༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྦེལ་ཀོབ་འཚོ་བྱེད་ཁང་གསར་སྨན་ཁང་གི་འགན་འཛིན་ཟུར་པ་ལྷག་པ་ཚེ་རིང་ལ་ལྐོག་ཟ་རུལ་སུངས་དང་འབྲེལ་བའི་དོན་ཚན་དགུ་ཅན་གྱི་ཉེས་འཛུགས་ཞུ་སྙན་ཞིག་ཕྱི་ལོ་ ༢༠༡༤ ཟླ་ ༢ ཚེས་ ༢༤ འཁོད་བྱུང་ཡོད་པ་ལྟར། སྐབས་ ༡༤ པའི་བཀའ་ཤག་ནས་ཞིབ་འཇུག་ཚོགས་ཆུང་ཟུར་འཛུགས་བརྒྱུད་ཐག་གཅོད་བཅད་ཁྲ་བསྩལ་བའི་འབྲུ་དོན་ལ་འགན་འཛིན་ཟུར་པ་ལྷག་པ་ཚེ་རིང་ནས་གློག་ཆས་ཉོ་སྒྲུབ་སོགས་ཀྱི་ཐོག་ནས་སྤྱི་གུན་བཏང་བ་བསྡོམས་ཧིན་སྒོར་ ༣༠༤༨༣༠།༠༠ ཐམ་པ་དུས་བཀག་ནང་ཚུད་སྨན་ཁང་ལ་ཕྱིར་སློག་མ་བྱུང་ཚེ་སྤྱི་དངུལ་སྒེར་ཟས་དང་འབྲེལ་བའི་གསལ་བསྒྲགས་བྱ་རྒྱུ་དང༌། བོད་མིའི་སྒྲིག་འཛུགས་ནས་བོད་མི་སྤྱི་འགྲེ་ལྟར་ཕན་གྲོགས་ལྟ་སྐྱོང་བྱ་སྒོ་ཡོངས་རྫོགས་བཀག་བསྐྱིལ་བྱ་རྒྱུ་ཡིན་པ་བཅད་ཁྲའི་ནང་གསལ་ཡོད་ཀྱང་དོ་བདག་ནས་དུས་བཀག་ནང་ཚུད་དངུལ་འབོར་ཕྱིར་སློག་བྱས་མེད་པར་བརྟེན། ཕྱི་ལོ་ ༢༠༡༥ ཟླ་ ༨ ཚེས་ ༥ འཁོད་བཙན་བྱོལ་བོད་མིའི་བཅའ་ཁྲིམས་དང་། བོད་མིའི་སྒྲིག་འཛུགས་ཀྱི་སྒྲིག་གཞི་ཁག་ལ་སྣང་ཆུང་རྩིས་མེད་བཏང་བ་ཡིན་པས། བཅད་ཁྲའི་དགོངས་དོན་ལྟར་སྤྱི་དངུལ་སྒེར་ཟས་བྱས་པར་ངོས་འཛིན་དང་འབྲེལ་གོང་ཚེས་ནས་བཟུང་སྦེལ་ཀོབ་འཚོ་བྱེད་སྨན་ཁང་གི་འགན་འཛིན་ཟུར་པ་ལྷག་པ་ཚེ་རིང་ལ་བོད་མིའི་སྒྲིག་འཛུགས་ནས་བོད་མི་སྤྱི་འགྲེ་ལྟར་ཕན་གྲོགས་ལྟ་སྐྱོང་བྱ་སྒོ་ཡོངས་རྫོགས་བཀག་བསྐྱིལ་བྱས་པའི་གསལ་བསྒྲགས་སོང་ཡོད་པ་དེ་ལྟར་ཡང་།
ལྷག་པ་ཚེ་རིང་ནས་ཕྱི་ལོ་ ༢༠༢༡ ཟླ་ ༡༢ ཚེས་ ༡༥ འཁོད་སྐབས་ ༡༦ པའི་བཀའ་ཤག་ལ་བདེ་སྡུག་ཞུ་སྙན་ཕུལ་དོན་དུ་སྤྱི་དངུལ་སྒེར་ཟས་ཀྱི་ཉེས་ཆད་ལས་གྲོལ་ཕྱིར་དངུལ་འབོར་ཕྱིར་སློག་ཞུ་ཆོག་པ་ཞུས་དོན་བཞིན་བཀའ་འཁྲོལ་བསྩལ་བ་ལྟར་སྤྱི་གུན་བཏང་བ་བསྡོམས་ཧིན་སྒོར་ ༣༠༤༨༣༠།༠༠ ཐམ་པ་བཅད་ཁྲའི་དགོངས་དོན་ལྟར་ཕྱིར་སློག་བྱས་ཟིན་པར་སོང་། དེ་སྔ་བོད་མི་སྤྱི་འགྲེ་ལྟར་ཕན་གྲོགས་ལྟ་སྐྱོང་བྱ་སྒོ་ཡོངས་རྫོགས་བཀག་བསྐྱིལ་བྱས་པ་དེ་བཞིན་ཕྱིར་འཐེན་གྱིས་ད་ནས་བཟུང་བོད་མི་སྤྱི་མཚུངས་ལྟར་ཕན་གྲོགས་ལྟ་སྐྱོང་མཐུན་འགྱུར་ཞུ་སྤྲོད་ཆོག་རྒྱུའི་གསལ་བསྒྲགས་སུ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༢༢ ཟླ་ ༨ ཚེས་ ༦ ལ།། །།
