༄༅། །ཕྱི་ལོ་ ༢༠༢༢ ཟླ་ ༨ ཚེས་ ༠༢ ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་བཀའ་འབྲེལ་ལྟར། ༸སྐྱབས་རྗེ་དམ་པ་མཁན་ཟུར་བླ་ཏེ་རིན་པོ་ཆེ་རྗེ་བཙུན་བྱང་ཆུབ་ཚུལ་ཁྲིམས་ཆོས་འཕེལ་དཔལ་བཟང་པོ་དེ་ཉིད་ཀྱི་ཡང་སྲིད་མཆོག་སྤྲུལ་བསྟན་འཛིན་བྱང་ཆུབ་ཆོས་འཕེལ་རིན་པོ་ཆེ་མཆོག་ལ་དཔལ་ལྡན་དགའ་ལྡན་ཕོ་བྲང་ཡིག་ཚང་ནས་ཚོགས་ཆེན་སྤྲུལ་སྐུའི་མཚན་གནས་གསོལ་སྩལ་གནང་བ་ལྟར། དམ་པ་གོང་མའི་གདན་ས་དགའ་ལྡན་རྣམ་པར་རྒྱལ་བའི་གླིང་དུ་ཚོགས་ཆེན་སྤྲུལ་སྐུའི་ཆོས་ཞུགས་རྟེན་འབྲེལ་གྱི་མཛད་སྒོར་ཆོས་རིག་ལས་ཁུངས་ཀྱི་སྐུ་ཚབ་ཏུ་མོན་གྷོ་འདོད་རྒུ་གླིང་ས་གནས་འགོ་འཛིན་ལྷག་པ་སྒྲོལ་མ་ལགས་མཉམ་ཞུགས་གནང་ཡོད།དེ་ཡང་གོང་ཚེས་མཛད་སྒོའི་ཐོག་གདན་ས་གྲྭ་ཚང་གི་སྐྱབས་གནས་མཁན་རིན་པོ་ཆེ་རྣམ་གཉིས་དང་མཁན་ཟུར་རིན་པོ་ཆེ། ས་གནས་འཐུས་ཚོགས་ཀྱི་ཚོགས་གཙོ། ས་གནས་རང་དབང་བདེན་པའི་ལས་འགུལ་གྱི་ཚོགས་གཙོ། གཞུང་དང་གཞུང་ཁོངས་མིན་པའི་ཚོགས་པ་ཁག་གི་འགན་འཛིན། དགོན་པའི་དགེ་བསྐོས་དང་དབུ་མཛད་རྣམ་པ། དགའ་ལྡན་བླ་སྤྱིའི་ཕྱག་མཛོད། དགོན་སྡེ་ཁག་གི་ཕྱག་མཛོད་དང་གཞིས་གྲོང་སྤྱི་མི། གྲྭ་ཚང་དང་བླ་བྲང་གི་སྦྱིིན་བདག  མཆོག་སྤྲུལ་རིན་པོ་ཆེའི་ཡབ་ཡུམ་སྐུ་འཁོར་ལྷན་རྒྱས། ཕྱི་ནང་གི་སྐུ་མགྲོན། གཞན་ཡང་སྐུ་གོང་མའི་ཞལ་སློབ་བླ་སྤྲུལ་དགེ་བཤེས་ཀྱིས་གཙོས་དགེ་འདུན་པ་དང་སྐྱ་བོ་བརྒྱ་ཕྲག་ཁ་ཤས་ཆེད་ཕེབས་གནང་ཡོད་པ་བཅས། །