༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་བསྟན་སྐྱོང་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༠༧ ཚེས་ ༢༩ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཞི་བའི་ཚལ་གྱི་གསུང་ཆོས་ར་བར་དད་ལྡན་ཆོས་ཞུ་བ་སྟོང་ཚོར་སྤྱོད་འཇུག་ཆེན་མོའི་ཆོས་འབྲེལ་དང་ལྗགས་ལུང་སྩལ་ཏེ་ཉིན་གཉིས་ཀྱི་བཀའ་ཆོས་ལེགས་པར་མཇུག་སྒྲིལ་སོང་། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༠༨ ཙམ་ལ་མགོན་པོ་གང་ཉིད་མཆོག་ཞི་བའི་ཚལ་གྱི་གཟིམ་ཆུང་ནས་ཆིབས་འཁོར་བརྒྱུད་གསུང་ཆོས་ར་བར་ཆིབས་སྒྱུར་གྱིས་བཞུགས་ཁྲིར་འཁོད་མཚམས་ཞལ་འདོན་ཁག་གཅིག་གསུང་འདོན་གནང་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་མང་ཚོགས་ལ་བཀའ་སློབ་སྩལ་དོན། ཆོས་བཤད་ཁ་སང་ཚར་བ་རེད། དེ་རིང་སྤྱོད་འཇུག་དལ་པོ་བྱས་ཏེ་ཀློག་གི་ཡིན། ང་ཚོར་དལ་བརྒྱད་འབྱོར་བཅུ་ཚང་བའི་མི་ལུས་བཟང་པོ་ཞིག་ཐོབ་ཡོད་པ་འདི་འཆི་བར་ངེས། ནམ་འཆི་ངེས་མེད་ཡིན་སྟབས། ཉིན་རེ་བཞིན་དུ་དལ་འབྱོར་གྱི་ལུས་རྟེན་འདིའི་ཐོག་ནས་སྙིང་པོ་ལོན་ཐབས་བྱ་རྒྱུ་དེ་ཧ་ཅང་གལ་ཆེན་པོ་རེད། ང་ཚོ་བོད་གངས་ཅན་གྱི་ལྗོངས་དང་ཧི་མ་ལ་ཡའི་རི་རྒྱུད་ལ་གནས་སྡོད་བྱེད་མཁན་ཁྱེད་རང་ཚོ་ཚང་མས་ཆུང་དུས་སྐབས་ནས་མ་ཎི་དང་སྒྲོལ་མའི་གཟུངས་སྔགས་བགྲང་གི་ཡོད།  གང་ལྟར་ང་ཚོར་ཚེ་རབས་ནས་ཚེ་རབས་ལས་བཟང་པོའི་བག་ཆགས་ཡོད་པ་ཚེ་འདི་ལ་སངས་རྒྱས་དཀོན་མཆོག་དང་། ཆོས་དཀོན་མཆོག དགེ་འདུན་དཀོན་མཆོག་གསུམ་ལ་སྐྱབས་སུ་འགྲོ་བའི་ཐོག་ནས་རྣམ་མཁྱེན་རྒྱལ་བའི་གོ་འཕང་འཐོབ་རྒྱུར་དམིགས་དགོས། ཆོས་དཀོན་མཆོག་ཅེས་པ་དེ་རང་རྒྱུད་ལ་སྐྱེས་པའི་ཐོག་ནས་འགྲོ་དགོས་པ་ཡིན། དེར་བརྟེན་ཤེས་རབ་སྙིང་པོའི་ནང་། ག་ཏེ་ག་ཏེ་པཱ་ར་ག་ཏེ་པཱ་ར་ས‌མ་ག་ཏེ་བོ་དྷི་སྭ་ཧཱ་ཞེས་གསུངས་ཡོད་པ་ལྟར། ལམ་རིམ་གྱིས་བསྒོམས་ནས་ང་ཚོར་མི་ལུས་བཟང་པོ་ཐོབ་པ་འདིའི་ཐོག་ནས་རྣམ་མཁྱེན་རྒྱལ་བའི་གོ་འཕང་འཐོབ་རྒྱུ་དམིགས་ཡུལ་ལ་བཞག་དགོས། དེ་འདྲ་བྱུང་ན་དལ་འབྱོར་དོན་དང་ལྡན་པའི་ཐོག་ལ་སེམས་སྐྱིད་པ། ལུས་བདེ་བ། ཀུན་དང་མཐུན་པ་ཡོང་ཐུབ། དེའི་སྙིང་པོ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམས་ན་ད་ལྟ་ཡིན་ནའང་སེམས་སྐྱིད་པ། ཀུན་དང་མཐུན་པ་ཡོང་ཞིང་། དེ་འདྲའི་ཐོག