༄༅། །ཕྱི་ལོ་ ༢༠༢༢ ཟླ་ ༨ ཚེས་ ༢༤ ཉིན་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་དང་བོད་ཀྱི་ཐེབས་རྩའི་མཐུན་འགྱུར་འོག ༧རྒྱལ་དབང་སྐུ་ཕྲེང་རིམ་བྱོན་༧གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་གལ་གནད་རང་བཞིན་དང་འབྲེལ་བའི་ཚོགས་འདུ་དྷ་སའི་ཉེ་འདབས་སུ་རྟེན་གཞི་བྱས་པའི་  (Imperial Heights Clarks Inn ) ཞེས་པའི་གསོལ་མགྲོན་ཁང་དུ་ཚོགས་ཡོད། ཚོགས་འདུ་དེ་ཕྱི་ལོ་ ༢༠༢༢ ཟླ་ ༨ ཚེས་ ༢༤ ནས་ ༢༥ བར་ཉིན་གྲངས་གཉིས་རིང་འཚོག་གི་ཡོད།དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་ཚོགས་འདུའི་དབུ་འབྱེད་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་དགེ་བཤེས་ཐུབ་བསྟན་ཡར་འཕེལ་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་བསོད་ནམས་རྒྱལ་མཚན་ལགས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་དང་ཚོགས་གཞོན་བློ་བཟང་ཚེ་རིང་ལགས། ཚོགས་བཅར་བ་སོགས་ལྷན་འཛོམས་ཀྱི་ཐོག་མར་སྐུ་མགྲོན་གཙོ་བོ་མཆོག་དང་དམིགས་བསལ་སྐུ་མགྲོན་རྣམ་པ། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་ཚོགས་ཁང་དུ་གདན་ཞུས་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྣང་གསལ་མར་མེ་ཞལ་ཕྱེ་གནང་གྲུབ་མཚམས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་དང་གཞོན་ནུའི་མཐུན་གཞས་བཏང་རྗེས་བོད་མི་རིགས་ཀྱི་བདེན་དོན་ཆེད་རང་སྲོག་ཚུན་ཆད་བློས་བཏང་གནང་མཁན་རྒྱལ་གཅེས་པ་རྣམས་ཀྱི་སྙིང་སྟོབས་དང་མཛད་རྗེས་ལ་གུས་བཀུར་རྗེས་དྲན་སླད་ངག་བཅད་གུས་འདུད་སྐར་མ་གཅིག་རིང་ཞུས།དེ་ནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་ཚོགས་འདུ་ངོ་སྤྲོད་ཀྱི་གསུང་བཤད་གནང་སྟེ་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་ལ་ཐུགས་རྗེ་ཆེ་ཞུའི་སྐུ་ཐང་ཞིག་འབུལ་ལམ་ཞུས་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། ངས་དུས་རྒྱུན་དུ་བོད་ཀྱི་ལོ་རྒྱུས་ལ་བོད་མི་རང་ཉིད་ཀྱིས་ངེས་པར་