༄༅། །ཕྱི་ལོ་ ༢༠༢༢ ཟླ་ ༨ ཚེས་ ༢༩ ཉིན་གྱི་སྔ་དྲོ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་གོ་སྒྲིག་འོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་འབྲེལ་ལམ་དང་ཞུ་གཏུག་གནང་ཕྱོགས་ཀྱི་ཉིན་གྲངས་གསུམ་རིང་གི་ཟབ་སྦྱོང་དབུ་འབྱེད་མཛད་སྒོ་ཚོགས་ཡོད་པ་དང་། ཟབ་སྦྱོང་དབུ་འབྱེད་མཛད་སྒོར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་། དྲུང་འཕར་བསྟན་འཛིན་ལེགས་བཤད་ལགས། ཟབ་ཁྲིད་པ་ཝི་ཤལ་ཨ་རོ་རཱ་ (VISHAL ARORA) ལགས་དང་ཧར་ཤི་ཏཱ་རཱ་ཐོར་ (Harshita Rathore) ལགས། དེ་བཞིན་ཕྱི་དྲིལ་ལས་ཁུངས་དང་། བོད་ཀྱི་འགྲེམས་སྟོན་ཁང་། བོད་ཀྱི་སྲིད་བྱུས་ཉམས་ཞིབ་ཁང་། བོད་མི་མང་སྤྱི་འཐུས་ལྷན་ཁང་།  རྒྱལ་སྤྱིའི་བོད་དོན་འབྲེལ་མཐུད་ཁང་། བོད་ཀྱི་བུད་མེད་ལྷན་ཚོགས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་། བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་། འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་། བོད་རང་བཙན་སློབ་ཕྲུག་ཚོགས་པ་བཅས་ནས་ཁྱོན་མི་གྲངས་ ༢༡ མཉམ་ཞུགས་གནང་ཡོད།དེ་ཡང་ཟབ་སྦྱོང་གི་ཐོག་མར་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་ཐེངས་འདིའི་ཟབ་སྦྱོང་དང་ཟབ་ཁྲིད་པའི་སྐོར་ངོ་སྤྲོད་གནང་བ་དང་འབྲེལ་ཉིན་གྲངས་གསུམ་རིང་གི་ཟབ་སྦྱོང་སྐབས་མཉམ་ཞུགས་པ་ཡོངས་ནས་བསམ་བློ་གུ་ཡངས་པོ་བཏང་སྟེ་ཞུ་གཏུག་དང་འབྲེལ་མོལ་གནང་སྟངས་སྐོར་ཤེས་རྟོགས་གནང་དགོས་པའི་གལ་གནད་སྐོར་གསུངས་གྲུབ་མཚམས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་འབྲེལ་མོལ་གནང་སྟངས་ནི་སྒྱུ་རྩལ་ཞིག་ཡིན་ཞིང་། ཟབ་སྦྱོང་ནང་མཉམ་ཞུགས་གནང་མཁན་ཕལ་ཆེ་བ་གཞོན་སྐྱེས་ཤ་སྟག་ཡིན་པས་འབྲེལ་མོལ་གནང་སྟངས་སྐོར་རྒྱུས་མངའ་དེ་ཙམ་མེད་སྲིད་ཀྱང་། ཟབ་ཁྲིད་པར་བོད་དོན་སྐོར་རྒྱུས་མངའ་ཡོད་སྟབས་ཟབ་སྦྱོང་དེས་ཏན་ཏན་ཕན་ཐོགས་ངེས་ཅན་ཞིག་འབྱུང་ངེས་ཡིན་པ་སོགས་ཀྱི་སྐོར་གསུངས་ཡོད། འབྲེལ་ལམ་དང་ཞུ་གཏུག་གནང་ཕྱོགས་སྐོར་གྱི་ཟབ་སྦྱོང་དེ་བཞིན་ཕྱི་ལོ་ ༢༠༢༢ ཟླ་ ༨ ཚེས་ ༢༩ ནས་ ༣༡ བར་ཉིན་གྲངས་གསུམ་རིང་འཚོག་གི་ཡོད།ཟབ་ཁྲིད་པ་ཝི་ཤལ་ཨ་རོ་ར་ (VISHAL ARORA) ལགས་ནི། གསར་འགོད་པ་ཞིག་ཡིན་ལ། ལོ་ངོ་ ༢༠ ལྷག་གི་གསར་འགོད་ལས་རིགས་ཐོག་མཉམ་མྱོང་ཡོད་པ་མ་ཟད། ཁོང་གིས་གཞུང་དང་གཞུང་ཁོངས་མིན་པའི་ཚོགས་པ་ཁག་ལ་འབྲེལ་མོལ་གནང་སྟངས་སྐོར་ཟབ་ཁྲིད་གནང་ཡོད། ཟབ་ཁྲིད་པ་ཧར་ཤི་ཏཱ་རཱ་ཐོར (Harshita Rathore) ལགས་ཀྱང་གསར་འགོད་པ་ཡིན་ཞིང་། ཁོང་གིས་གསར་འགོད་ཆེད་ལས་པ་དང་གསར་འགོད་པའི་སློབ་ཕྲུག་གྲངས་ ༥༠༠ ལྷག་ལ་གསར་འགོད་ལས་རིགས་སྐོར་ཟབ་ཁྲིད་གནང་ཡོད་པ་བཅས།།