༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐུགས་ཉེ་བའི་མཛའ་གྲོགས་དང་རྒྱལ་སྤྱིའི་བོད་དོན་ལས་འགུལ་ཁང་གི་འཛིན་སྐྱོང་ལྷན་ཚོགས་ཀྱི་ཚོགས་གཙོ་སྐུ་ཞབས་རི་ཅཊ་གྷི་རི་ལགས་ཀྱིས་གངས་སྐྱིད་སྲིད་སྐྱོང་ཚོགས་ཁང་དུ་བོད་མའི་སྒྲིག་འཛུགས་ཀྱི་མཛད་གཙོ་རྣམ་པ་གཙོས་ལས་ཁུངས་ཁག་གི་དྲུང་ཆེ་ཆུང་དང་སྲི་ཞུའི་ལས་བྱེད་རྣམས་ལ་བོད་དོན་སྐོར་གསུང་བཤད་གནང་ཡོད།སྐབས་དེར་རི་ཅཊ་གྷི་རི་ལགས་ཀྱིས་ལོ་ངོ་བཞི་བཅུའི་སྔོན་བོད་དོན་དང་ཐོག་མར་འབྲེལ་བ་བྱུང་ཚུལ་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐོག་མར་མཇལ་འཕྲད་བྱུང་ཚུལ། རྗེས་སོར་བོད་དོན་དང་ཐད་ཀར་འབྲེལ་བ་བྱུང་ནས་བོད་དོན་ཐོག་ཞོགས་འདེགས་སྒྲུབ་ཚུལ། ཨ་རིའི་གཞུང་ལ་བོད་དོན་དང་འབྲེལ་བའི་ཁྲིམས་ཡིག་གཏན་འབེབས་ཡོང་བར་ཞུ་གཏུག་གནང་བའི་སྐོར། སྐབས་དེའི་བཙན་བྱོལ་བོད་མིའི་གནས་བབ་སོགས་ཀྱི་ཐད་གསུང་བཤད་གནང་ཡོད།གཞན་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་འདྲི་གནང་དོན་ལྟར་ཁོང་སྒེར་ངོས་ནས་བོད་དོན་ཆེད་རྒྱལ་སྤྱིའི་སྡིངས་ཆ་ཆེ་ཁག་ཏུ་གླེང་སློང་དང་ཞུ་གཏུག་གནང་སྐོར་དང་། ཁོང་གི་མཚན་ཐོག་ཡོད་པའི་གྷེ་རི་ཐེབས་རྩ་ཁང་གི་དམིགས་ཡུལ་དང་ལས་དོན་གནང་ཕྱོགས་སོགས་ཀྱི་ཐད་གསལ་བཤད་གནང་ཡོད། 

བོད་དོན་རྒྱབ་སྐྱོར་བ་དང་ཨ་རིའི་གློག་བརྙན་འཁྲབ་སྟོན་པ་སྐུ་ཞབས་རི་ཅཊ་གྷི་རི་ལགས་ཀྱིས་འདས་པའི་ལོ་ངོ་བཅུ་ཕྲག་བཞི་ལྷག་ལ་རྒྱལ་སྤྱིའི་སྡིངས་ཆ་ཆེ་ཁག་ཏུ་བོད་དོན་གླེང་སློང་དང་། བོད་དོན་ལ་རྒྱབ་སྐྱོར་ཐོབ་ཐབས་སུ་ཞུ་གཏུག་གནང་རྒྱུ་མཚོན། བཙན་བྱོལ་བོད་མིར་ཁ་ཡོད་ལག་ཡོད་ཀྱིས་རྒྱབ་སྐྱོར་གཡོ་བ་མེད་པ་གནང་བར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་དང་འཛམ་གླིང་གང་སར་གནས་པའི་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ལེགས་གསོལ་མཚོན་ཆེད་དཀར་གཙང་མཇལ་དར་དང་བཅས་སྤྱན་རས་གཟིགས་ཀྱི་སྐུ་ཐང་ཞིག་ཕུལ་གནང་ཡོད་པ་བཅས།།