༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་བསྟན་སྐྱོང་ལགས་ཀྱིས་ས་གནས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༢ ཟླ་བ་ ༠༨ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་ཕེབས་སྐྱེལ་གསོལ་སྟོན་འདེགས་འབུལ་ཞུས་པ་དང་འབྲེལ་མགོན་པོ་གང་ཉིད་མཆོག་གིས་དེར་འདུས་སེར་སྐྱ་མི་མང་ལ་བཀའ་སློབ་སྩལ་སོང་། 

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཙམ་ལ་མགོན་པོ་གང་ཉིད་མཆོག་གིས་དགའ་ལྡན་ཁྲི་ཟུར་༧སྐྱབས་རྗེ་རི་རྫོང་རིན་པོ་ཆེ་མཆོག་དང་མཇལ་འཕྲད་གྲུབ་མཚམས་དཔལ་ཐུབ་ཀྱི་ཨ་བྷེ་ཐང་ཆེན་དུ་ཆིབས་སྒྱུར་བསྐྱངས་ཏེ་དེར་འདུས་མང་ཚོགས་ལ་བཀའ་སློབ་སྩལ་དོན། དེ་རིང་ལ་དྭགས་སེར་སྐྱ་མི་མང་མང་པོ་འདིར་འདུས་ནས་ངོས་ལ་དགའ་བསུ་གནང་བ་རེད། ཚང་མར་ཐུགས་རྗེ་ཆེ་ཞུ་རྒྱུ་ཡིན། བོད་གངས་ཅན་ལྗོངས་ཀྱི་ཉེ་འདབས་སུ་ཡོད་པའི་ལ་དྭགས་ནས་མོན་བར་གྱི་ཧི་མ་ལ་ཡའི་མི་རིགས་རྣམས་བོད་ཀྱི་ཆོས་དང་རིག་གཞུང་ལ་དམིགས་བསལ་དོ་སྣང་ཡོད། བོད་ཀྱི་ཆོས་དང་རིག་གཞུང་ལ་དམིགས་བསལ་དོ་སྣང་ཡོད་དུས་ངོས་རང་ཏཱ་ལའི་བླ་མའི་མིང་ཞིག་ཁྱེར་ཏེ་བོད་ཀྱི་ཆོས་སྲིད་གཉིས་ཀྱི་འགན་འཁུར་མཁན་ཞིག་དང་སློབ་སྦྱོང་བྱས་པའི་མི་ཞིག་ཡིན་སྟབས། ཁྱེད་རང་ཚོས་སེམས་གཏིང་ནས་དད་པ་དང་སྤྲོ་བ་ཟུང་དུ་སྦྲེལ་ནས་ངོས་ལ་དགའ་བསུ་བྱེད་ཀྱི་ཡོད། ཐུགས་རྗེ་ཆེ་ཞུ་རྒྱུ་ཡིན།བོད་ཀྱི་ཆོས་དང་རིག་གཞུང་ཟེར་བ་དེ་མི་རིགས་ཤིག་གི་སོ་སོའི་ལུང་པའི་ཆོས་དང་རིག་གཞུང་ཙམ་ཞིག་རེད་མི་འདུག སྔར་གྱི་ཆོས་རྒྱལ་ཚོའི་ཐུགས་རྗེ་བཀའ་དྲིན་ལ་བརྟེན་ནས་དཔལ་ནཱ་ལེནྡྲའི་མཁས་པའི་དབང་པོ་ཚོས་རིགས་པའི་ལམ་ནས་གཏན་ལ་ཕབ་པའི་རྨད་དུ་འབྱུང་བའི་ལེགས་བཤད་ཅིག་ང་ཚོ་བོད་རྒྱ་ཆེ་མི་མང་གིས་ལོ་བརྒྱ་ཕྲག་རིང་བདག་པོ་བརྒྱབ་ཡོད། དེ་ལྟ་བུའི་ཆོས་དང་རིག་གཞུང་དེ་བོད་མི་རིགས་དང་དེའི་ས་ཁུལ་གྱི་མི་མང་ཙམ་མ་ཡིན་པར་སེམས་ཅན་ཐམས་ཅད་ཀྱི་སྡུག་བསྔལ་བསལ་རྒྱུ་དང་བདེ་བ་བསྒྲུབ་རྒྱུའི་ཐབས་ལམ་ཞིག་ཆགས་ཡོད། རྒྱ་ཆེ་ས་ནས་བཤད་ན་ནམ་མཁའི་མཐས་གཏུགས་པའི་སེམས་ཅན་ཐམས་ཅད་ཀྱི་ཆེད་དུ་གཞན་དོན་བསྒྲུབ་རྒྱུའི་བློ་སྦྱངས། དཔེར་ན་བོད་ཀྱི་ཕྲུ་གུ་ཆུང་ངུ་ཡན་ཆད་ནས་སྲོག་གཅད་རྒྱུ་མེད་ཅེས་བཤད་རྒྱུའི་གོམས་གཤིས་དང་རིག་གཞུང་ཞིག་ཡོད། གང་ལྟར་སྔར་གྱི་ཆོས་རྒྱལ་རྣམས་ཀྱི་ཐུགས་རྗེ་བཀའ་དྲིན་ལ་བརྟེན་ནས་བོད་ལ་སངས་རྒྱས་པའི་ཆོས་སྲོག་ཆགས་ཚང་མར་འཚེ་བ་བྱ་རྒྱུ་མེད། ཕན་པ་སྒྲུབ་དགོས། སེམས་པ་བཟང་པོ་བྱེད་དགོས་ཞེས་པའི་བག་ཆགས་ཤིག་ཚང་མར་ཡོད། བོད་གངས་ཅན་གྱི་ལྗོངས་ལ་སོ་སོ་རང་གི་རིག་གཞུང་དང་སྐད་ཡིག་ཡོད། དེའི་ཐོག་ནས་བཅོམ་ལྡན་འདས་ཀྱི་དགོངས་པ་དང་ནཱ་ལེནྡྲའི་མཁས་པའི་དབང་པོ་ཚོས་མཛད་པའི་ལེགས་བཤད་བཀའ་འགྱུར་པོ་ཏི་བརྒྱ་བསྟན་འགྱུར་པོ་ཏི་ཉིས་བརྒྱ་ལྷག་ཙམ་ཡོད་པ་ཚང་མ་བོད་ཡིག་ནང་ཡོད། དེ་དག་དད་པ་བྱ་ཡུལ་ཁོ་ན་མ་ཡིན་པར་སློབ་དེབ་རེད། གཙོ་བོ་སེམས་ལ་ཞི་བདེ་ཇི་ལྟར་བསྐྲུན་ཐབས་སྐོར་གསུང་གི་ཡོད། དེ་དང་ཆབས་ཅིག་སྲོག་ཆགས་གཞན་ལ་འཚེ་བ་སྤང་རྒྱུ། འཚེ་བ་མེད་པ་དེ་གཙོ་བོ་རེད། གཞན་ལ་འཚེ་བ་བྱེད་ན་རང་གི་སེམས་མ་སྐྱིད་པ་འོང་། གཞན་ལ་ཕན་པ་འབའ་ཞིག་བསྒྲུབ་རྒྱུ་མ་གཏོགས་གཞན་ལ་གནོད་པ་བསྐྱེལ་རྒྱུའི་བློ་དེ་ང་ཚོར་ཆུང་དུས་ནས་གོམས་གཤིས་སུ་མེད། ཞེས་སོགས་དང་། བོད་ས་ཁུལ་གྱི་མི་ཉུང་ཤས་ཤིག་གིས་འཚེ་བ་སྤང་རྒྱུ་དེ་སྤྱོད་པ་ཡག་པོ་རེད་ཟེར་རྒྱུ་ཙམ་མ་ཡིན་པར་དེ་ལྟ་བུའི་ང་ཚོའི་འཚེ་བ་མེད་པའི་རིག་གཞུང་དེ་འཛམ་གླིང་སྤྱི་ལ་འབྲེལ་བ་ཡོད་པ་ཆགས་ཡོད། ང་ཚོ་ཚང་མས་སྨོན་ལམ་རྒྱག་པའི་སྐབས་སེམས་ཅན་ཐམས་ཅད་ཟེར་གྱི་ཡོད་པ་ལས་བོད་པ་གཅིག་པུ་ཟེར་གྱི་མེད། ང་ཚོས་ནམ་མཁའི་མཐས་གཏུགས་པའི་སེམས་ཅན་ཐམས་ཅད་ཟེར་གྱི་ཡོད་ལ། བྱེ་བྲག་ཏུ་འཛམ་གླིང་སྟེང་གི་སེམས་ཅན་ཐམས་ཅད་ལ་བདེ་སྐྱིད་ཡོང་བའི་སྨོན་ལམ་རྒྱག་གི་ཡོད་པ་མ་ཟད། ག་ཚོད་ཐུབ་ཐུབ་ཀྱིས་ལག་བསྟར་བྱེད་ཀྱི་ཡོད། དེ་ལྟ་བུའི་གོམས་གཤིས་དེ་འཛམ་གླིང་སྤྱི་ལ་ཕན་ཐོགས་ཐུབ། འཚེ་བ་མེད་པའི་འཛམ་གླིང་ཞིག་ཡོང་བར་བོད་ཀྱི་རིག་གཞུང་འདི་ཧ་ཅང་གལ་ཆེན་པོ་རེད་འདུག