༄༅། །གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཐུན་མོང་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གིས་དབུས་བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་འཐོབ་ཆེད་ཨིན་ཡུལ་གྱི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་ཀྱིས་ཉིན་གྲངས་བཞིའི་རིང་ཞུ་གཏུག་ལས་འགུལ་སྤེལ་ཏེ་ཕྱི་ལོ་ ༢༠༢༢ ཟླ་ ༧ ཚེས་ ༢༡ ཉིན་མཇུག་སྒྲིལ་གནང་ཡོད། ཨིན་ཡུལ་གྱི་གྲོས་ཚོགས་འཐུས་མི་རྣམ་པས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གློད་བཀྲོལ་འཐོབ་ཐབས་སུ་ཨིན་ཡུལ་གྱི་གྲོས་ཚོགས་ནང་སྡིངས་ཆ་འདྲ་མིན་བརྒྱུད་གླེང་སློང་གནང་རྒྱུའི་ཞལ་བཞེས་གནང་ཡོད།
གཞན་ཡང་ཨིན་ཡུལ་གྱི་གྲོས་ཚོགས་ནང་ཕྱི་ཚེས་ ༢༠ ཉིན་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་ཨིན་ཡུལ་གྱི་གྲོས་ཚོགས་ནང་རྐུ་ལ་ཤོར་བའི་བོད་ཀྱི་བྱིས་པ། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གི་མཛད་རྣམ་རྗེས་དྲན་ཞེས་པའི་དཔེ་དེབ་དབུ་འབྱེད་གནང་ཡོད་པ་དང་། སྐབས་དེར་གཟིག་རྒྱབ་རིན་པོ་ཆེ་མཆོག་གིས་ཕྱི་ལོ་ ༢༠༢༡ ཟླ་ ༡༡ ནས་བཟུང་ཕྱི་རྒྱལ་ཡུལ་གྲུ་ཁག་ཏུ་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གློད་བཀྲོལ་འཐོབ་ཐབས་སུ་ཞུ་གཏུག་ལས་འགུལ་སྤེལ་དང་སྤེལ་བཞིན་པའི་སྐོར་དང་། དེ་བཞིན་ཞུ་ཡིག་དོན་ཚན་ལྔའི་སྐོར་འགྲེལ་བརྗོད་གནང་ཡོད། ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་རྐུ་ལ་ཤོར་བའི་བོད་ཀྱི་བྱིས་པ། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གི་མཛད་རྣམ་རྗེས་དྲན་ཞེས་པའི་དཔེ་དེབ་རེ་ཕུལ་གནང་ཡོད།
ཕྱི་ཚེས་ ༢༡ ཉིན་གྱི་སྔ་དྲོ་གཟིག་རྒྱབ་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་ཨིན་ཡུལ་རྒྱལ་ཡོངས་ཆབ་སྲིད་གྲོས་ཚོགས་ཀྱི་ཆོས་དད་རང་དབང་ཚོགས་པའི་ཚོགས་གཙོ་ཇིམ་ཞན་ནོན་ (Jim Shannon) མཆོག་ལ་ཞུ་ཡིག་དོན་ཚན་ལྔའི་སྐོར་སྤྱན་བསྟར་ཞུས་གནང་ཡོད་པ་དང་། སྐབས་དེར་ནང་པའི་མཐུན་ཚོགས་ཀྱི་ཚོགས་གཙོ་ཌེ་སི་མོན་ཌི་བྷི་ཌུལ་ཕི་ (Dr Desmond Biddulph) ལགས་ཀྱང་མཉམ་ཞུགས་གནང་ཡོད།
ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་ས་གནས་བོད་རིགས་གཞོན་སྐྱེས་རྣམས་ལ་བཀའ་ཤག་སྐབས་དྲུག་པའི་ལས་གཞི་གསར་པ་བོད་དོན་ཞུ་གཏུག་ལས་འགུལ་སྐོར་ངོ་སྤྲོད་དང་། དེ་བཞིན་གཟིག་རྒྱབ་རིན་པོ་ཆེ་མཆོག་གིས་ས་གནས་བོད་རིགས་གཞོན་སྐྱེས་རྣམས་ལ་བོད་དོན་སྐོར་གསུང་བཤད་ལམ་སྟོན་གཟབ་རྒྱས་གནང་བ་མ་ཟད། ས་གནས་ནང་པའི་མཐུན་ཚོགས་ཀྱི་བཅར་འདྲིར་དང་ལེན་གནང་ཡོད། སླེ་ལུང་ཆོས་འཁོར་གླིང་དུ་སླེ་ལུང་རིན་པོ་ཆེ་མཆོག་གིས་གཟིག་རྒྱབ་རིན་པོ་ཆེ་མཆོག་གིས་དབུས་པའི་ཁོང་གི་ཕྱག་རོགས་རྣམས་ལ་དགོང་དྲོའི་གསོལ་ཚིགས་གོ་སྒྲིག་གནང་ཡོད་པ་བཅས།།
