༄༅། །བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་གོ་སྒྲིག་འོག་ཕྱི་ལོ་ ༢༠༢༢ ཟླ་ ༨ ཚེས་ ༡༦ ཉིན་དབུ་བཙུགས་ཀྱིས་ཉིན་གྲངས་གསུམ་རིང་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་གཉིས་སྨན་དབུ་མའི་ལམ་གྱི་སྲིད་བྱུས་སྐོར་ཟབ་ཁྲིད་པའི་ཟབ་སྦྱོང་ཚོགས་ཏེ་ཕྱི་ཚེས་ ༡༨ མཇུག་སྡོམ་མཛད་སྒོ་ཚོགས་གནང་ཡོད།

ཉིན་གྲངས་གསུམ་རིང་གི་ཟབ་ཁྲིད་པའི་ཟབ་སྦྱོང་ནང་ཕྱི་དྲིལ་ལས་ཁུངས་ཀྱི་ལས་བྱེད་ཁག་གཅིག་དང་། དེ་བཞིན་གཞུང་ཁོངས་མིན་པའི་ཚོགས་པ་སྟེ་བོད་ཀྱི་བུད་མེད་ལྷན་ཚོགས་དང་། བོད་ཀྱི་དགུ་བཅུ་གསུམ་ལས་འགུལ་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ཁང་། འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་། བོད་མིའི་གཏམ་རྒྱུད་བཅས་ཀྱི་སྐུ་ཚབ་རྣམས་མཉམ་ཞུགས་གནང་ཡོད།དེ་ཡང་ཉིན་གྲངས་གསུམ་རིང་གི་ཟབ་ཁྲིད་པའི་ཟབ་སྦྱོང་མཇུག་སྡོམ་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་མགྲིན་ཚབ་པ་དང་ཕྱི་དྲིལ་ལས་ཁུངས་ཀྱི་དྲུང་འཕར་བསྟན་འཛིན་ལེགས་བཤད་ལགས་ཀྱིས། གཉིས་སྨན་དབུ་མའི་ལམ་གྱི་སྲིད་བྱུས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བླ་ན་མེད་པའི་ལམ་སྟོན་འོག་བོད་མིའི་སྒྲིག་འཛུགས་ཀྱི་བཀའ་ཤག་དང་། བོད་མི་མང་སྤྱི་འཐུས་ལྷན་ཚོགས། གཞིས་བྱེས་བོད་མི་མང་ཚོགས་ཀྱིས་བཀའ་བསྡུར་རིམ་པ་གནང་རྗེས་གཏན་ལ་ཕབ་པའི་བོད་མིའི་སྒྲིག་འཛུགས་ཀྱི་སྲིད་བྱུས་ཤིག་ཡིན་ཞིང་། བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་བརྒྱུད་ཆོལ་གསུམ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཞིག་ཡོང་ཐབས་གནང་དང་གནང་མུས་ཡིན། ཞེས་དང་། ཟབ་སྦྱོང་འདི་ནི་གཙོ་བོ་འགོ་ཁྲིད་དང་ལས་འགུལ་བ་རྣམས་ལ་དམིགས་ཏེ་གོ་སྒྲིག་གནང་བ་ཞིག་ཡིན་སྟབས་རྣམ་པ་ཚོས་བོད་རྒྱའི་དཀའ་རྙོག་སེལ་ཐབས་སུ་འགན་མང་ཙམ་འཁུར་རོགས་གནང་། ཞེས་གསུངས།ཟབ་ཁྲིད་པ་ལྕམ་སྐུ་ཀཱ་ཝི་ཏཱ་ཨ་རོ་རཱ་ (Kavita Arora) ལགས་དང་ལྕམ་སྐུ་ཇའི་མཱ་ལ་ཨི་ཡར་ (Jaimala Iyer) ལགས་ཀྱིས་འབྲེལ་མོལ་གནང་སྟངས་སྐོར་ལའང་ཟབ་ཁྲིད་གནང་ཡོད། མཇུག་སྡོམ་མཛད་སྒོར་མཉམ་ཞུགས་པ་ཁག་གཅིག་གིས་ལེགས་སྤེལ་ཉེས་འགོག་གི་དགོངས་ཚུལ་གསུང་སྐབས་ཐེངས་འདིའི་ཟབ་སྦྱོང་བརྒྱུད་ནས་གོ་རྟོགས་དང་བློ་སྐྱེད་ཆེན་པོ་ཐོབ་ཡོད་སྐོར་སོགས་གསུངས་ཡོད་པ་བཅས།།