༄༅། །ཕྱི་ཕྱོགས་ལ་འབྲེལ་བ་ཡོད་པ་དང་ཁྲིམས་འགལ་གྱི་པར་རིས་བརྒྱུད་བསྐུར་བྱས་པའི་ཉེས་མིང་འོག་ཨ་མ་རིག་འཛིན་སྒྲོལ་མ་དང་བུ་མོ་བཀྲ་ཤིས་དབྱངས་སྐྱིད་གཉིས་འཛིན་བཟུང་བྱས་རྗེས་བུ་མོ་བཀྲ་ཤིས་དབྱངས་སྐྱིད་གར་ཡོད་ཆ་མེད་དུ་གྱུར་ཡོད་འདུག
དེ་ཡང་བོད་ཀྱི་དུས་བབ་གསར་ཁང་ནས་གནས་ཚུལ་སྤེལ་བ་ལྟར་ན། བོད་རང་སྐྱོང་ལྗོངས་ཟེར་བའི་ཁོངས་སུ་ཡོད་པའི་ནག་ཆུ་གྲོང་ཁྱེར་སྦྲ་ཆེན་རྫོང་ཡུལ་གསར་གྲོང་ཚོ་ནས་ཡིན་པའི་མ་སྨད་གཉིས་བཙན་འཁྲིད་བྱས་རྗེས་བུ་མོ་གར་ཡོད་ཆ་མེད་དུ་གྱུར་ཡོད་འདུག
གནས་ཚུལ་མཁོ་སྤྲོད་པས། ཕྱི་ཕྱོགས་ལ་འབྲེལ་བ་ཡོད་པ་མ་ཟད། ཁྲིམས་འགལ་གྱི་པར་རིས་བརྒྱུད་བསྐུར་བྱས་པའི་ཉེས་མིང་འོག ཟླ་འདིའི་ཕྱི་ཚེས་ ༡༣ ཉིན་གྱི་དགོང་མོར། གློ་བུར་དུ་ཉེན་རྟོག་པ་བཞི་ཨ་མ་རིག་འཛིན་སྒྲོལ་མ་ལགས་ཀྱི་ཁྱིམ་དུ་ཡོང་སྟེ། ཁོང་མོ་དང་བུ་མོ་བཀྲ་ཤིས་དབྱངས་སྐྱིད་ལགས་གཉིས་བཙན་འཁྲིད་བྱས་ཡོད་ཡོད་པ་དང་། ཕྱི་ཉིན་ཙམ་ལ་ཨ་མ་ལགས་ཕྱིར་ཁྱིམ་དུ་བཏང་ཡོད་པ་དང་། བུ་མོ་ཉིན་གསུམ་ཙམ་རིང་ས་གནས་སུ་བཀག་ཉར་བྱས་ཡོད་པ་གོ་ཐོས་བྱུང་ཡོད་ཀྱང་ཕྱིས་སུ་ས་གནས་གཞན་ཞིག་ཏུ་འཁྲིད་ཕྱིན་ཡོད་སྟབས། ནང་མི་ཚོས་སེམས་འཚབ་ཆེན་པོ་བྱེད་བཞིན་ཡོད་པ་མ་ཟད། ཐེངས་མང་པོར་ས་གནས་ཉེན་རྟོག་ཁང་དུ་སྐད་ཆ་འདྲི་རུ་ཕྱིན་ཡོད་ཀྱང་། བུ་མོ་བཀྲ་ཤིས་དབྱངས་སྐྱིད་ལྷ་ས་ན་ཡོད་སྐོར་ཙམ་ལས་གང་ཡང་བཤད་མེད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པས་བརྗོད་པ་ལྟར་ན། རང་ལོ་ ༢༣ ཡིན་པའི་བུ་མོ་བཀྲ་ཤིས་དབྱངས་སྐྱིད་ནི་བོད་ལྗོངས་སློབ་གྲྭ་ཆེན་མོའི་སློབ་ཕྲུག་ཅིག་ཡིན་ཞིང་། ཉེ་སྔོན་ལྷ་ས་དང་གཞིས་ཀ་རྩེ་སོགས་སུ་ཏོག་དབྱིབས་གཉན་རིམས་འགོས་ཁྱབ་ཕྱིན་པར་བརྟེན། སློབ་གྲྭ་ནས་ཕྱིར་རང་ཁྱིམ་དུ་བསླེབས་ཡོད་འདུག རང་ལོ་ ༧༦ ཡིན་པའི་ཁོང་མོའི་ཨ་མ་རིན་འཛིན་སྒྲོལ་མ་ལགས་ནི་དུས་རྒྱུན་ཆོས་སེམས་ཆེན་པོ་དང་ཡུལ་མི་ཚང་མར་མཐུན་ལམ་ལེགས་པོ་ཡོད་སྟབས། གྲོང་མི་ཚང་མས་ཧ་ཅང་དགའ་བོ་བྱེད་ས་ཞིག་ཡིན་འདུག
ད་ལྟའི་ཆར་ཨ་མ་རིག་འཛིན་སྒྲོལ་མ་མ་སྨད་གཉིས་ནས་པར་རིས་བརྒྱུད་སྤེལ་བྱས་ཚུལ་གྱི་ཉེས་མིང་དེ་ཏོག་དབྱིབས་འགོས་ཁྱབ་དང་འབྲེལ་བ་ཡོད་མེད་ཁ་གསལ་མི་འདུག་ཀྱང་། ཟླ་འདིའི་ཟླ་མགོ་ཙམ་ནས་བཟུང་བོད་ཆོལ་ཁ་གསུམ་གྱི་ས་ཁུལ་མང་དག་ཅིག་ཏུ་ཏོག་དབྱིབས་གཉན་རིམས་འགོས་ཁྱབ་བྱུང་བའི་གནས་ཚུལ་ཐོན་བཞིན་ཡོད་པ་དང་སྦྲགས། མི་མང་གི་འགྲོ་འོང་ལ་བཀག་སྡོམ་ནན་པོ་བྱེད་བཞིན་ཡོད་པ་མ་ཟད། སྤྱི་ཚོགས་དྲ་ལམ་ཁག་ཏུ་ཏོག་དབྱིབས་དང་འབྲེལ་བའི་གནས་ཚུལ་རྫུན་མ་བརྒྱུད་སྤེལ་མི་ཆོག་པའི་བཀའ་རྒྱ་ནན་པོ་སྒྲོག་གི་འདུག རྒྱ་ནག་གཞུང་འབྲེལ་དྲ་ལམ་དུ་ཏོག་དབྱིབས་ནད་པར་འབྲེལ་འདྲིས་བྱུང་ཚུལ་སོགས་ཀྱི་འདྲི་ཞིབ་རྫུན་མ་བྱས་ཏེ་སྒོར་མོ་མང་པོ་གཡོ་ལེན་བྱས་པའི་ཉེས་མིང་འོག་མི་ཁག་ཅིག་འཛིན་བཟུང་བྱས་ཡོད་ལུགས་ཀྱི་གནས་ཚུལ་སྤེལ་འདུག །
