༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༧ ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཡས་མས་སུ་བོད་ནང་རྒྱ་ནག་གཞུང་གིས་དམ་བསྒྲགས་དང་བྱ་ར་མྱུལ་ཞིབ་ཚད་མཐོར་བཏང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ཉར་མཁན་བོད་མི་འགའ་ཤས་འཛིན་བཟུང་བྱས་འདུག

དེ་ཡང་ཤེས་རྟོགས་བྱུང་བར་གཞིགས་ན་བོད་དཀར་མཛེས་གནས་སྡོད་བོད་མི་ཞིག་གིས་སྐུ་པར་ཉར་འཇོག་བྱས་པར་ཁོང་ལ་རྡུང་རྡེག་ཚབས་ཆེ་བཏང་འདུག་པ་དང་། དེ་བཞིན་བོད་ནག་ཆུ་ཨ་མདོ་རྫོང་ནས་ཡིན་པའི་བོད་མི་མིང་སྲིང་གཉིས་ཀྱིས་རང་ཁྱིམ་དུ་༧གོང་ས་མཆོག་གི་སྐུ་པར་སྒྲིག་གཤོམ་བྱས་པར་འཛིན་བཟུང་གིས་བཀག་བསྐྱིལ་འོག་བཞག་འདུག 

བོད་ཀྱི་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་བ་སྔོན་མའི་ནང་དཀར་མཛེས་རྫོང་གི་ཉེན་རྟོག་པ་གློ་བུར་དུ་བོད་མི་ཞིག་གི་ཁང་ཁྱིམ་དུ་འཛུལ་ཏེ། ཁོང་གི་ཁང་ཁྱིམ་དུ་༧གོང་ས་མཆོག་གི་སྐུ་པར་ཆེན་པོ་ཞིག་བཤམས་ཡོད་པ་དེ་བཙན་ཁྱེར་བྱས་ཡོད་པ་མ་ཟད། ཁོང་ཡང་འཛིན་བཟུང་བྱས་ཏེ་རྫོང་གི་ཉེན་རྟོག་ཁང་དུ་འཁྲིད་ཡོད་པ་གསལ་འདུག ད་དུང་ཤེས་རྟོགས་བྱུང་བར་གཞིགས་ན། དང་ཐོག་ཁོང་བཙན་ཁྲིད་བྱེད་སྐབས་གཟུགས་གཞིའི་གནས་བབ་བདེ་ཐང་ཡོད་ནའང་། བཀག་བསྐྱིལ་སྐབས་ཁོང་ལ་རྡུང་རྡེག་མནར་གཅོད་དྲག་པོ་བཏང་རྐྱེན་སྨན་ཁང་དུ་འཁྲིད་དགོས་པའི་གནས་ཚུལ་བྱུང་འདུག་པ་དང་། ཁོང་ལ་རྨས་སྐྱོན་ཇི་ཕོག་ཐད་ཉེན་རྟོག་པས་ཁོང་གི་ནང་མིར་འགྲེལ་བརྗོད་བྱས་མི་འདུག སྨན་ཁང་ལ་བསྟེན་གཏུག་རྗེས་ཉེན་རྟོག་ཁང་དུ་འཁྲིད་ཡོད་པའི་གནས་ཚུལ་ཤེས་རྟོགས་བྱུང་མོད་ཀྱང་། དེ་རྗེས་ཀྱི་ཁོང་གི་གནས་སྟངས་ཤེས་རྟོགས་ཐུབ་ཀྱི་མེད་སྐོར་འབྲེལ་ཡོད་གསར་ཁང་ལ་གནས་ཚུལ་མཁོ་སྤྲོད་པས་འགྲེལ་བརྗོད་བྱས་འདུག 

དེ་མཚུངས་ཕྱི་ལོ་ ༢༠༢༢ ཟླ་བ་ ༠༧ ཚེས་ ༡༡ ཉིན་རྒྱ་ནག་གཞུང་གི་ཉེན་རྟོག་པས་བོད་ནག་ཆུ་ཨ་མདོ་རྫོངས་ནས་ཡིན་པའི་བོད་མི་གཡུ་སྒྲོན་ལགས་ཀྱིས་རང་གི་གཅེན་མོ་འཛུམ་དཀར་ལགས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་རང་ཁྱིམ་དུ་སྒྲིག་གཤོམ་བྱེད་པར་རོགས་བྱེད་པའི་ཉེས་འཛུགས་འོག་འཛིན་བཟུང་བྱས་འདུག དེ་ཡང་ཕྱི་ལོ་ ༢༠༢༢ ཟླ་བ་ ༠༦ ཚེས་ ༢༣ ཉིན་གཡུ་སྒྲོན་ལགས་ཀྱི་གཅེན་མོ་འཛུམ་དཀར་ལགས་ཀྱིས་རང་ཁྱིམ་དུ་༸གོང་ས་མཆོག་གི་སྐུ་པར་སྒྲིག་གཤོམ་བྱས་པ་ཉེན་རྟོགས་པས་ཤེས་རྟོགས་བྱུང་ནས་ཁོང་མོ་འཛིན་བཟུང་བྱས་ཡོད། ད་ལྟ་མིང་སྲིང་གཉིས་ལྷ་སར་བཀག་བསྐྱིལ་འོག་བཞག་ཡོད་ལུགས་འགྲེལ་བརྗོད་བྱེད་ཀྱི་ཡོད་ཀྱང་། ཁོང་མོ་གཉིས་ཀྱི་དངོས་ཡོད་གནས་སྟངས་ཤེས་རྟོགས་ཐུབ་མེད། 

བོད་མི་གཅེན་གཅུང་གཉིས་ནི་བོད་རང་སྐྱོང་ལྗོངས་ཞེས་པའི་ཨ་མདོ་རྫོང་རྩ་རིང་གྲོང་བརྡལ་ནས་ཡིན་འདུག་ཅིང་། གཅེན་མོ་འཛུམ་དཀར་ལགས་ལ་མཚོན་ན་ཆུང་དུས་ནས་འབྲོག་སར་འཚོ་བ་སྐྱེལ་འདུག་པ་མ་ཟད་ཁྱིམ་ཚང་གི་གཞི་འཛིན་པ་ཡང་ཡིན་འདུག

གནས་ཚུལ་ཤེས་རྟོགས་བྱུང་བ་ལྟར་ན། འདི་ལོའི་ཕྱི་ཟླ་ ༠༥ ནས་བཟུང་བོད་ཀྱི་རྒྱལ་ས་ལྷ་ས་གཙོས་པའི་བོད་ཀྱི་ས་ཁུལ་མང་པོར་རྒྱ་ནག་གཞུང་གིས་གློ་བུར་ཡུལ་མི་དང་ཡུལ་སྐོར་བའི་ལག་ཐོགས་ཁ་པར་བལྟ་བཤེར་དང་། བརྡ་ཐོ་མེད་པར་ཁང་ཁྱིམ་དུ་གློ་བུར་ཐོག་རྒྱག་འཛུལ་ཏེ་སྔོག་བཤེར་རྒྱག་གི་ཡོད་པ་མ་ཟད། བཙན་བྱོལ་དུ་སྤུན་གཉེན་ཡོད་མེད་དྲི་རྩད་དང་། གཞུང་གི་ལས་བྱེད་ཀྱི་ཕྲུ་གུ་རྣམས་དགོན་པ་དང་གསུང་ཆོས་སོགས་སུ་བསྐྱོད་མི་ཆོག་པའི་བཙན་བཀའ་གཏོང་གི་ཡོད་འདུག །