དུ་ལྟ་དགོས་ཀྱི་འདུག་ཅེས་རྗོད་བཞིན་ཡོད། ད་ལྟའི་མི་རབས་ཀྱི་བོད་ཀྱི་ལོ་རྒྱུས་དང་ཡིག་ཆ་ཚང་མ་དེང་རབས་ཀྱི་འཕྲུལ་རིག་བེད་སྤྱོད་བཏང་ནས་ལྟ་ཀློག་བྱེད་དགོས་པ་མ་ཟད། མ་འོངས་པའི་མི་རབས་གསར་པ་ཚོ་བོད་ཀྱི་ལོ་རྒྱུས་སོགས་འཛིན་སྐྱོང་སྤེལ་གསུམ་སླད་དོ་སྣང་ཡོད་པར་བཟོ་རྒྱུ་ཧ་ཅང་གལ་ཆེན་པོ་རེད། 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཇི་ཙམ་བཀའ་དྲིན་ཆེན་པོ་ཡིན་པ་སྤྱི་ཚོགས་ནང་བཀའ་མོལ་དང་ཚོགས་འདུ་རབ་དང་རིམ་པ་ཚོགས་ཡོད་པ་མ་ཟད། བཀའ་ཤག་གོང་མའི་ངོས་ནས་༸རྒྱལ་བའི་བཀའ་དྲིན་རྗེས་དྲན་སྲུང་བརྩི་ཞུས་ཡོད། ཉིན་གཅིག་དང་གཉིས་ཀྱི་སྐད་ཆ་ཙམ་མིན་པར་དུས་རྒྱུན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་བསམ་ཤེས་དགོས་རྒྱུ་ཧ་ཅང་གལ་ཆེན་པོ་ཡིན་པ་སྨོས་མེད་རེད། གང་ལྟར་རང་རེའི་སྤྱི་ཚོགས་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་བསམ་ཤེས་མེད་མཁན་ཕལ་ཆེར་མེད་པ་ལྟ་བུ་རེད་བསམ་གྱི་ཡོད། འོན་ཀྱང་ཕྱིའི་གནོན་ཤུགས་དང་དངོས་ཤུགས་བརྒྱུད་གསུམ་གྱི་ཁེ་ཕན་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་མཁན་རེ་བཟུང་ཡོང་བཞིན་འདུག་པ་དེ་དག་ནི་ལས་རྒྱུ་འབྲས་ཀྱི་ཐོག་ནས་འགྲོ་གི་མ་རེད། དེར་བརྟེན་མ་འོངས་པར་བོད་པའི་སྤྱི་ཚོགས་ནང་དེ་རིགས་མི་དགོས་པ་བྱུང་ན་ཡག་ཤོས་རེད་བསམ་གྱི་ཡོད། ད་བར་ཁ་ནས་གང་བྱུང་བཤད་དེ་སྐྱེ་བ་ཕྱི་མར་བསམ་བློ་གཏོང་མི་དགོས་མཁན་དེ་དག་གིས་སྤྱི་ཚོགས་ནང་མི་མང་ལ་ཕོག་ཐུག་འགྲོ་རྒྱུའི་རིགས་བྱེད་མི་དགོས་ན་ཡག་པོ་ཡོད་པ་རེད་ཅེས་ཁ་སྔོན་བཀའ་ཤག་ནས་ཤོག་གྲངས་གཉིས་ཅན་གྱི་ཡིག་ཆ་ཞིག་བཏོན་ཡོད། དེ་རིང་ཡིན་ནའང་འབོད་སྐུལ་དེ་ག་རང་ཞུ་རྒྱུ་ཡིན།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྒྲིག་འཛུགས་ནང་སྤྱི་ནོར་༸གོང་ས་༸སྐྱབས་མགོན་པོ་མཆོག་ངོ་བོ་དང་ཐད་ཀར་འབྲེལ་བ་ཆགས་ཡོད་པ་ལས་འབྲེལ་བ་མེད་པའི་སྒྲིག་འཛུགས་ཤིག་ཡོང་ཐབས་མེད། སྒྲིག་འཛུགས་འདི་གལ་གནས་ཆེ་ཆུང་བོད་པའི་སྤྱི་ཚོགས་ཙམ་མིན་པར་རྒྱལ་སྤྱི་ཁྱོན་ཡོངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཡིད་ཆེས་དང་དད་པ། གུས་བརྩི་མ་ཞུ་མཁན་མེད་པ་ལྟ་བུ་རེད། རྒྱ་ནག་གི་འགོ་ཁྲིད་ཚོ་ཡིན་ནའང་ཁ་ནས་༸རྒྱལ་བ་རིན་པོ་ཆེ་མཆོག་ལ་ཁ་བྲལ་བ་སོགས་གང་ཞུ་བཞིན་ཡོད་ནའང་སེམས་ནང་གུས་བརྩི་ཆེན་པོ་ཞིག་ཡོད་ཀྱི་རེད་དྲན་གྱི་འདུག དེ་རིང་འདིར་འདི་ལྟ་བུའི་ཚོགས་འདུ་གོ་སྒྲིག་ཞུས་པ་རེད། མ་འོངས་པར་རིམ་པས་རྒྱལ་སྤྱིའི་ཁྱོན་ལ་བོད་མིའི་སྒྲིག་འཛུགས་ཀྱི་ངོས་ནས་འགན་འཁུར་དགོས་ཀྱི་ཡོད། དེ་བཞིན་གཞུང་ཁོངས་མིན་པའི་སྒྲིག་འཛུགས་ངོས་ནས་ཀྱང་འདིའི་གལ་གནད་སྐོར་ང་ཚོའི་བསམ་ཚུལ་བསྡུས་པ་ཙམ་མིན་པར་རྒྱལ་སྤྱིའི་ནང་རྒྱལ་ཁབ་གཞན་གྱིས་བསམ་ཚུལ་གང་ཡོད་མེད་བསྡུས་པ་ཙམ་དུ་མ་ཟད། རྒྱལ་ཁབ་སོ་སོའི་ནང་འཐབ་རྩོད་ཀྱི་ངོ་བོ་ལྟ་བུ་སླེབ་ཐུབ་པ་ཡིན་ན་ཕན་ཐོགས་ཏན་ཏན་ཡོང་གི་རེད་བསམ་གྱི་འདུག དེར་བརྟེན་བོད་མིའི་སྒྲིག་འཛུགས་ཀྱི་ངོས་ནས་ཀྱང་དེ་སྔ་ནས་འབད་བརྩོན་གནང་ཡོད་པ་རེད། ད་ལྟའི་དུས་སུ་ཨ་རིར་མཚོན་ན་ཕྱི་ལོ་ ༢༠༠༢ ལོར་གཏན་འབེབས་གནང་བའི་བོད་དོན་རྒྱབ་སྐྱོར་གྱི་སྲིད་བྱུས་དེ་བསྐྱར་བཅོས་ཕྱིན་ཏེ་ (Tibetan Policy and Support Act of 2020) ཞེས་དང་། ཉེ་ཆར་ཕྱི་ཟླ་ ༦ ནང་ཨ་རིའི་གྲོས་ཚོགས་ནང་བོད་ཀྱི་ལོ་རྒྱུས་གནས་བབ་ཐོག་མཁས་པའི་ཉན་ཞིབ་ཐེངས་དང་པོ་གོ་སྒྲིག་ཞུས་ཐུབ་པ་བྱུང་ཡོད། དེ་དག་ནི་ལོ་རྒྱུས་ནང་ལྷག་རྒྱུ་ཞིག་རེད། རྒྱ་ནག་གིས་བོད་ཀྱི་ལོ་རྒྱུས་ཐོག་འཁྱོག་བཤད་བྱེད་ཀྱི་ཡོད་པ་དེ་དག་གི་ཐོག་ནས་ཨ་རིའི་གྲོས་ཚོགས་ནང་ཁྲིམས་འཆར་གྱི་ངོ་བོ་ཐོག་ནས་ཡིག་ཆ་ཞིག་སླེབ་ཡོད། དེར་བརྟེན་བོད་མིའི་སྒྲིག་འཛུགས་དང་གཞུང་ཁོངས་མིན་པའི་ཚོགས་པ་ཁག་ནས་དེ་དག་གི་ཐོག་འབད་བརྩོན་གཅིག་མཚུངས་གནང་དགོས་ཀྱི་ཡོད། ཚང་མས་སོ་སོའི་ཚོགས་མི་ས་གནས་གང་དུ་ཡོད་ནའང་ཤུགས་བརྒྱབ་དགོས།ད་ལྟའི་བཀའ་ཤག་ནས་གཞུང་གིས་ལས་ཀ་བྱེད་དགོས་རིགས་བོད་མིའི་སྒྲིག་འཛུགས་ནས་འགན་བཞེས་ཏེ་གནང་གི་རེད། གཞུང་ཁོངས་མིན་པའི་ཚོགས་པ་ཁག་ནས་སོ་སོའི་ངོ་བོ་ཐོག་ནས་ཕྱག་ལས་