བོད་ཀྱི་འཚེ་བ་མེད་པའི་རིག་གཞུང་འདི་ཧི་མ་ལ་ཡའི་མི་རིགས་ལ་མིག་ལྟོས་ཡོད་པ་རེད། ཅེས་དང་། ངོས་རང་བོད་ཀྱི་འགོ་འཁྲིད་མཁན་ཞིག་རེད། འཛམ་གླིང་ས་ཆ་གང་སར་སླེབས་སྐབས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད། ང་ཚོས་ཁ་ནས་སེམས་ཅན་ཐམས་ཅད་ཟེར་གྱི་ཡོད། སེམས་ཅན་ཐམས་ཅད་ཟེར་བཞིན་དུ་ང་ཚོ་ནང་པ། ཁོང་ཚོ་ཕྱི་པ་ཞེས་ཟེར་ན་མ་འགྲིག་པ་རེད། ཆོས་ལུགས་འདྲ་མིན་གང་ཡིན་ནའང་འཛམ་གླིང་སྟེང་གི་མི་གཅིག་པ་རེད། ང་ཚོ་ཚང་མ་འཆམ་པོ་དང་མཐུན་པོ་བྱ་རྒྱུ་ཧ་ཅང་གལ་ཆེན་པོ་རེད། ཟངས་དཀར་ནས་བཟུང་ངོས་ལ་དོ་སྣང་བྱུང་། བོད་ཀྱི་ཆོས་དང་རིག་གཞུང་ཁྱེད་རང་ཚོས་བདག་པོ་ཡག་པོ་བརྒྱབ་འདུག ཐུགས་རྗེ་ཆེ་ཞུ་རྒྱུ་ཡིན། བོད་ཀྱི་འཚེ་བ་མེད་པའི་རིག་གཞུང་དེ་དུས་ད་ལྟའང་འབྲེལ་བ་ཡོད། ཧི་མ་ལ་ཡ་རི་རྒྱུད་ཀྱི་མི་མང་ཙམ་མ་ཡིན་པར་འཛམ་གླིང་སྤྱི་ལའང་དགོས་མཁོ་ཆགས་ཡོད། བོད་ནང་རྒྱ་གུང་ཁྲན་གྱི་བཙན་གནོན་འོག་སོ་སོའི་རིག་གཞུང་དེ་མངོན་གསལ་དོད་པོས་འཛིན་སྐྱོང་བྱེད་ཁག་པོ་གྱུར་ཡོད་པས་ཧི་མ་ལ་ཡ་རི་རྒྱུད་ཀྱི་མི་མང་ཚོས་བོད་ཀྱི་ཆོས་དང་རིག་གཞུང་མིག་ལྟོས་བཟང་པོ་དེ་བདག་པོ་བརྒྱབ་པར་ངོས་ཀྱིས་ཐུགས་རྗེ་ཆེ་ཟེར་གྱི་ཡིན།

དེ་རིང་ཟངས་དཀར་དང་ལ་དྭགས་ལྟ་སྐོར་བྱ་རྒྱུ་དེ་མཇུག་སྒྲིལ་གྱི་ཡོད། འདི་མཐའ་མ་མ་རེད། ལོ་རྗེས་མར་ངོས་རང་ལ་དྭགས་ཁུལ་ལ་ཡོང་གི་རེད་ཅེས་སོགས་ཀྱི་བཀའ་སྩལ་རྗེས་ས་གནས་དང་བོད་རིགས་མི་མང་ནས་གཞས་སྣ་ཁག་གཅིག་གཟིགས་འབུལ་ཞུ་བཞིན་ཉིན་གུང་ལྗགས་སྨིན་དགྱེས་བཞེས་མཛད་སོང་བ་དང་། དེ་རྗེས་རྒྱལ་སྤྱིའི་ལེགས་སྦྱང་དང་བཟང་སྤྱོད་བསྟི་གནས་ཁང་ (International Institute for Culture & Ethics) ཞེས་པ་ཞིག་དབུ་འབྱེད་གནང་སོང་བ་བཅས།།