༄༅། །ཕྱི་ལོ་ ༢༠༢༢ ཟླ་ ༨ ཚེས་ ༣ རེས་གཟའ་མིག་དམར་ཉིན་ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་མཆོག་དང་མཇལ་འཕྲད་གནང་ཡོད།
ཐེངས་འདིའི་མཇལ་འཕྲད་སྐོར་ཐའེ་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་གསུང་དོན། ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་གིས་དབུ་ཁྲིད་པའི་གྲོས་ཚོགས་འཐུས་མིའི་སྐུ་ཚབ་ཐའེ་ཝན་དུ་འཚམས་གཟིགས་ཕེབས་པ་འདི་འཛམ་གླིང་གི་གསར་འགྱུར་ཆེ་ཤོས་ཤིག་ཆགས་ཡོད། ལྷག་པར་མཛད་རིམ་ནང་ཐའེ་ཝན་དུ་ཡོད་པའི་བོད་མི་དང་། ཡུ་གུར། ཧོང་ཀོང་། རྒྱ་ནག་དམར་ཤོག་འོག་དཀའ་སྡུག་མྱོང་མཁན་བཅས་དང་ལྷན་ཐུག་འཕྲད་དང་། འགྲོ་བ་མིའི་ཐོབ་ཐང་སྐོར་བགྲོ་གླེང་འཚོགས་རྒྱུའི་ཐད་མི་མང་དག་ཅིག་གིས་ཐུགས་སྣང་གནང་བཞིན་ཡོད།
ཕྱི་ལོ་ ༢༠༢༢ ཟླ་ ༧ ཚེས་ ༢༧ ཉིན་ཐའེ་ཝན་བོད་ཀྱི་སྐུ་ཚབ་དོན་གཅོད་ཀྱིས་ཨ་རིར་རྟེན་གཞི་བྱས་པའི་ཐའེ་ཝན་གཞུང་ཚབ་ཁང་དུ་གཞུང་ཚབ་དང་ལྷན་ཆུ་ཚོད་གཅིག་ཙམ་རིང་བཀའ་མོལ་ལྷུག་པོ་བྱུང་བ་བཞིན་ད་རེས་ལྕམ་སྐུ་ནེན་སི་པི་ལོ་སི་མཆོག་ཐའེ་ཝན་དུ་འཚམས་གཟིགས་སུ་ཕེབས་པ་དང་བསྟུན། ལྕམ་སྐུ་ནེན་སི་པི་ལོ་སི་མཆོག་གིས་ཐའེ་ཝན་རྒྱལ་ཡོངས་འགྲོ་བ་མིའི་ཐོབ་ཐང་འགྲེམས་སྟོན་ཁང་ (National Museum of Human Rights) དུ་བོད་པ་དང་ཡུ་གུར། ཧོང་ཀོང་། དེ་བཞིན་ཐའེ་ཝན་གྱི་འགྲོ་བ་མིའི་ཐོབ་ཐང་སྐོར་ཕྱག་ལས་གནང་མཁན་དང་རྒྱའི་བཙོན་ཁང་ནང་དཀའ་ངལ་འཕྲད་མྱོང་མཁན་བཅས་ལ་ཐུག་འཕྲད་གནང་ཡོད།
བོད་མིར་མཚོན་ན་ལྕམ་སྐུ་ནེན་སི་པི་ལོ་སི་མཆོག་ལ་ཟུར་དུ་དམིགས་བསལ་མཇལ་དར་འབུལ་རྒྱུའི་གོ་སྐབས་བྱུང་བ་མ་ཟད། སྒོར་སྡོད་ཚོགས་འདུའི་སྟེང་བོད་ཀྱི་ཚབ་ཞུས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཁུལ་དུ་མཛད་འཕྲིན་སྐྱོང་བཞིན་པ་དང་། སྐུ་གཟུགས་ཧ་ཅང་གསལ་ཐང་ཡིན་པའི་གཏམ་བཟང་ཞུས་པ་དང་ལྷན་དེང་སྐབས་བོད་ནང་གི་གནས་སྟངས་ཧ་ཅང་ཛ་དྲག་དང་སེམས་ཁྲལ་དགོས་པའི་གནས་སྟངས་ཡིན་པ། ཉེ་ལམ་བོད་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ཡོད་པ་ཙམ་གྱིས་འཛིན་བཟུང་བྱས་པའི་ན་གཞོན་བུད་མེད་ཚོའི་ལོ་རྒྱུས། དེ་བཞིན་འདི་ལོར་བོད་ནང་རང་ལུས་མེར་སྲེག་བྱུང་བའི་གནས་ཚུལ་ཞུས་པ་དང་མཉམ་དུ་རྒྱ་ནག་གི་སྲིད་འཛིན་ཞི་ཅིང་ཕིན་གྱིས་བོད་ཐོག་ལག་བསྟར་བྱེད་བཞིན་པའི་སྲིད་བྱུས་དེ་མི་རིགས་དང་། ཆོས་ལུགས། རིག་གཞུང་རྩ་མེད་མངོན་སུམ་འཛེམས་མེད་དུ་གཏོང་བཞིན་ཡོད་པ་མ་ཟད། ནང་ཆོས་ལ་བརྟེན་ནས་བོད་ནང་ཤུགས་རྐྱེན་ཡོད་པ་དེ་གཙང་མ་བཟོ་རྒྱུའི་ལས་འགུལ་གྱི་དཀའ་ངལ་ཧ་ཅང་ཆེན་པོ་འཕྲད་བཞིན་ཡོད་སྟབས། དེ་དག་གི་ཐོག་དོ་སྣང་དང་རྒྱབ་སྐྱོར་གནང་རོགས་ཅེས་སོགས་ཞུས་པར། ལྕམ་སྐུ་ནེན་སི་པི་ལོ་སི་མཆོག་གིས་བོད་ནང་གི་གནས་སྟངས་ཧ་ཅང་ཛ་དྲག་ཆགས་ཀྱི་ཡོད་ནའང་བོད་མིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡོད་པ་དང་། འཛམ་གླིང་གི་དོ་སྣང་དགོས་པའི་བཀའ་ལན་བཟང་པོ་གནང་སོང་། ཞེས་གསུངས། །
