༄༅། །ཕྱི་ལོ་ ༢༠༢༢ ཟླ་ ༨ ཚེས་ ༢༦ ཉིན་གྱི་སྔ་དྲོ་བཞུགས་སྒར་རྡ་སར་རྟེན་གཞི་བྱས་པའི་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ཀྱིས་སྣེ་ཁྲིད་དེ་འབྲེལ་ཡོད་ལས་བྱེད་རྣམ་པས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་སྲི་ཞུའི་ལས་བྱེད་རྣམས་ལ་རྩོད་རྙོག་འདུམ་སྒྲིག་སྐོར་ཟབ་སྦྱོང་གནང་ཡོད། ཟབ་སྦྱོང་དབུ་འབྱེད་མཛད་སྒོར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་། དྲུང་ཆེ་ལས་འཕར་བསྟན་འཛིན་ལེགས་བཤད་ལགས། དྲུང་ཆེ་ལས་འཕར་རྣམ་རྒྱལ་ཚེ་དབང་ལགས། ཟུང་འབྲེལ་དྲུང་ཆེ་བཀྲ་ཤིས་ཕུན་ཚོགས་ལགས། བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་དང་འབྲེལ་ཡོད་ལས་རྣམ་པ། དེ་བཞིན་ཕྱི་དྲིལ་ལས་ཁུངས་ཀྱི་ལས་བྱེད་རྣམ་པ་བཅས་ཕེབས་ཡོད།
དེ་ཡང་ཐོག་མར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་ལས་བྱེད་རྣམས་ལ་རྩོད་རྙོག་འདུམ་འགྲིག་གི་གལ་གནད་སྐོར་གསུང་བཤད་གནང་གྲུབ་མཚམས་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ཀྱིས་སྣེ་ཁྲིད་དེ་འབྲེལ་ཡོད་ལས་བྱེད་རྣམ་པས་རྩོད་རྙོག་འབྱུང་སྐབས་རྟོག་ཞིབ་དང་འཚེ་མེད་ཞི་བའི་སྒོ་ནས་འབྲེལ་མོལ་གནང་སྟེ་དཀའ་ངལ་སེལ་ཐབས་གནང་དགོས་པ་དང་། ལས་བྱེད་རྣམ་པས་ཕྱག་ལས་གནང་བའི་སྐབས་རྩོད་རྙོག་ཙག་ཙིག་འབྱུང་སྲིད་པ་དང་། དེའི་སྐབས་སུ་ཕན་ཚུན་བསམ་ཤེས་དང་། སྙིང་རྗེའི་ཀུན་ནས་བསླངས་ཏེ་ཉན་འཇོག་དང་བརྩི་བཀུར་གནང་དགོས་པའི་གལ་གནད་སོགས་ཀྱི་སྐོར་ཟབ་ཁྲིད་གནང་ཡོད།
ཐེངས་འདིའི་ཟབ་སྦྱོང་ནང་ཕྱི་དྲིལ་ལས་ཁུངས་ཀྱི་ལས་བྱེད་ཡོངས་དང་། དེ་བཞིན་ཕྱི་དྲིལ་ལས་ཁུངས་ཀྱི་ཁྱབ་ཁོངས་ཀམ་པུ་ཊར་ཚན་པ། འགྲེམས་སྟོན་ཚན་པ། སྣར་ཐང་པར་ཁང་བཅས་ཀྱི་ལས་བྱེད་རྣམས་མཉམ་ཞུགས་གནང་ཡོད། །