གནང་དགོས་ཁག་གནང་དགོས། ལྟ་གྲུབ་དང་ལངས་ཕྱོགས་ཀྱི་ཐོག་ནས་མ་མཐུན་པ་ཡོད་པ་དེ་དག་ཕུགས་རྒྱང་རིང་པོའི་དམིགས་ཡུལ་རེད། ད་ལྟ་ཁ་ཚ་དགོས་གཏུག་གི་བོད་ནང་བོད་མི་ཚོ་མྱོང་བཞིན་པའི་དཀའ་ངལ་དེ་དག་སེལ་སླད་ང་ཚོ་ཚང་མ་དུས་རྟག་ཏུ་མཉམ་རུབ་ཐོག་ལས་ཀ་བྱེད་དགོས་པ་ལས་ལྟ་བ་ལངས་ཕྱོགས་མི་མཐུན་པ་ཡིན་ཞེས་བསྡད་པ་ཡིན་ན། ང་ཚོར་ནུས་པ་ཕྲན་བུ་ཡོད་པ་དེ་ཆུང་དུ་འགྲོ་རྒྱུ་ཆགས་ཀྱི་ཡོད།  དབུ་མའི་ལམ་ནི་བོད་མིའི་སྒྲིག་འཛུགས་ནས་གཏན་ལ་ཕབ་པའི་སྲིད་བྱུས་རེད། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་པའི་ནང་ནས་མཛད་པ་གལ་ཆེ་བ་ཞིག་ཆགས་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་མང་རིང་དགོངས་པ་བཞེས་པ་དང་། ལྷག་པར་བོད་ནང་གི་དངོས་ཡོད་གནས་སྟངས་དང་ལས་དོན་གང་ཞིག་ཡིན་ནའང་བསྒྲུབ་ཐུབ་དང་མི་ཐུབ་ཀྱི་གནས་སྟངས་ལ་གཟིགས་ཏེ་ཛ་དྲག་གནས་སྟངས་འོག་ནས་བོད་མི་རིགས་དེ་དག་སྐྱོབ་ཐབས་བཙལ་གནང་བ་དེ་འགྲེལ་བཤད་དང་ཡང་བཤད་མི་དགོས་པར་ང་ཚོ་ཚང་མས་མཁྱེན་གྱི་ཡོད་པ་རེད།སྤྱི་ཚོགས་ག་འདྲ་ཞིག་ཡིན་ནའང་བསམ་བློ་མི་མཐུན་པ་དང་བསམ་བློ་མ་འདྲ་བ་ཡོང་རྒྱུ་ཡིན་པ་ཆོས་ཉིད་རེད། དེར་ཧང་སང་དགོས་དོན་གང་ཡང་མེད། དེར་བརྟེན་བསམ་བློ་མི་འདྲ་བ་ཡོད་རུང་མཐར་བསམ་བློ་དང་ལས་དོན་ག་འདྲ་ཞིག་བྱེད་པ་ཡིན་ནའང་ང་ཚོའི་རྩ་དོན་ལ་ཕན་པ་ཞིག་ག་འདྲ་ཡོང་ས་རེད་ཅེས་བསམ་བློ་བཏང་བ་དང་། ཕན་ཚུན་གཅིག་གིས་གཅིག་ལ་གནོད་མི་བྱེད་པ་དང་ཕན་ཐོགས་ཡོང་བའི་བསམ་བློ་བཏང་ཐུབ་ན་རང་གཞན་ཚང་མའི་ནུས་པ་མཉམ་དུ་སྤུངས་ཐུབ་པའི་རེ་བ་ཡོད་པ་རེད། གལ་ཆེ་ཤོས་ནི་རང་རེའི་སྤྱི་ཚོགས་འདི་ཧྲ་ཏག་ཏག་གནས་ཐུབ་དགོས། གལ་ཏེ་བོད་པའི་སྤྱི་ཚོགས་འདི་ཧྲ་ཏག་ཏག་གནས་ཐུབ་པ་ཡིན་ན་རྒྱ་ནག་ངོས་ནས་དཀྲུག་ཏུ་ཡོང་བ་ཡིན་ནའང་དཀྲུག་མི་ཐུབ་པའི་གནས་སྟངས་ཤིག་ཆགས་པ་ཡིན་ན། འཐབ་རྩོད་ནང་ནུས་པ་མཉམ་སྤུངས་དང་གོམ་པ་མདུན་སྤོ་བྱེད་ཐུབ་པའི་རེ་བ་ཞུ་བཞིན་ཡོད། དེ་ལྟར་གནང་ཐུབ་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྒྲིག་འཛུགས་