༄༅། །གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་དང་། ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་རྣམ་གཉིས་ཨིན་ཡུལ་གྱི་རྒྱལ་ས་ལོན་ཌོན་དུ་ཕེབས་འབྱོར་གྱིས་ཨིན་ཡུལ་གྱི་གྲོས་ཚོགས་ཁང་དུ་དཔེ་དེབ་དབུ་འབྱེད་དང་། ཨིན་ཡུལ་གྱི་གྲོས་ཚོགས་འཐུས་མི་དང་མཇལ་འཕྲད། དེ་བཞིན་ས་གནས་སུ་བོད་བརྒྱུད་ནང་བསྟན་ཆོས་ཚོགས་ཁག་དུ་འཚམས་གཟིགས། ས་གནས་བོད་རིགས་མང་ཚོགས་ལ་གཏམ་བཤད་གནང་རྒྱུ་ཡིན་པ་མ་ཟད། གསར་འགོད་པ་སོགས་ལ་བོད་ནང་གི་ཆོས་དད་རང་དབང་དང་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼ དགེ་འདུན་ཆོས་ཀྱི་ཉི་མ། ༽ མཆོག་གིས་དབུས་བོད་ཀྱི་ཆབ་སྲིད་བཙོན་པ་རྣམས་ཀྱི་སྐོར་གོ་རྟོགས་སྤེལ་གཏན་ཁེལ་ཡོད།
གཞན་ཡང་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་གིས་ཨིན་ཡུལ་དུ་ཡོད་པའི་བོད་མི་རྣམས་ལ་དབང་གནང་རྒྱུ་ཡིན་ཞིང་། ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་བཀའ་ཤག་སྐབས་བཅུ་དྲུག་པའི་ལས་གཞི་གསར་པ་བོད་དོན་ཞུ་གཏུག་གི་ལས་འགུལ་སྐོར་ས་གནས་བོད་རིགས་གཞོས་སྐྱེས་གཙོ་བོར་གྱུར་པའི་མང་ཚོགས་ལ་ངོ་སྤྲོད་གསུང་བཤད་གནང་གཏན་ཁེལ་ཡོད་པ་བཅས།།