི་ལས་དྲུང་འཇིགས་མེད་ཚེ་བརྟན་ལགས། ལྡི་ལི་ས་གནས་རང་བདེན་ཚོགས་ཆུང་གི་ཚོགས་གཙོ་ཐུབ་བསྟན་ལགས།   བྷུཏ་བྷི་ཧར་ས་གནས་བོད་ཀྱི་བུད་མེད་ཚོགས་པའི་སྐུ་ཚབ། ལྡི་ལི་ས་གནས་གཞོན་ནུ་ཚོགས་པའི་སྐུ་ཚབ། ལྡི་ལི་ས་གནས་བུད་མེད་ཚོགས་པའི་སྐུ་ཚབ། བསམ་ཡས་གླིང་ས་གནས་སྨན་རྩིས་ཁང་གི་སྐུ་ཚབ། ཚོགས་པ་སྐྱིད་སྡུག་ཁག་གི་སྐུ་ཚབ་སོགས་ཕེབས་ཡོད།དེ་ཡང་གོང་ཚེས་ཉིན་གྱི་སྔ་དྲོ་སྐུ་མགྲོན་གཙོ་བོ་སྐུ་ཞབས་པར་ལཱ་དི་སིངྒ་ས་ཧཱ་ནེ་མཆོག་གིས་རྒྱ་གར་གྱི་རྒྱལ་དར་མཁའ་དབྱིངས་སུ་བསྒྲེངས་རྗེས་དམིགས་བསལ་སྐུ་མགྲོན་དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཟུར་པ་ཨཅཱརྱ་ཡེ་ཤེས་ཕུན་ཚོགས་མཆོག་གིས་རྒྱ་གར་ལ་རང་བཙན་ཐོབ་པའི་རྗེས་ཀྱི་ལོ་རྒྱུས་དང་། རྒྱ་གར་གྱི་དབུ་ཁྲིད་དང་། གནད་ཡོད་མི་སྣ་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་དང་འབྲེལ་བ་ཞུས་པའི་སྐོར་གསུངས་པ་མ་ཟད། བོད་པའི་གཞོན་སྐྱེས་རྣམས་ཀྱིས་ཀྱང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར་རྒྱ་གར་བ་རྣམས་ལ་སྔར་ལས་ལྷག་འབྲེལ་བ་འཛུགས་དགོས་པའི་གལ་གནད་སོགས་ཀྱི་སྐོར་གསུངས་ཡོད།

དེ་རྗེས་ས་གནས་མང་ཚོགས་ལ་མངར་ཟས་དང་འཐུང་ཆུའི་རིགས་སོགས་བགོ་འགྲེམས་གནང་ཡོད། ལྡི་ལི་ས་གནས་བུད་མེད་ཚོགས་པའི་ངོས་ནས་གཞས་སྣ་འཁྲབ་སྟོན་གནང་ཡོད། མཐར་བསམ་ཡས་གླིང་ས་གནས་འགོ་འཛིན་ལས་ཁུངས་ཀྱི་དྲུང་ཡིག་འཇིགས་མེད་ཚེ་བརྟན་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས།།