༄༅། །ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཕྱི་ལོ་ ༢༠༢༢ ཟླ་ ༨ ཚེས་ ༢ ཉིན་ཉི་ཧོང་གི་གྲོང་ཁྱེར་ཨོ་སཱ་ཀ་ (Osaka) ནང་གསར་བཙུགས་གནང་པའི་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་ཨེ་རི་ས་ཝ་ཡུ་མ་ (Arisawa Yuma) ལགས་དང་མཇལ་འཕྲད་ཞུས་གནང་ཡོད། ལྕམ་སྐུ་ཨེ་རི་ས་ཝ་ཡུ་མ་ལགས་ཉི་ཧོང་སྐུ་ཚབ་དོན་གཅོད་ཁང་དུ་ཕེབས་ཏེ་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་ཐུག་འཕྲད་ཀྱིས་འདི་ལོའི་ཕྱི་ཟླ་ ༥ ནང་ཨོ་སཱ་ཀ་ས་གནས་ཀྱི་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བའི་སྐོར་དང་། སྐུ་ཞབས་ཊ་གུ་ཆི་ཡུ་ཞི་ནོ་རི་ (Taguchi Yoshinori) ལགས་ཨོ་སཱ་ཀ་ས་གནས་ཀྱི་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་། ལྕམ་སྐུ་ཨེ་རི་ས་ཝ་ཡུ་མ་ཚོགས་གཞོན་དུ་བདམས་ཐོན་བྱུང་ཡོད་སྐོར་གསུངས་ཡོད།

སྐབས་དེར་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལྕམ་སྐུ་ཨེ་རི་ས་ཝ་ཡུ་མ་ལགས་ཀྱིས་གཙོས་ས་གནས་གྲོས་ཚོགས་འཐུས་མི་རྣམ་པས་བོད་དོན་སྐོར་དོ་སྣང་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་ཡོད། གཞན་ཡང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལྕམ་སྐུ་ཨེ་རི་ས་ཝ་ཡུ་མ་ལགས་ལ་བོད་ནང་གི་ད་ལྟའི་གནས་སྟངས་དང་། བཙན་བྱོལ་བོད་མིའི་གནས་སྟངས། དེ་བཞིན་བོད་མིའི་སྒྲིག་འཛུགས་སོགས་ཀྱི་སྐོར་ངོ་སྤྲོད་གནང་ཡོད།ལྕམ་སྐུ་ཨེ་རི་ས་ཝ་ཡུ་མ་ལགས་ཀྱིས་ཉི་ཧོང་སྐུ་ཚབ་དོན་གཅོད་ཁང་གི་ལས་བྱེད་རྣམས་དང་ཐུག་འཕྲད་བྱུང་བར་དགའ་ཚོར་སྐྱེས་པའི་སྐོར་དང་། བོད་མིའི་བདེན་པའི་འཐབ་རྩོད་ནི་ཧ་ཅང་གལ་འགངས་ཆེན་པོ་ཡིན་པ། སྤྱི་ནོར་༸གོང་༸སྐྱབས་མགོན་ཆེན་པོ་མཆོག་གིས་བོད་རྒྱའི་དཀའ་རྙོག་གྲོས་མོལ་གྱི་ལམ་ནས་སེལ་ཐབས་མཛད་བཞིན་པར་རྗེས་སུ་ཡི་རང་ཞུས་གནང་བ་མ་ཟད། བོད་རྒྱའི་དཀའ་རྙོག་ཞི་བའི་ལམ་ནས་སེལ་ཐབས་སུ་ཉི་ཧོང་ས་གནས་ཀྱི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ངོས་ནས་རྒྱབ་སྐྱོར་ཆ་ཚང་གནང་རྒྱུའི་ཆོད་སེམས་བརྟན་པོ་ཡོད་ཅེས་གསུངས་ཡོད་པ་བཅས།།