༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་དང་ཨ་རིའི་རོགས་ཚོགས་ (PRM) ཀྱི་མཐུན་འགྱུར། ས་གནས་འགོ་འཛིན་ལས་ཁུངས་དང་ས་གནས་འཕྲོད་བསྟེན་སྨན་ཁང་གི་རམ་འདེགས་འོག་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་རྣམ་པས་རྒྱ་གར་དུ་ཡོད་པའི་བཙན་བྱོལ་བོད་མིའི་གཞིས་ཆགས་ཆེ་ཁག་གྲངས་ ༢༠ ནང་ས་གནས་ཀྱི་གནད་ཡོད་མི་སྣ་རྣམས་ལ་སེམས་ཁམས་འཕྲོད་བསྟེན་གྱི་རྨང་གཞིའི་ཤེས་བྱ་ངོ་སྤྲོད་གནང་ཡོད།

དེ་ཡང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སེམས་ཁམས་འཕྲོད་བསྟེན་ཚན་པའི་འབྲེལ་ཡོད་ལས་བྱེད་ཚེ་རིང་གཡང་སྒྲོལ་ལགས་དང་བསྟན་འཛིན་ཆོས་ལྡན་ལགས་ཀྱིས་རྒྱ་གར་དབུས་དང་བྱང་ཕྱོགས་ཁུལ་གྱི་བོད་མིའི་གཞིས་ཆགས་མན་པཌ་དང་། སྦན་ད་ར། ལྡི་ལི། སྦིར། བདེ་སྐྱིད་གླིང་། རྡ་ས་བཅས་སུ་ཕྱོགས་སྐྱོད་ཀྱིས་ས་གནས་ཀྱི་གནད་ཡོད་མི་སྣ་རྣམས་ལ་སེམས་ཁམས་འཕྲོད་བསྟེན་གྱི་རྨང་གཞིའི་ཤེས་བྱ་ངོ་སྤྲོད་གནང་ཡོད་པ་དང་། དེ་བཞིན་ལས་འཆར་འབྲེལ་མཐུད་པ་ཤེས་རབ་མཚོ་མོ་ལགས་དང་། མོན་གྷོ་འདོད་རྒུ་གླིང་ས་གནས་འཕྲོད་བསྟེན་སྨན་ཁང་གི་སེམས་ཁམས་འཕྲོད་བསྟེན་ཚན་པའི་སྨན་ཞབས་པ་སངས་རྒྱས་ཆོས་འཛོམས་ལགས་ནས་མོན་གྷོ་དང་། ཧོན་སུར། ཀོ་ལི་གྷལ། སྦེལ་ཀོབ་བཅས་སུ་ས་གནས་ཀྱི་གནད་ཡོད་མི་སྣ་རྣམས་ལ་སེམས་ཁམས་འཕྲོད་བསྟེན་གྱི་རྨང་གཞིའི་ཤེས་བྱ་ངོ་སྤྲོད་གནང་ཡོད། ཕྱོགས་མཚུངས་བྷ་ལུ་ཝ་ལ་དང་དོན་གྲུབ་གླིང་དུ་འབྲེལ་ཡོད་སྨན་ཞབས་པ་ཟླ་བ་ཆོས་སྒྲོན་ལགས་དང་ཚེ་བརྟན་དཔལ་མཚོ་ལགས་ཀྱིས་ས་གནས་ཀྱི་གནད་ཡོད་མི་སྣ་རྣམས་ལ་སེམས་ཁམས་འཕྲོད་བསྟེན་གྱི་རྨང་གཞིའི་ཤེས་བྱ་ངོ་སྤྲོད་གནང་ཡོད།འཕྲོད་བསྟེན་ལས་ཁུངས་ནས་ད་བར་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ ༢༡ གི་ས་གནས་ཀྱི་གནད་ཡོད་མི་སྣ་གྲངས་ ༥༦༣ ལ་སེམས་ཁམས་འཕྲོད་བསྟེན་གྱི་རྨང་གཞིའི་ཤེས་བྱ་ངོ་སྤྲོད་གནང་ཐུབ་པ་བྱུང་ཡོད་ལ། མཉམ་ཞུགས་གནང་མཁན་ཡོངས་ནས་སེམས་ཁམས་འཕྲོད་བསྟེན་གྱི་རྨང་གཞིའི་ཤེས་བྱ་ངོ་སྤྲོད་ཀྱི་ལས་རིམ་ལ་རྗེས་སུ་ཡི་རང་དང་། མ་འོངས་པར་མུ་མཐུད་བོད་མི་འདུས་སྡོད་ས་གནས་ཁག་གི་མང་ཚོགས་ལ་སེམས་ཁམས་འཕྲོད་བསྟེན་སྐོར་གོ་རྟོགས་དང་ཟབ་སྦྱོང་གནང་དགོས་པའི་འབོད་སྐུལ་ཞུས་གནང་ཡོད།

གཞན་ཡང་འབྲེལ་ཡོད་ལས་བྱེད་རྣམ་པས་ས་གནས་ཀྱི་སློབ་གྲྭའི་ལས་བྱེད་དང་ཕ་མ་རྣམས་ལ་སེམས་གཅོང་ནད་གཞི་དང་འབྲེལ་སྐོར་ཟབ་སྦྱོང་གནང་ཡོད་པ་བཅས།།