༄༅། །ཕྱི་ལོ་ ༢༠༢༢ ཟླ་ ༧ ཚེས་ ༤ ནས་ ༡༡ བར་ཉིན་གྲངས་ ༧ རིང་སྦེལ་ཇམ་ཆོས་རིག་འཛིན་སྐྱོང་ཁང་གི་འཇམ་དབྱངས་བློ་འཕེལ་གཟའ་མཇུག་སློབ་གྲྭ་ནས་དབྱར་གསེང་གི་རིག་གཞུང་ཟབ་སྦྱོང་ཐེངས་ ༡༡ པ་དེ་བཞིན་སྦེལ་ཇམ་གྱི་ས་གནས་ (Florennes) ཞེས་པར་རྟེན་གཞི་བྱས་པའི་རྫོགས་ཆེན་ར་ཉག་པ་སྤྲུལ་རིན་པོ་ཆེ་མཆོག་གི་ཆོས་ཚོགས་ཆོས་ཀྱི་གྲོང་ཁྱེར། (Dharma City) ཞེས་པའི་ནང་བསྐོང་ཚོགས་གནང་ཡོད།

དེ་ཡང་ཕྱི་ཟླ་ ༧ ཚེས་ ༩ ཉིན་ཏེ་ཟབ་སྦྱོང་གི་ཉིན་དྲུག་པ་ཕ་མའི་ཉིན་མོ་ཞེས་པའི་མཛད་རིམ་གྱི་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་གྲུབ་བསྟུན་སྐུ་མགྲོན་རྣམ་པ་དང་དགེ་ལས་སློབ་ཕྲུག ཕ་མ་བཅས་ནས་རིམ་པས་མཇལ་དར་ཕུལ།

དེ་རྗེས་སྦེལ་ཇམ་ཆོས་རིག་འཛིན་སྐྱོང་ཁང་གི་འགན་འཛིན་འཇིགས་མེད་ལགས་ཀྱིས་ད་བར་དབྱར་གསེང་རིག་གཞུང་ཟབ་སྦྱོང་ཐེངས་ ༡༡ ཙམ་གོ་སྒྲིག་ཞུ་དགོས་པའི་དམིགས་ཡུལ་དང་རྒྱབ་ལྗོངས། དབྱར་གསེང་ཟབ་སྦྱོང་གི་བྱུང་སོང་རྩིས་ཁྲ་ཁག་སྙན་སྒྲོན་ཞུས་སོང་།

མཛད་སྒོའི་སྐུ་མགྲོན་གཙོ་བོ་སྦེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ཀྱིས་གསུང་དོན། དབྱར་གསེང་གི་རིག་གཞུང་ཟབ་སྦྱོང་འདི་ལྟ་བུ་བརྒྱུད་རང་རེའི་གཞོན་སྐྱེས་རྣམས་ལ་ནང་ཆོས་ངོ་སྤྲོད་དང་བོད་ཀྱི་ཞལ་ལག་བཟོ་སྟངས། བོད་ཀྱི་རྐང་བྲོ་གླུ་གཞས། སྙན་ཚིགས་གྱེར་འདོན་ལ་སོགས་ལས་རིམ་འདི་དག་བརྒྱུད་བོད་མི་རིགས་ཀྱི་གོམས་སྲོལ་བཟང་པོ་དེ་དག་ངོ་སྤྲོད་གང་ལེགས་ཡོང་ངེས་ལ་སོང་། དགེ་ལས་ཕ་མ་ཚང་མར་ཡི་རང་བསྔགས་བརྗོད་ཞུ་རྒྱུ་ཡིན་ཅེས་དང་།གཞན་ཡང་ཁོང་གིས་གཞོན་སྐྱེས་རྣམས་གནས་ཡུལ་རྒྱལ་ཁབ་ཀྱི་མི་སེར་ཆགས་ཡོད་ཀྱང་རང་ཉིད་ཀྱི་ཤ་ཁྲག་རུས་གསུམ་བོད་མི་ཡིན་པ་ནམ་ཡང་བརྗེད་ཐབས་མེད་པ་དང་། ང་ཚོའི་ཕྲག་པར་འོས་འགན་འཕར་མ་ཞིག་ཡོད་པ་ཡིད་ལ་དུས་ཀུན་དྲན་དགོས་པའི་རེ་སྐུལ་དང་བཅས་མཇུག་ཏུ་ཁོང་གིས་བསླབ་པ་མཐར་སོན་གྱི་སློབ་མ་ཁག་གཅིག་ལ་ལེགས་གསོལ་མཇལ་དར་དང་ཕྱག་རྟགས་ཕུལ་གྲུབ་བསྟུན་ས་ཁུལ་ཁག་དྲུག་ནས་ཕེབས་པའི་སློབ་མ་དང་ཕ་མ་རྣམས་ནས་གནས་སྣ་འཁྲབ་སྟོན་དང་སྙན་ངག་གྱེར་འདོན་ཁག་གཅིག་གཟིགས་འབུལ་ཞུས། དེ་རྗེས་དགེ་སློབ་ཚང་མས་སྒོར་གཞས་འཁྲབ་སྟེ་རེ་ཞིག་མཛད་སྒྲོ་གྲོལ་བ་བཅས། །