༄༅། །བར་ལམ་རྒྱ་གར་གྱི་ལྷོ་ཕྱོགས་ཁྱིམ་མཚེས་རྒྱལ་ཁབ་ཤྲི་ལངྐའི་ནང་དུ་དཔལ་འབྱོར་ཉམས་རྒུད་ཀྱི་དཀའ་ངལ་འཕྲད་བཞིན་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རིང་མིན་དཀའ་སྡུག་ཞི་བའི་ཐུགས་སྨོན་མཛད་ཡོད་པ་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་འཆི་མེད་རིག་འཛིན་ལགས་ཀྱིས་མཚན་འཁོད་ཕྱག་བྲིས་ཤིག་ཤྲི་ལངྐའི་བོད་བརྒྱུད་ནང་བསྟན་མཐུན་ཚོགས་ཀྱི་ཚོགས་གཙོ་མཆོག་ལ་སྤྲིངས་པའི་ནང་འཁོད་འདུག
ཕྱག་བྲིས་ནང་ཉེ་ལམ་ཤྲི་ལངྐའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ཉིན་མགོན་པོ་གང་ཉིད་ཀྱི་ཐུགས་བསྐྱེད་དམ་བཅའ་བཞིའི་ཐོག་བགྲོ་གླེང་ཚོགས་འདུ་ཞིག་བསྐོང་ཚོགས་གནང་བར་ཐུགས་རྗེ་ལེགས་གསོལ་གནང་འདུག་པ་མ་ཟད། ཤྲི་ལངྐའི་གནས་བརྟན་སྡེ་པ་ཡོངས་ཀྱིས་༸གོང་ས་མཆོག་ལ་འཁྲུངས་སྐར་གྱི་འཚམས་འདྲི་ཞུས་པར་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་ཐུགས་རྗེ་ཆེ་ཞེས་བཀའ་སྩལ་ཡོད་པའི་སྐོར་འཁོད་འདུག
ཕྱོགས་མཚུངས་ཕྱག་བྲིས་དེའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་ལྟའི་ཆར་ཤྲི་ལངྐའི་མི་སེར་རྣམས་དཔལ་འབྱོར་ཉམས་རྒུད་ཀྱི་དཀའ་སྡུག་འཕྲད་བཞིན་པ་མཁྱེན་གྱི་ཡོད་པ་མ་ཟད། མགོན་པོ་གང་ཉིད་མཆོག་གིས་རིང་པོར་མ་ཐོགས་པར་དཀའ་ངལ་མྱུར་དུ་ཞི་ནས་དུས་བདེ་ཞོད་འཇགས་ཡོང་བའི་ཐུགས་སྨོན་མཛད་ཡོད་པའང་གསུངས་འདུག་པ་བཅས།།
