༄༅། །བེལ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཕྱི་ལོ་ ༢༠༢༢ ཟླ་ ༧ ཚེས་ ༢༧ ཉིན་ཐའེ་ཝན་གྱི་སྐུ་ཚབ་སྐུ་ཞབས་མིང་ཡན་ཚེ་ (Ming-Yen Tsai) ལགས་དང་མཇལ་འཕྲད་གནང་ཡོད་པ་དང་། མཇལ་འཕྲད་དེ་ནི་འགན་ཁང་རིག་འཛིན་ཆོས་སྒྲོན་ལགས་ཀྱིས་བེལ་ཇི་ཡམ་སྐུ་ཚབ་དོན་གཅོད་ཀྱི་ཐུགས་འགན་བཞེས་པ་ནས་བཟུང་དངོས་སུ་ཐའེ་ཝན་གྱི་སྐུ་ཚབ་དང་མཇལ་འཕྲད་གནང་བ་ཐེངས་དང་པོ་ཆགས་ཀྱི་ཡོད།

དེ་ཡང་བེལ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཐའེ་ཝན་གྱི་སྐུ་ཚབ་སྐུ་ཞབས་མིང་ཡན་ཚེ་ལགས་ཀྱིས་གཙོས་ཁོང་གི་ཕྱག་རོགས་རྣམས་ལ་ཁ་བཏགས་ཤིག་དང་ཕྱི་དྲིལ་ལས་ཁུངས་ནས་པར་སྐྲུན་གནང་བའི་དཔེ་དེབ་ ༼ལོ་རྒྱུས་ཐོག་བོད་དེ་རྒྱ་ནག་གི་ཆ་ཤས་ནམ་ཡང་མིན། འོན་ཀྱང་དབུ་མའི་ལམ་གྱི་སྲིད་བྱུས་ནི་བོད་རྒྱའི་དཀའ་རྙོག་སེལ་བར་འོས་ཤིང་འཚམས་པའི་ཐབས་ལམ་ཞིག་ཡིན།༽ ཞེས་པ་ཕུལ་གནང་བ་དང་འབྲེལ་སྤྱི་ནོར་༸གོང་༸སྐྱབས་མགོན་ཆེན་པོ་མཆོག་གིས་ལ་དྭགས་ཁུལ་དུ་མཛད་འཕྲིན་སྐྱོང་གནང་མཛད་བཞིན་པའི་སྐོར་དང་། བོད་ནང་གི་ཛ་དྲག་གི་གནས་སྟངས་སྐོར་འགྲེལ་བརྗོད་གནང་ཡོད།

སྐབས་དེར་སྐུ་ཞབས་མིང་ཡན་ཚེ་ལགས་ཀྱིས་འགན་ཁང་རིག་འཛིན་ཆོས་སྒྲོན་ལགས་ལ་འཚམས་གཟིགས་སུ་ཕེབས་པར་ཐུགས་རྗེ་ཆེ་ཞུས་གནང་ཡོད། འགན་ཁང་རིག་འཛིན་ཆོས་སྒྲོན་ལགས་དང་སྐུ་ཞབས་མིང་ཡན་ཚེ་ལགས་ཀྱིས་དམིགས་བསལ་ཀྱི་ལས་དོན་ཁག་གཅིག་གི་ཆེད་དུ་མཉམ་རུབ་ཀྱིས་ཕྱག་ལས་གནང་རྒྱུ་ཡིན་པ་མ་ཟད། ཕྱོགས་གཉིས་ཀྱི་ལས་ཁུངས་དབར་འབྲེལ་བ་གཏིང་ཟབ་གཏོང་རྒྱུའི་མོས་མཐུན་གནང་ཡོད།

བེལ་ཇི་ཡམ་སྐུ་ཚབ་དོན་གཅོད་ཁང་གི་ངོས་ནས་ཐའེ་ཝན་གྱི་སྐུ་ཚབ་ཟུར་པ་ཧར་རེ་ཚིང་ (Harry Tseng) ལགས་དང་ལྷན་འབྲེལ་བ་གཏིང་ཟབ་བཙུགས་ཡོད་པ་དང་། ཧར་རེ་ཚིང་ལགས་ཀྱིས་ད་ལྟ་ཐའེ་ཝན་གྱི་ཕྱི་སྲིད་བློན་ཆེན་གཞོན་པའི་ཐུགས་འགན་བཞེས་བཞིན་ཡོད་པ་བཅས།།