༄༅། །ཕྱི་ལོ་ ༢༠༢༢ ཟླ་ ༧ ཚེས་ ༡༣ ཉིན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་དང་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) མཆོག་གིས་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་གསར་པ་བཏོན་གནང་ཡོད་པ་དང་། ཁྲིམས་འཆར་དེའི་ནང་བོད་མིའི་རང་ཐག་རང་གཅོད་ལ་རྒྱབ་སྐྱོར་དང་། བོད་ཀྱི་དཀའ་རྙོག་ནི་ཁྲིམས་མཐུན་གྱི་གནས་བབ་ཐོག་ནས་ད་དུང་ཐག་གཅོད་བྱས་ཐུབ་མེད་པར་ངོས་འཛིན་བྱེད་ཀྱི་ཡོད་པ་འཁོད་ཡོད།
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་འདི་ལོའི་ཕྱི་ཟླ་ ༤ དང་ ༦ ནང་ཨ་རིའི་རྒྱལ་སར་ཆེད་ཕེབས་ཀྱིས་ཨ་རིའི་གནད་ཡོད་དཔོན་རིགས་ཁག་གཅིག་དང་མཇལ་འཕྲད་གནང་སྟེ་ཨ་རིའི་གཞུང་དང་གྲོས་ཚོགས་ཀྱི་ངོས་ནས་མུ་མཐུད་བོད་ཀྱི་བདེན་པའི་འཐབ་རྩོད་དང་བོད་རྒྱའི་དཀའ་རྙོག་ཞི་བའི་ལམ་ནས་སེལ་ཐབས་སུ་རྒྱ་ནག་གཞུང་དང་གྲོས་མོལ་བསྐྱར་གསོ་ཡོང་བར་རྒྱབ་སྐྱོར་གནང་དགོས་པའི་རེ་སྐུལ་ཤུགས་ཆེ་ཞུས་གནང་ཡོད་ལ། གཞན་ཡང་དཔལ་ལྡན་སྲིད་སྐྱོང་མཆོག་གིས། རྒྱ་ནག་གཞུང་གིས་བོད་ལ་དབང་བསྒྱུར་བྱེད་བཞིན་པ་དེར་ལོ་རྒྱུས་དང་རྒྱལ་སྤྱིའི་འབྲེལ་ལམ་ཐོག་ནས་རྒྱབ་སྐྱོར་བྱེད་ཀྱི་མེད་པའི་སྐོར་དང་། རྒྱ་ནག་གིས་ཅི་ཕྱིར་འཛམ་གླིང་གི་རྒྱལ་ཁབ་ཁག་ལ་བོད་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་རེད་ཅེས་བརྗོད་དུ་འཇུག་གི་ཡོད་དམ། རྒྱུ་མཚན་ནི། རྒྱ་ནག་གིས་བོད་ལ་དབང་བསྒྱུར་བྱེད་བཞིན་པ་དེ་ཁྲིམས་མཐུན་མིན་པར་བརྟེན་དེ་ལྟར་བྱེད་དུ་འཇུག་གི་ཡོད་ཅེས་གསུངས་ཡོད།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་དང་འབྲེལ་ནས་གསུང་དོན། བོད་མི་རྣམས་ལ་མི་ཀུན་དང་གཅིག་མཚུངས་ལྟར་རང་ཐག་རང་གཅོད་ཀྱི་ཐོབ་ཐང་དགོས་ཀྱི་ཡོད། རྒྱ་ནག་གཞུང་གིས་ལོ་ངོ་བཅུ་ཕྲག་མང་པོའི་རིང་ང་ཚོར་མནར་སྤྱོད་ཚད་ལས་བརྒལ་བ་བཏང་ཡོད་ཀྱང་ང་ཚོའི་ངོས་ནས་རྒྱུན་དུ་བོད་རྒྱའི་དཀའ་རྙོག་ཞི་བའི་ལམ་ནས་སེལ་ཐབས་བྱེད་ཀྱི་ཡོད། ཁྲིམས་འཆར་འདིས་ཨ་རིའི་གཞུང་གིས་ཛ་དྲག་གི་སྒོ་ནས་བོད་རྒྱའི་གྲོས་མོལ་བསྐྱར་གསོ་ཡོང་ཐབས་སུ་འབད་བརྩོན་གནང་བཞིན་པར་རྒྱབ་སྐྱོར་བྱེད་ཀྱི་ཡོད། ང་ཚོས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