༄༅། །ཕྱི་ལོ་ ༢༠༢༢ ཟླ་ ༧ ཚེས་ ༣ ཉིན་བ་རཱ་ཛིལ་གྱི་གྲོང་ཁྱེར་སའོ་པོ་ལོ་ (São Paulo) ནང་ཡོད་པའི་བོད་ཁང་གི་གོ་སྒྲིག་འོག་ཡོངས་དགེ་མི་འགྱུར་རིན་པོ་ཆེ་མཆོག་གིས་བ་རཱ་ཛིལ་གྱི་གྲོང་ཁྱེར་སའོ་པོ་ལོར་རྟེན་གཞི་བྱས་པའི་རྒྱ་གར་གྱི་ཊུལ་སི་ (Tulsi) ཞེས་པའི་ཟ་ཁང་གྲགས་ཅན་གྱི་ཚོགས་ཁང་དུ་སེར་སྐྱ་མང་ཚོགས་ལ་ནང་པའི་སྒོམ་གྱི་ཉམས་ལེན་དང་སྟོང་ཉིད་སྐོར་ངོ་སྤྲོད་གནང་ཡོད་པ་དང་། སྐབས་དེར་ལྷོ་ཨ་མི་རི་ཀའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་གཙོས་བ་རཱ་ཛིལ་གྱི་ཆོས་ཉམས་ལེན་པ་དང་། སྨན་རྩིས་ཁང་གི་སྨན་རྩིས་སྐོར་སྐྱོད་ཚོགས་ཆུང་གི་ཚོགས་མི་རྣམ་པས་ཡོངས་དགེ་མི་འགྱུར་རིན་པོ་ཆེ་མཆོག་ལ་ཕེབས་བསུའི་སྣེ་ལེན་ཞུས་ཡོད།

སློབ་དཔོན་ལི་ཡ་ཌི་སི་ཀིན་( Lia Diskin) ལགས་ཀྱིས་ཚོགས་བཅར་བ་ཡོངས་ལ་ཡོངས་དགེ་མི་འགྱུར་རིན་པོ་ཆེ་མཆོག་གི་སྐོར་ངོ་སྤྲོད་དང་། བོད་ཁང་གི་ཚོགས་མི་དང་ནང་པའི་ལྟ་གྲུབ་སྐད་སྒྱུར་བ་ཇན་ནེ་ཕི་ལི་ (Jeanne R Pilli) ལགས་ཀྱིས་སྐད་སྒྱུར་གནང་ཡོད། ཨེ་ལི་ས་ཧ་རུ་མི་( Elisa Harumi Kozasa) ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་རིམ་ལེགས་པར་གྲོལ་ཡོད་པ་བཅས།།