དང་དགོངས་པ་གལ་ཆེན་པོ་རྩི་བཞིན་ཡོད་པ་ནང་ལྟར་ལས་དོན་ཡང་༸རྒྱལ་བ་དགྱེས་པའི་མཆོད་སྤྲིན་གྱི་ངོ་བོར་འགྱུར་བའི་རེ་བ་ཡོད། ཅེས་དང་།གཞན་ཡང་དཔལ་ལྡན་སྲིད་སྐྱོང་མཆོག་གིས། ང་ཚོ་མང་གཙོའི་ལམ་སྲོལ་འོག་འགྲོ་ཡི་ཡོད་སྟབས་ཁྲིམས་དང་སྒྲིག་གཞི་ཤེས་དགོས་པ་གལ་ཆེན་པོ་ཆགས་ཡོད། ཁྲིམས་དང་སྒྲིག་གཞི་མ་ཤེས་པ་ཡིན་ན་སུ་ཡིས་ཁྲིམས་ལ་བརྩི་སྲུང་ཞུ་ཡི་ཡོད་མེད་ཤེས་ཀྱི་མ་རེད། བོད་མིའི་སྒྲིག་འཛུགས་ཡིན་ན་རེད། བོད་ཀྱི་གཞོན་ནུ་ལྷན་ཚོགས་ཡིན་ན་རེད། གང་ལྟར་གང་ཟག་ལས་སྒྲིག་འཛུགས་གལ་ཆེན་པོ་ཆགས་ཡོད། སྒྲིག་འཛུགས་ལས་གང་ཟག་གལ་ཆེན་པོ་ཆགས་པའི་ཉིན་མོ་བཟུང་ནས་སྒྲིག་འཛུགས་སྦོ་ལུག་འགོ་འཛུགས་ཚར་བ་རེད། དེར་བརྟེན་ཁྲིམས་དང་སྒྲིག་གཞི་ཤེས་རྒྱུ་གལ་ཆེན་པོ་ཆགས་ཡོད། ང་ཚོ་ངོས་ནས་ཆབ་སྲིད་ཀྱི་གནད་དོན་དང་སྤྱི་ཚོགས་ཀྱི་བདེ་དོན་ཆེད་དུ་ལས་དོན་བྱེད་པའི་སྐབས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཞག་ཐོག་བྱེད་ཀྱི་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་གནང་བ་དེ་དག་ལ་ང་ཚོ་ངོས་ནས་སློབ་སྦྱོང་བྱས་ཏེ་ལག་བསྟར་ཞུ་དགོས་པ་གལ་ཆེན་པོ་རེད། ང་ཚོ་ནང་ཁུལ་ལ་རྡོག་རྩ་གཅིག་སྒྲིལ་དང་འཆམ་མཐུན་བྱེད་དགོས། ཞེས་གསུངས། ཕྱོགས་མཙུངས་དཔལ་ལྡན་སྲིད་སྐྱོང་མཆོག་གིས་རྒྱ་ནག་དང་འབྲེལ་བའི་སྐོར་གསུང་དོན། དེང་སང་རྒྱ་ནག་ནི་དཔལ་འབྱོར་ཉམས་རྒུད་དང་། དངུལ་ཁང་། རྒྱུད་གཅིག་ལམ་གཅིག་སྲིད་བྱུས་སོགས་ཀྱི་དཀའ་ངལ་ཆེན་པོའི་ནང་ལྷུང་ཡོད་པ་དང་། རྒྱ་ནག་གི་འགོ་ཁྲིད་ནང་ཁུལ་ལ་ཡིད་ཆེས་མེད་པ་དང་། རྒྱ་ནག་གཞུང་གིས་ཕྱིའི་སྲུང་སྐྱོབ་ལས་ནང་གི་སྲུང་སྐྱོབ་ཀྱི་ཆེད་དུ་འགྲོ་སོང་མང་བ་གཏོང་གི་ཡོད་པ། རྒྱ་ནག་གཞུང་གིས་འཕགས་བོད་ས་མཚམས་དང་། ལྷོ་རྒྱ་ནག་རྒྱ་མཚོ། ཐའེ་ཝན་སོགས་ལ་སྙད་འཚོལ་ཁོ་ན་བྱས་དང་བྱེད་བཞིན་པ་དེ་གཙོ་བོ་རྒྱ་ནག་དམར་ཤོག་ཚོགས་པ་གནས་ཐབས་ཆེད་ཡིན་པ། མ་འོངས་པར་རྒྱ་ནག་གི་སྤྱི་ཚོགས་ཅི་འདྲ་ཆགས་མིན་ང་ཚོས་ཤེས་ཀྱི་མེད་སྟབས། ང་ཚོ་ངོས་ནས་ད་ལྟ་ནས་གྲ་སྒྲིག་ཨང་གསར་