༄༅། །ཕྱི་ལོ་ ༢༠༢༢ ཟླ་ ༨ ཚེས་ ༡༦ ཉིན་གྱི་སྔ་དྲོ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་གོ་སྒྲིག་འོག་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་གཉིས་སྨན་དབུ་མའི་ལམ་གྱི་སྲིད་བྱུས་སྐོར་ཟབ་ཁྲིད་པའི་ཟབ་སྦྱོང་དབུ་འབྱེད་མཛད་སྒོ་ཚོགས་སོང་།

དེ་ཡང་ཉིན་གྲངས་གསུམ་རིང་གི་ཟབ་ཁྲིད་པའི་ཟབ་སྦྱོང་དབུ་འབྱེད་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་མགྲིན་ཚབ་པ་དང་ཕྱི་དྲིལ་ལས་ཁུངས་ཀྱི་དྲུང་འཕར་བསྟན་འཛིན་ལེགས་བཤད་ལགས་དང་། ཟབ་ཁྲིད་པ་ལྕམ་སྐུ་ཀཱ་ཝི་ཏཱ་ཨ་རོ་རས྄་ (Kavita Arora) ལགས་དང་ལྕམ་སྐུ་ཇཱ་ཡ་(Jaya) ལགས། དེ་བཞིན་ཕྱི་དྲིལ་ལས་ཁུངས་ཀྱི་ལས་བྱེད་ཁག་གཅིག་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་བཅས་ཁྱོན་བསྡོམས་ཟབ་སྦྱོང་ནང་ཉམས་ཞུགས་པ་མི་གྲངས་ ༡༧ ཕེབས་ཡོད། དེ་ཡང་ཕྱི་དྲིལ་ལས་ཁུངས་ཀྱི་དྲུང་འཕར་བསྟན་འཛིན་ལེགས་བཤད་ལགས་ཀྱིས་གཉིས་སྨན་དབུ་མའི་ལམ་གྱི་སྲིད་བྱུས་ནི། བོད་མི་མང་སྤྱི་འཐུས་ལྷན་ཚོགས་ནས་གཏན་ལ་ཕབ་པའི་སྲིད་བྱུས་ཤིག་ཆགས་ཡོད་པ་དང་། ད་ལྟའི་ཆར་བོད་ནང་གི་གནས་སྟངས་ཛ་དྲག་ཏུ་ཕྱིན་ཡོད་པ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གྲ་སྒྲིག་སྡུག་ས་ནས་བྱེད་དགོས་པ་དང་། རེ་བ་བཟང་ས་ནས་རྒྱག་དགོས་ཞེས་བཀའ་སློབ་རིམ་པ་ཕེབས་པ་ལྟར་ང་ཚོས་གྲ་སྒྲིག་སྡུག་ས་ནས་བྱེད་དགོས། ཞེས་དང་། 

ཞི་ཅིན་ཕིང་གིས་རྒྱ་ནག་གི་སྲིད་འཛིན་ཐེངས་གསུམ་བསྟུད་མ་བྱ་འདོད་ཡོད་པ། མཉམ་ཞུགས་པ་ཡོངས་ནས་ཉིན་གྲངས་གསུམ་རིང་གི་ཟབ་སྦྱོང་སྐབས་ཁ་གཡེང་མིག་གཡེང་བྱས་ནས་མ་བསྡད་པར་གཉིས་སྨན་དབུ་མའི་ལམ་གྱི་སྲིད་བྱུས་སྐོར་དོ་སྣང་གནང་སྟེ་མང་ཚོགས་ལ་འགྲེལ་བཤད་བརྒྱག་ཐུབ་དགོས་པ་དང་། དེ་དང་འབྲེལ་ནས་མ་འོངས་པར་ཡར་རྒྱས་གཏང་དགོས་པའི་རིགས་གང་ཡོད་ལེགས་སྤེལ་ཉེས་འགོག་གི་དགོངས་ཚུལ་གསུང་རོགས་གནང་ཞེས་སོགས་ཀྱི་གསུང་བཤད་གནང་ཡོད།

ཟབ་ཁྲིད་པའི་ཟབ་སྦྱོང་དེ་བཞིན་ཕྱི་ལོ་ ༢༠༢༢ ཟླ་ ༨ ཚེས་ ༡༦ ཉིན་དབུ་བཙུགས་ཀྱིས་ཕྱི་ཚེས་ ༡༨ བར་ཉིན་གྲངས་གསུམ་རིང་འཚོག་གཏན་ཁེལ་ཡོད། ཉིན་གྲངས་གསུམ་རིང་གི་ཟབ་སྦྱོང་གི་ཆེད་དུ་ཨ་རིའི་རོགས་ཚོགས་ (NDI and USAID) གཉིས་ནས་མཐུན་འགྱུར་གནང་ཡོད་པ་བཅས།།