༄༅། །ཕྱི་ལོ་ ༢༠༢༢ ཟླ་ ༠༨ ཚེས་ ༠༥ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་མ་དང་བྱིས་པའི་ལས་འཆར་ཚན་པས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་ས་གནས་འཕྲོད་བསྟེན་སྨན་ཁང་ཁག་དང་། དེ་བཞིན་གཞུང་དང་གཞུང་ཁོངས་མིན་པའི་སྨན་ཁང་ཁག་ཏུ་གསར་དུ་སྐྱེས་པའི་ཕྲུ་གུ་མ་འབྱར་རྣམས་ལ་ཕྲུ་གུ་མ་འབྱར་གཅེས་སྐྱོང་གི་མཁོ་ཆས་ (babycare-kits) ཀྱི་ལས་གཞི་དབུ་འབྱེད་གནང་སོང་།

དེ་ཡང་ལས་གཞི་འདིའི་དགོས་དམིགས་གཙོ་བོ་ནི། ཕྲུ་གུ་མ་འབྱར་འཆི་སྐྱོན་སྔོན་འགོག་དང་། ཕྲུ་གུའི་འཕྲོད་བསྟེན་བདེ་ཐང་། དེ་བཞིན་སྦྲུམ་མ་དང་འོ་མ་སྤྲོད་བཞིན་པའི་མ་རྣམས་ལ་ཟས་བཅུད་ཀྱི་མཐུན་རྐྱེན་སྤྲོད་ཐབས་བཅས་ལ་དམིགས་པ་ཞིག་ཡིན་ཞིང་། འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་འཕྲོད་བསྟེན་ལས་ཁུངས་ནང་ཕྲུ་གུ་མ་འབྱར་གཅེས་སྐྱོང་གི་མཁོ་ཆས་དཔེ་མཚོན་དབུ་འབྱེད་གནང་བ་དང་འབྲེལ་དཔལ་འབྱོར་གྱི་གནས་སྟངས་ལ་མ་ལྟོས་པར་ལས་གཞི་འདི་ནི། གསར་དུ་སྐྱེས་པའི་ཕྲུ་གུ་ཚོའི་མ་རྣམས་ལ་འཚམས་འདྲི་དང་། བོད་མིའི་སྒྲིག་འཛུགས་ཀྱི་འཛིན་སྐྱོང་དང་བོད་པའི་སྤྱི་ཚོགས་ཐུན་མོང་གིས་འགན་འཁུར་ནས་ཕྲུ་གུ་མ་འབྱར་གྱི་སེམས་ཁམས་འཕྲོད་བསྟེན་འཕེལ་རྒྱས་དང་། འཆི་སྐྱོན་འགོག་ཐབས་ཡིན་པའི་སྐོར་གསུངས་ཡོད། ལས་གཞི་གསར་པ་འདིའི་ཆེད་དུ་ཨ་རིའི་རོགས་ཚོགས་(USAID) ཞེས་པས་དཔལ་འབྱོར་གྱི་མཐུན་འགྱུར་གནང་ཡོད་པ་བཅས།།