བྱེད་དགོས་པ་གལ་ཆེན་པོ་ཡིན་པ།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་གསར་སྐབས་དང་ཉེ་ཆར་ལ་དྭགས་ནས་རྒྱ་ནག་ནང་འགྱུར་བ་འགྲོ་ཡི་ཡོད་པའི་སྐོར་བཀའ་སློབ་རིམ་པ་ཕེབས་ཡོད་པ། བོད་མིའི་སྒྲིག་འཛུགས་ཀྱི་ལས་འགན་གཙོ་བོ་དེ་ཆབ་སྲིད་ཀྱི་ལས་དོན་ཐོག་དུས་ཚོད་མང་བ་གཏོང་དགོས་པ། བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་གཞིར་བཞག་ཐོག་རྒྱ་ནག་ལ་སྙོབ་ཐབས་ཀྱི་འབད་བརྩོན་མུ་མཐུད་བྱེད་ཀྱི་ཡོད་ལ། རྒྱ་ནག་གི་གནས་སྟངས་དང་རྒྱལ་སྤྱིའི་ཆབ་སྲིད་ཀྱི་གནས་སྟངས་ལ་བལྟས་ནས་སྐབས་དང་དུས་སོ་སོར་གོམ་པ་རྒྱག་དགོས་པ། བོད་ནང་གི་གནས་ཚུལ་མཁོ་སྒྲུབ་ཆེད་དུ་དཀའ་ལས་མང་བ་རྒྱག་དགོས་པ། བོད་མིའི་སྒྲིག་འཛུགས་ཀྱི་དཔལ་འབྱོར་དང་མིའི་ནུས་པར་དཔག་པའི་ང་ཚོས་འདས་པའི་ཟླ་བ་གཅིག་དང་ཕྱེད་ཀའི་རིང་འབྱུང་འགྱུར་ལོ་བཞིའི་རིང་གི་སྤྱི་ཚོགས་དང་ཆབ་སྲིད་ཀྱི་ལས་དོན་གྱི་ཆེད་དུ་འཆར་གཞི་སྒྲིག་བང་བསྒྲིགས་ནས་འགྲོ་ཡི་ཡོད། རྒྱལ་ཁབ་ཁག་སོ་སོའི་ཆབ་སྲིད་ཀྱི་འགྲོ་སྟངས་ཤེས་དགོས་པ། ཆབ་སྲིད་ཀྱི་ལམ་ལུགས་འགྲོ་སྟངས་ཤེས་པ་ཡིན་ན་བོད་དོན་ཞུ་གཏུག་བྱེད་པའི་སྐབས་སུ་ལ་ཞུ་གཏུག་བྱེད་དགོས་མིན་ཤེས་རྟོགས་ཡོང་གི་རེད། བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་གཙོ་བོ་ཆབ་སྲིད་ཀྱི་གནད་དོན་ཐོག་ལས་ཀ་བྱེད་ཐུབ་པ་ཡིན་ན་དགེ་མཚན་ཆེ་བ་ཡོད་པ་དང་།  བོད་ཀྱི་གཞོན་ནུ་ལྷན་ཚོགས་ནས་བོད་པའི་སྤྱི་ཚོགས་ཁྲོད་ཀྱི་བདེ་དོན་སླད་ལྟ་རྟོག་བྱེད་དགོས་པ་གཟིགས་ཀྱི་ཡོད་ན་བོད་མིའི་སྒྲིག་འཛུགས་ལ་འབྲེལ་བ་གནང་ན་འཐུས་ཀྱི་ཡོད། བོད་མིའི་སྒྲིག་འཛུགས་ནས་བོད་མིའི་བདེ་དོན་ལ་ཏན་ཏན་ལྟ་རྟོག་གནང་གི་རེད། རྣམ་པ་ཚོས་བོད་མིའི་སྒྲིག་འཛུགས་ཀྱི་བཀའ་ཤག་གིས་ལས་དོན་ག་རེ་བརྩམས་པ་ཡིན་ན་ཚང་མར་ཆབ་སྲིད་ཀྱི་ངོ་བོ་ཐོག་ནས་བལྟས་པ་ཡིན་ན་ལས་དོན་གང་ཡང་འགྲུབ་ཀྱི་མ་རེད། ཅེས་དང་། བོད་མི་ཚོས་བཙན་བྱོལ་བོད་མིའི་མི་འབོར་གྲངས་བཤེར་གྱི་འགེངས་ཤོག་དགང་དགོས་པ་སོགས་ཀྱི་སྐོར་གསུངས་ཡོད་པ་བཅས།།