་ནས་ས་ལམ་རིམ་གྱིས་བགྲོད་ནས་མཐར་མངོན་པར་རྫོགས་པ་སངས་རྒྱས་པའི་གོ་འཕང་འཐོབ་རྒྱུའི་དམིགས་ཡུལ་བཟུང་དགོས།དེ་ཡང་། རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་གྱིས།། ཞེས་གསུངས་པ་ལྟར་རང་དོན་བསྒྲུབ་ནའང་བྱང་ཆུབ་སེམས་དང་། གཞན་དོན་བསྒྲུབ་ནའང་བྱང་ཆུབ་ཀྱི་སེམས། ཕྲལ་དུ་བདེའང་བྱང་ཆུབ་ཀྱི་སེམས། ཕུགས་ལ་ཕན་པའང་བྱང་ཆུབ་སེམས་ཡིན་དུས་བྱང་ཆུབ་སེམས་ཞེས་པ་འདི་ཧ་ཅང་ཕན་ཐོགས་ཆེན་པོ་རེད་འདུག ང་རང་ཚོ་བོད་གངས་ཅན་གྱི་ལྗོངས་ལ་དཔལ་ནཱ་ལེནྡྲའི་ཆོས་བརྒྱུད་དར་ནས་བྱང་ཆུབ་ཀྱི་སེམས་ཞེས་པ་འདི་ཚང་མས་གོ་ཡོད་པ་དང་སྨོན་ལམ་རྒྱག་གི་ཡོད། དེ་ལྟ་བུའི་བྱང་ཆུབ་ཀྱི་སེམས་སྟོན་པའི་བསྟན་བཅོས་ཀྱི་ནང་ནས་མཆོག་ཏུ་གྱུར་བ་ཞིག་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་རེད་འདུག ཅེས་དང་།དེ་བཞིན་མུ་མཐུད་ནས་མགོན་པོ་གང་ཉིད་མཆོག་གིས། བོད་གངས་ཅན་གྱི་ལྗོངས་ཀྱི་བོད་མི་ཚང་མས་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་ཞེས་པར་དོ་སྣང་དང་སྨོན་ལམ་རྒྱག་གི་ཡོད། དེ་བཞིན་ཧི་མ་ལ་ཡ་རི་རྒྱུད་ཀྱི་ཆོས་གྲོགས་ཚོའང་དེ་དེ་བཞིན་དུ་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་ཚིག་ཙམ་ལས་མ་བྱུང་ནའང་དེར་རྒྱུས་ཡོད་པ་མ་ཟད་སེམས་ཐག་ཉེ་པོ་བྱེད་ཀྱི་ཡོད། ང་ཚོ་སྐལ་བ་བཟང་པོ་རེད། དེ་རིང་སྤྱོད་འཇུག་གི་བཤད་ལུང་ཞུ་གི་རེད་ལ། གང་ལྟར་སངས་རྒྱས་ཆོས་ཚོགས་མ་ལྟ་བུའི་སྟེང་ནས་ཉིན་རེ་བཞིན་དུ་ཁྱེད་ཚོས་བྱང་ཆུབ་ཀྱི་སེམས་ཞེས་པར་བསམ་བློ་གཏོང་དགོས། ངོས་ལ་མཚོན་ནའང་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་གི་ཡོད། འདི་ང་ཚོར་དལ་འབྱོར་ཐོབ་པ་དོན་དང་ལྡན་པ་བྱ་རྒྱུའི་ཐབས་ཤེས་ཡག་ཤོས་རེད། ཅེས་སོགས་ཀྱི་བཀའ་སློབ་སྩལ་ཏེ་ཉིན་དང་པོའི་ཆོས་འབྲེལ་གྱི་འཕྲོ་མཇུག་ལེའུ་གཉིས་པ་ནས་ལེའུ་མཐའ་མ་ཤེས་རབ་ཀྱི་ལེའུ་བར་ཆོས་འབྲེལ་དང་བཅས་ལྗགས་ལུང་སྩལ་སོང་། 

སང་ཉིན་ཕྱི་ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་ཆོས་ཞུ་བ་རྣམས་ལ་འཕགས་མཆོག་ཐུགས་རྗེ་ཆེན་པོའི་བཀའ་དབང་སྩལ་རྒྱུ་ཡིན་པ་དང་། དེ་རྗེས་ལ་དྭགས་ནང་པའི་ཚོགས་འདུ་དང་། ལ་དྭགས་དགོན་ཚོགས་གཉིས་ནས་མགོན་པོ་གང་ཉིད་མཆོག་ལ་བརྟན་ཞུགས་བསྟར་འབུལ་ཞུ་རྒྱུ་ཡིན་འདུག་པ་བཅས།།