༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་ལྟ་གྲུབ་སློབ་དཔོན་དགེ་བཤེས་འཇམ་དཔལ་ཆོས་འཛིན་ལགས་ཕྱི་ཟླ་ ༦ ཚེས་ ༡ ཉིན་ལས་འཁྱུར་ཞུས་པའི་ཚབ་ཏུ། ལྟ་གྲུབ་སློབ་དཔོན་གསར་པ་ལྷ་རམས་དགེ་བཤེས་སྤྲུལ་སྐུ་བསྟན་འཛིན་རྣམ་གྲོལ་རིན་པོ་ཆེ་ལགས་ཡོངས་གྲགས་ཡིག་རྒྱུགས་བརྒྱུད་ལྟ་གྲུབ་སློབ་དཔོན་གསར་པར་བསྐོ་གཞག་བྱུང་བ་ལྟར། ཕྱི་ཟླ་ ༨ ཚེས་ ༡ ཉིན་དངོས་སུ་ལས་བཅར་ཞུས་ཏེ་ཉིན་གྲངས་བཅུའི་རིང་སྐུ་ཚབ་དོན་གཅོད་དང་གོ་བསྡུར་ཞིབ་ཕྲ་ཞུས་རྗེས། ནང་ཆོས་ཤེས་ཚད་གང་འཚམས་ཡོད་མཁན་ཚོར་དམིགས་ཏེ་ཤེར་ཕྱིན་མངོན་པར་རྟོགས་པའི་རྒྱན་གྱི་མཐོ་རིམ་འཛིན་གྲྭ་དང་། ནང་ཆོས་ཐོག་མ་སློབ་སྦྱོང་བྱེད་མཁན་ཚོའི་སླད་དུ་དམའ་རིམ་བློ་རིག་འཛིན་གྲྭ། བོད་ཀྱི་སྐད་ཡིག་སྦྱོང་འདོད་ཅན་ལ་དམའ་རིམ་བོད་ཡིག་འཛིན་གྲྭ་བཅས་འཛིན་གྲྭ་ཁག་གསུམ་ཚོགས་རྒྱུའི་ལས་འཆར་གཏན་འབེབས་བྱུང་ཡོད།
ཕྱི་ཟླ་ ༨ ཚེས་ ༡༡ ཉིན་སྐུ་ཚབ་དོན་གཅོད་ལས་ཁུངས་ནས་འཛིན་གྲྭ་གསར་པ་ཚོགས་རྒྱུའི་ཡོངས་ཁྱབ་གསལ་བསྒྲགས་སྤེལ་མ་ཐག་ཉིན་གྲངས་གཉིས་རིང་དྲ་ལམ་དང་། ཁ་པར། དངོས་སུ་བཅར་བ་བཅས་བརྒྱུད་ཐོ་འགོད་གནང་མཁན་བོད་ཀྱི་སྐད་ཡིག་འཛིན་གྲྭར་མི་གྲངས་ ༢༦༤ དང་། དམའ་རིམ་བློ་རིག་འཛིན་གྲྭར་མི་གྲངས་ ༢༦༧ ། མཐོ་རིམ་ཤེར་ཕྱིན་མངོན་རྒྱན་འཛིན་གྲྭར་མི་གྲངས་ ༡༦༦ བཅས་ཐོ་འགོད་གནང་མཁན་ཤིན་ཏུ་མང་བས་དགའ་འོས་པ་བྱུང་ཡོད། 
ཕྱི་ཟླ་ ༨ ཚེས་ ༡༣ རེས་གཟའ་སྤེན་པའི་ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་མཐོ་རིམ་ཤེར་ཕྱིན་འཛིན་གྲྭ་དངོས་སུ་འགོ་འཛུགས་ཞུས་ཡོད་ཅིང་། སྤྱིར་ནང་ཆོས་འཛིན་ཁང་ལ་མི་ངོ་ ༤༠ ཙམ་ལས་གཤོངས་ཀྱི་མེད་པ་དང་། ལྷག་དོན་ས་གནས་སུ་ཏོག་དབྱིབས་ནད་ཡམས་མུ་མཐུད་བྱུང་བཞིན་པ་སོང་། ནད་ཡམས་དོགས་ཟོན་ཆེད་སློབ་ཁང་དུ་དངོས་སུ་བཅར་མི་སློབ་ཕྲུག་ཉི་ཤུ་ཡན་དང་། མི་ངོ་ ༨༠ ལྷག་ངོ་དེབ་དང་ (Zoom) སོགས་དྲ་ལམ་ཐོག་མཉམ་ཞུགས་གནང་བ་དང་། ཉིན་དང་པོའི་འཛིན་གྲྭ་འགོ་འཛུགས་ཞུ་སྐབས་ལྟ་གྲུབ་སློབ་དཔོན་གྱིས་དོན་ཁང་ཁྱབ་འོག་ནང་ཆོས་འཛིན་ཁང་འདི་བཞིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དངོས་སུ་ཞབས་བཅག་སྟེ་བྱིན་རླབས་གནང་མྱོང་ཡོད་པའི་གནས་ཁྱད་པར་ཅན་ཞིག་ཡིན་པ་དང་། འདིར་མཉམ་དུ་འཛོམས་ཐུབ་པ་ནི་བསོད་ནམས་ཀྱི་བགོ་བསྐལ་དམིགས་བསལ་བ་ཞིག་ཡིན་སྟབས། ཚང་མས་གོ་སྐབས་དམ་འཛིན་གནང་སྟེ་ནང་ཆོས་ལ་འབད་འབུངས་བྱེད་པ་དང་ཆབས་ཅིག ང་རྒྱལ་དང་ཕྲག་དོག ཕྱོགས་ཞེན་གྱི་ལྟ་བ་སྤངས་ཏེ་རང་སེམས་ཞི་ཞིང་འདུལ་ཐུབ་པ་དགོས་པའི་བླང་དོར་གྱི་གསུང་བཤད་དང་འབྲེལ། ཆུ་ཚོད་གཉིས་རིང་སློབ་འཁྲིད་དང་སློབ་མ་ཚོས་དོགས་འདྲི་གནང་པ་ཁག་ལ་དོགས་གཅོད་ཞིབ་ཅིང་ཕྲ་བ་ཞུས་ཡོད་པ་རེད།
ལྟ་གྲུབ་སློབ་དཔོན་གསར་པ་སྤྲུལ་སྐུ་བསྟན་འཛིན་རྣམ་གྲོལ་རིན་པོ་ཆེ་ལགས་ནི་ལྷ་རམས་དགེ་བཤེས་རྩེ་ཕུད་གྲས་ཡིན་པ་དང་། སྔོན་བོད་དུ་མི་ལོ་བཅུ་ལྷག་རྒྱ་ཡིག་གི་སློབ་སྦྱོང་གནང་མྱོང་ཡོད་པ་མ་ཟད། ཐའེ་ཝན་དུ་ཕེབས་ཏེ་མི་ལོ་བཅུ་ལྷག་རིང་རྒྱ་ཡིག་ལ་སྦྱོང་བརྩོན་མཐར་ཕྱིན་གནང་སྟེ་ད་ལྟ་འབུམ་རམས་པའི་སློབ་སྦྱོང་ཐོན་གྲབས་ཡོད་སྟབས། རྒྱའི་སྐད་ཡིག་ཆུ་རྒྱུག་རྒྱུག་ལྟར་ཡིན་པར་བརྟེན། མ་འོངས་པར་རེས་གཟའ་སྤེན་པ་ནམ་འཁེལ་ལ་ཕར་ཕྱིན་འཛིན་གྲྭ་དང་། ཕྱི་ལོ་ ༢༠༢༢ ཟླ་ ༨ ཚེས་ ༢༥ ནས་བཟུང་རེས་གཟའ་ཕུར་བུ་ནམ་འཁེལ་ལ་དམའ་རིམ་བློ་རིག་འཛིན་གྲྭ། ཕྱི་ཟླ་ ༩ ཚེས་ ༧ ནས་བཟུང་བཀྲ་ཤིས་པའི་ལྷག་དཀར་དུས་བཟང་ནམ་འཁེལ་ལ་བོད་ཡིག་འཛིན་གྲྭ་བཅས་ཚོགས་གཏན་འཁེལ་བ་མ་ཟད། ཟླ་བ་གསུམ་རེའི་མཚམས་སུ་སློབ་དུས་རེ་མཇུག་སྒྲིལ་ཞུས་ཏེ་འཛིན་གྲྭ་གོང་མར་སྤར་རྒྱུའི་འཆར་གཞི་ལག་བསྟར་བྱ་རྒྱུ་ཡིན་པ་བཅས། །
