༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་བར་ལམ་གཞུང་འབྲེལ་དབྱར་གསོལ་སྤྱན་འདྲེན་ཞུས་པར་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོས་བཀའ་ལུང་ཕེབས་དོན་བཞིན་༧རྒྱལ་བའི་སྐུ་ཕྱྭ་དང་།  བོད་ཀྱི་བསྟན་སྲིད་བདེ་ཐབས།  སྤྱི་མཐུན་བསོད་ནམས་གསོག་བསྐྱེད།  འབྱུང་བཞིའི་གནོད་ཚབས་བཟློག་ཐབས་སུ་མི་མང་ཡོངས་ནས་མ་ཎི་ཡིག་དྲུག་དང་།  སྒྲོལ་མ་ཉེར་གཅིག  ༧རྒྱལ་བའི་མཚན་སྔགས།  གསུང་བྱིན་བདེན་པའི་རྔ་སྒྲ།  བོད་སྐྱོང་ལྷ་སྲུང་གི་འཕྲིན་བསྐུལ།  ཨོ་རྒྱན་འབྱུང་བཞིའི་ལྷ་མོའི་གསོལ་འདེབས་བཅས་དང་།  དེ་བཞིན་ཉེ་ཆར་བོད་ཀྱི་རྒྱལ་ས་ལྷ་ས་གཙོས་པའི་བོད་མདོ་དབུས་ཁམས་གསུམ་གྱི་ས་ཁུལ་གང་སར་ཏོག་དབྱིབས་གཉན་རིམས་འགོས་ཁྱབ་ཏུ་འགྲོ་བཞིན་པའི་ཛ་དྲག་གནས་སྟངས་བཟློག་ཐབས་ཇི་ཡོད་ལུང་བརྟག་ཞུས་པའི་ཕེབས་སྒོར་སྒྲོལ་མའི་གཟུངས་སྔགས་གང་མང་གྲངས་གསོག་བྱས་ཚེ།  ཉེན་ཁ་དེ་ཙམ་མེད་ཅེས་ཕེབས་དོན་གཞིར་བཅས།  དབུས་ལས་ཁུངས་ཁག་གི་དྲུང་ཆེ་འགན་འཛིན་དང་།  སྐུ་ཚབ་དོན་གཅོད།  ས་གནས་འགོ་འཛིན་བཅས་ལ་གོང་གསལ་ཞབས་རིམ་ཁག་གནད་སྨིན་འབད་སྒྲུབ་ཞུ་དགོས་པའི་གསལ་བསྒྲགས་འབྱོར་དོན་ལྟར།  འདི་ག་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་དང་། ཐའེ་སྡོད་བོད་རིགས་ཚོགས་པ་ཐུན་མོང་ནས་ཕྱི་ལོ་ ༢༠༢༢ ཟླ་ ༨ ཚེས་ ༢༤  ཉིན་ཏེ་ལྷག་དཀར་དགེ་བའི་ཉིན་མོ་དང་སྟབས་བསྟུན་ནས་ཆོས་བརྒྱུད་རིས་མེད་ཀྱི་བླ་མ་དང་།  དགེ་བཤེས  མཁན་པོ་བཅས་དགེ་འདུན་ཞལ་གྲངས་ཉི་ཤུ་རྩ་བཞི་དང་།  དེ་བཞིན་སྐུ་ཚབ་དོན་གཅོད་ཀྱིས་གཙོས་ཐའེ་སྡོད་བོད་རིགས་ཚོགས་པའི་ཚོགས་གཙོ་རྒྱུན་ལས་སོགས་མི་སྐྱ་དགུ་བཅས་ཁྱོན་སེར་སྐྱ་མི་གྲངས་སུམ་ཅུ་སོ་སུམ་ཙམ་ནས་དགོང་མོར་ཆུ་ཚོད་ ༦ ནས་ ༨ བར་དོན་ཁང་གི་ནང་ཆོས་འཛིན་ཁང་དུ་གོང་གསལ་ཞབས་རིམ་རྣམས་བློ་རྩེ་གཅིག་སྒྲིམ་གྱིས་འབད་སྒྲུབ་ཞུས་པ་དང་།  གསོལ་ཇའི་བར་གསེང་སྐབས་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་བོད་ནང་ཏོག་དབྱིབས་གཉན་རིམས་ཁྱབ་པ་ལས་རྒྱ་དམར་གཞུང་གི་གདུག་རྩུབ་སྲིད་བྱུས་འོག་གཞིས་ལུས་བོད་མི་ཚོར་དཀའ་ལས་ཚད་ལས་བརྒལ་བ་ཇི་ལྟར་མྱང་བཞིན་པའི་སྐོར་འགྲེལ་བརྗོད་དང་འབྲེལ། རྒྱ་དམར་འགོ་འཁྲིད་ནང་ཁུལ་གྱི་འགལ་ཟླ་དང་། དཔལ་འབྱོར་ཉམས་རྒུད། མང་ཚོགས་ཀྱིས་གཞུང་ལ་ཡིད་ཆེས་བརླགས་པ། རྒྱལ་སྤྱིའི་སྒང་གྲོགས་མེད་ཁེར་རྐྱང་དུ་ལུས་པ་ཕྱོགས་གང་ལ་བལྟས་ནའང་། རྒྱ་དམར་གཞུང་དེ་མུ་མཐུད་གནས་ཐབས་བྲལ་བ་ཆགས་ཀྱི་ཡོད་སྟབས། ང་ཚོ་བོད་མི་ནང་ཁུལ་ཟིང་སློང་འགལ་འཁྲུག་མིན་པར་བརྟན་པོ་གནས་ཐུབ་ན་སྐྱིད་པའི་ཉི་མ་འཆར་རྒྱུའི་རེ་བ་ཆེ་རུ་ཆེ་རུ་འགྲོ་གི་འདུག་ཅེས་གསུངས་པ་དང་སྦྲགས། སྤྱི་ཡོངས་སྐུ་ཚབ་དོན་ཁང་གི་ལས་དོན་བྱེད་ཕྱོགས་དང་། མ་འོངས་ལས་འཆར་ཇི་ཡོད།  སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་གཞིར་བཟུང་ཐའེ་ཝན་དུ་ཆོས་ལུགས་ཕན་ཚུན་མཐུན་སྒྲིལ་གང་ཟབ་སྤེལ་ཕྱོགས་དང་།  ཆོས་ཚོགས་ཁག་གི་དགེ་འདུན་པ་དང་།  དེ་བཞིན་རྒྱ་ཡིག་སློབ་སྦྱོང་ཆེད་ཐའེ་ཝན་གྱི་མཐོང་ཆེན་སྐོར་ལ་སྔར་ལས་ལྷག་པའི་སྟབས་བདེ་དང་གུ་ཡངས་ཀྱི་སྲིད་ཇུས་ཐོབ་ཐབས་སུ་འབད་བརྩོན་ཞུ་མུས་ཡིན་ཡང་ཚང་མས་ཕྱར་གྲུ་མཉམ་འདེགས་གནང་དགོས་གལ་སོགས་ཀྱི་གསུང་བཤད་གནང་རྗེས་མུ་མཐུད་ཞབས་རིམ་སྨོན་ལམ་འཚོགས་པ་དང་། ཞབས་རིམ་གྲུབ་རྗེས་འབྲེལ་ཡོད་དད་ལྡན་པ་ནས་ཚང་མར་གསོལ་ཇ་དང་དགོང་དྲོའི་ཞལ་ལག་གི་སྦྱིན་བདག་གནང་བ་དང་། དོན་ཁང་ནས་དགེ་འདུན་པ་ཚོར་སྐུ་འགྱེད་ཕུལ་བ་བཅས་ཞབས་རིམ་ལེགས་པར་གྲུབ་ཡོད། །