་དང་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) མཆོག་གིས་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་བཏོན་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་དེར་དགའ་བསུ་ཞུས་པ་དང་འབྲེལ་ང་ཚོ་བོད་མི་རྣམས་ཀྱིས་དུས་རྟག་ཏུ་ཨ་རིའི་གཞུང་གི་དབུ་ཁྲིད་རྣམ་པས་བོད་པས་འཚེ་མེད་ཞི་བའི་ལམ་ནས་བོད་རྒྱའི་དཀའ་རྙོག་སེལ་ཐབས་བྱས་དང་བྱེད་བཞིན་པར་རྒྱབ་སྐྱོར་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་དེས་ཨ་རི་གཞུང་གིས་འབྱུང་འགྱུར་བོད་རྒྱའི་དཀའ་རྙོག་སེལ་ཐབས་སུ་གླེང་སློང་ཤུགས་ཆེ་གནང་བར་རམ་འདེགས་བྱེད་ངེས་ཡིན། བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་འདིས་བོད་མིའི་བདེན་པའི་འཐབ་རྩོད་ལ་རམ་འདེགས་བྱེད་ཀྱི་ཡོད་པ་མ་ཟད། རྒྱལ་སྤྱིའི་མང་གཙོ་དང་། གྲོས་མོལ། ཞི་བདེ་བཅས་ལའང་རམ་འདེགས་བྱེད་ཀྱི་ཡོད། དེར་བརྟེན་ང་ཚོས་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་འདིར་ཨ་རིའི་གྲོས་ཚོགས་གོང་འོག་གཉིས་ཀྱི་ནང་རྒྱབ་སྐྱོར་འཐོབ་ཐབས་དང་། དེ་བཞིན་ཁྲིམས་འཆར་འདི་ཨ་རིའི་སྲིད་འཛིན་གྱི་ཅོག་ཙེ་སྟེང་དུ་བསླེབ་ཐབས་སུ་ནུས་པ་གང་ཡོད་ཀྱིས་འབད་བརྩོན་ཞུ་རྒྱུ་ཡིན། ཞེས་གསུངས།
སྤྱིར་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་དེའི་ནང་གཙོ་བོ་ཨ་རིའི་གཞུང་གིས་རྒྱལ་སྤྱིའི་ཁྲིམས་དོན་འོག་བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་དང་། བོད་རྒྱའི་དཀའ་རྙོག་ད་བར་སེལ་ཐུབ་མེད་སྟབས། དེ་སེལ་ཐབས་སུ་རྒྱབ་སྐྱོར་ཤུགས་ཆེ་གནང་ཐབས་སྐོར་དང་། རྒྱ་ནག་གཞུང་གིས་བོད་ཀྱི་ལོ་རྒྱུས་དང་། བོད་མི་མང་། ༧གོང་ས་ཏཱ་ལའི་བླ་མའི་སྒྲིག་འཛུགས་ཚུད་པའི་སྒྲིག་འཛུགས་གཞན་ཁག་གི་སྐོར་རྒྱལ་སྤྱིའི་སྟེང་འཁྱོག་བཤད་བྱས་དང་བྱེད་བཞིན་པའི་པར། དེའི་ཁ་གཏད་དུ་ཨ་རིའི་བོད་དོན་དམིགས་བསལ་འབྲེལ་མཐུད་པའི་ངོས་ནས་ཨ་རི་གཞུང་གི་བསྒྲགས་གཏམ་དང་གཞུང་འབྲེལ་ཡིག་ཆ་ཁག་གི་ནང་བོད་ཀྱི་དངོས་ཡོད་གནས་ཚུལ་འཁོད་དགོས་པ་མ་ཟད། ཨ་རིའི་གྲོས་ཚོགས་ལ་བོད་རྒྱའི་གྲོས་མོལ་དང་འབྲེལ་བའི་ལོ་འཁོར་སྙན་ཐོ་འབུལ་དགོས་པ་སོགས་ཀྱི་སྐོར་འཁོད་ཡོད་པ་བཅས།།
