༄༅། །འདི་གར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གསོ་བ་རིག་པ་དང་དེང་རབས་སྨན་ལུགས་ཟུང་འབྲེལ་གྱི་ལས་གཞིའི་འོག་ཕྱི་ལོ་ ༢༠༢༢ ཟླ་ ༨ ཚེས་ ༡༩ ནས་ ༣༡ བར་བདུན་ཕྲག་གཉིས་རིང་གསོ་བ་རིག་པའི་སྨན་པ་རྣམས་ལ་དེང་རབས་སྨན་ལུགས་ངོ་སྤྲོད་ཟབ་འཁྲིད་ཅིག་རྡ་ས་བོད་ཀྱི་དཔེ་མཛོད་ཚོགས་ཁང་དུ་གོ་སྒྲིག་གནང་ཡོད།
དེ་ཡང་ཟབ་འཁྲིད་ཀྱི་དབུ་འབྱེད་མཛད་སྒོའི་ཐོག་ཟུང་འབྲེལ་ལས་གཞིའི་འབྲེལ་ལས་སྨན་པ་ཚེ་རིང་མཚམས་གཅོད་ལགས་ཀྱིས་ཟུང་འབྲེལ་ལས་གཞི་ངོ་སྤྲོད་དང་འབྲེལ་ཟབ་འཁྲིད་ཀྱི་དམིགས་ཡུལ་དང་ལས་རིམ་ཁག་ངོ་སྤྲོད་གནང་གྲུབ་རྗེས་འཕྲོད་བསྟེན་ལས་ཁུངས་ཀྱི་ཟུང་དྲུང་ཚེ་རིང་གཡུ་སྒྲོན་ལགས་ཀྱིས་ཚོགས་བཅར་སྨན་པ་རྣམས་ལ་འཚམས་འདྲི་དང་སྦྲགས་འཕྲོད་བསྟེན་ལས་ཁུངས་ནས་ཟུང་འབྲེལ་གྱི་ལས་གཞི་འདི་གལ་གནད་ཆེན་པོར་བརྩི་བའི་ཐོག་ཕྱི་ལོ་ ༢༠༡༩ ནས་དངོས་སུ་ཟུང་འབྲེལ་ལས་གཞིའི་འབྲེལ་མཐུད་སྨན་པ་ཆེད་བསྐོས་ཀྱིས་ལག་གཞི་ལག་བསྟར་འགོ་འཛུགས་ཡོད་པའི་ཁོངས་ད་ལན་གྱི་ཟབ་འཁྲིད་འདི་མཚོན་ན་ལུགས་གཉིས་ཀྱི་སྨན་པ་རྣམས་ནས་ལུགས་སོ་སོའི་ལྟ་གྲུབ་ཁྱད་ཆོས་ཙམ་མིན་པར་སྨན་ལུགས་གཞན་གྱི་ཁྱད་ཆོས་ཤེས་པའི་ཐོག་གདེང་ཚོད་ཀྱིས་ནད་པར་སྨན་བཅོས་སྐབས་ཟུང་འབྲེལ་གྱི་ཐོག་ནས་ནད་གཞི་སྔོན་འགོག་དང་བརྟག་བཅོས་བྱ་རྒྱུ་གལ་ཆེ་བའི་གསུང་བཤད་གནང་།
ཐེངས་འདིའི་ཟབ་འཁྲིད་བརྒྱུད་རང་ཉིད་ལ་གང་སློབ་སྦྱོང་ཐོབ་པ་དེ་ཕྱིས་སུ་ས་གནས་སུ་སྨན་པའི་ཞབས་ཞུ་བསྒྲུབ་པའི་སྐབས་དངོས་སུ་ཕྱག་བསྟར་གནང་རྒྱུ་ཤིན་ཏུ་གལ་ཆེ་བས་ས་གནས་སུ་དངོས་སུ་ནད་པར་སྨན་བཅོས་གནང་མཁན་དམག་སར་དམག་མི་ལྟ་བུ་དེ་སྨན་པ་རྣམ་པ་ཡིན་པས་སྨན་པ་རྣམ་པས་སྤྱི་ཚོགས་འཕྲོད་བསྟེན་དང་མི་རིགས་བདེ་ཐང་ཐོག་ནད་རིགས་སྔོན་འགོག་ཐོག་ཤུགས་ཆེ་ཙམ་གནང་གལ་ཆེ་བའི་གསུང་བཤད་གནང་།
ད་ལན་ཟབ་འཁྲིད་འདིའི་ཐོག་བོད་ཀྱི་སྨན་རྩིས་ཁང་དང་། ལྕགས་པོ་རི་དྲན་རྟེན་བོད་སྨན་སློབ་གཉེར་ཁང་། ཝཱ་ཎ་མཐོ་སློབ་དང་གསོ་རིག་འབུམ་བཞིའི་མཐོ་སློབ། དཔལ་སྤུངས་རིག་གནས་མཐོ་སློབ་ཀྱི་སྨན་པ་དང་སྒེར་གཉེར་སྨན་པ་བཅས་ས་གནས་གྲངས་བདུན་ནས་སྨན་པ་གྲངས་ ༡༥ མཉམ་ཞུགས་གནང་ཡོད་པ་བཅས།།
