༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཞི་བ་ཚལ་ཕོ་བྲང་ནས་ཕྱི་ལོ་ ༢༠༢༢ ཟླ་ ༧ ཚེས་ ༢༦ ཉིན་བྱང་ཨཱ་ཡར་ལེནྜའི་སྲིད་བློན་ཐེངས་དང་པོ་དང་ནོ་བེལ་ཞི་བདེའི་གཟེངས་རྟགས་བཞེས་གནང་མྱོང་མཁན་སྐུ་ཞབས་ཌེ་ཝི་ཌི་ཊི་རིམ་བྷེལ་ (Lord David Trimble) མཆོག་ཕྱི་ལོ་ ༢༠༢༢ ཟླ་ ༧ ཚེས་ ༢༥ ཉིན་སྙུང་གཞི་རྐྱེན་པས་དགུང་གྲངས་ ༧༧ ཐོག་སྐུ་ཚེའི་འཕེན་པ་རྫོགས་པར་ཐུགས་ཕམ་དང་སྦྲགས་དམ་པ་དེ་ཉིད་ཀྱི་བཟའ་ཟླར་ཐུགས་གསོའི་གསུང་འཕྲིན་སྩལ་བའི་ནང་འཁོད་དོན། ཡིད་སྐྱོ་བའི་སྐབས་འདིར་ངོས་ཀྱིས་དམ་པ་དེ་ཉིད་ལ་བསྔོ་བ་སྨོན་ལམ་དང་། ཉིད་ཀྱིས་གཙོས་ནང་མི་ལྷན་རྒྱས་ལ་ཐུགས་གསོ་ཞུ་རྒྱུ་ཡིན།
ཉིད་ཀྱི་སྐུ་ཟླ་དམ་པ་དེ་ཉིད་ཀྱིས་བློ་སྟོབས་ཆེན་པོ་དང་དངོས་ཡོད་ཀྱི་ལམ་ནས་ཕན་ཚུན་གཉིས་ཕན་གྱི་ཐབས་ལམ་ཞིག་བཙལ་ནས་བྱང་ཨཱ་ཡར་ལེནྜའི་ནང་ཞི་བདེ་བསྐྲུན་གནང་ཡོད། ངོས་རང་ཁ་གཏད་ཚོགས་པ་ཁག་གི་དཀའ་ངལ་རྣམས་གྲོས་མོལ་དང་རྒྱལ་ཁབ་ཕན་ཚུན་དབར་འབྲེལ་ལམ་བརྒྱུད་སེལ་ཐུབ་པར་ཡིད་ཆེས་བརྟན་པོ་བྱེད་མཁན་ཞིག་ཡིན་པའི་ཆ་ནས། བྱང་ཨཱ་ཡར་ལེནྜའི་དཀའ་ངལ་སེལ་སླད་དམ་པ་དེ་ཉིད་ཀྱིས་ཐུགས་འགན་གཙོ་བོ་བཞེས་ཏེ་གྲོས་མཐུན་གན་རྒྱར་མཚན་རྟགས་བཀོད་ཐུབ་པ་བྱུང་ཡོད་ལ། དེ་ནི་ང་ཚོའི་དུས་སྐབས་འདིར་ཞི་བདེ་བསྐྲུན་ཐབས་ཀྱི་མིག་དཔེ་ལྟ་ས་ཞིག་ཆགས་ཡོད་པ་ངོས་ཀྱིས་ངོས་འཛིན་བྱེད་ཀྱི་ཡོད།
ངོས་ལ་ཉིད་ཀྱི་སྐུ་ཟླ་དམ་པ་དེ་ཉིད་དང་ལྷན་དུ་བྱང་ཨཱ་ཡར་ལེནྜ་དང་ས་གནས་གཞན་དུ་ཐེངས་འགའ་མཇལ་འཕྲད་ཀྱི་གོ་སྐབས་བྱུང་། ངོས་ཀྱིས་དམ་པ་ཁོང་གིས་བྱང་ཨཱ་ཡར་ལེནྜའི་ནང་ཞི་བདེ་བསྐྲུན་ཐབས་སུ་ཞབས་འདེགས་རླབས་ཆེན་ཞུས་གནང་བ་དེར་ཡིད་སྨོན་བྱེད་ཀྱི་ཡོད་ཅེས་དམ་པ་ཁོང་ལ་བརྗོད་མྱོང་ཡོད། ཅེས་དང་།
མཐར་མགོན་པོ་གང་ཉིད་མཆོག་གིས། གལ་ཏེ་ང་ཚོས་འགྲོ་བ་མི་ཚང་མ་གཅིག་གྱུར་གྱི་འདུ་ཤེས་བཟུང་ནས་ཕན་ཚུན་བསམ་ཤེས་དང་། བརྩི་བཀུར། འདུམ་འགྲིག་བྱས་ཏེ་མུ་མཐུད་མ་འདྲ་སའི་དཀའ་ངལ་རྣམས་སེལ་ཐབས་བྱེད་ཐུབ་ན། དེ་ནི་སྐུ་ཞབས་ཌེ་ཝི་ཌི་ཊི་རིམ་བྷེལ་མཆོག་རྗེས་དྲན་བྱེད་སྟངས་འོས་ཤིང་འཚམས་པ་ཞིག་ཆགས་ངེས་ཡིན། ཞེས་གསུང་འཕྲིན་སྩལ་ཡོད་པ་བཅས།།
གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།
