༄༅། །ཕྱི་ལོ་ ༢༠༢༢ ཟླ་ ༧ ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་ལྡན་རྒྱུད་གྲྭ་སྟོད་སྨད་གཉིས་ནས་ཇི་ལྟར་གསོལ་བ་བཏབ་པ་ལྟར་བཀའ་བཞེས་བཟང་པོ་སྨིན་སྩལ་གྱིས་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བདེ་མཆོག་ལཱུ་ཨི་པའི་བཀའ་དབང་གི་སྟ་གོན་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༦།༤༠ སྟེང་མགོན་པོ་གང་ཉིད་མཆོག་བཞུགས་སྒར་རྒྱལ་བའི་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་གྱིས་ཐོག་མར་སྒྲུབ་ཞག་མཛད་པ་དང་། དེ་ནས་ཆུ་ཚོད་བརྒྱད་པ་མ་ཟིན་ཙམ་ལ་སྒྲུབ་ཞག་ལེགས་པར་གྲུབ་སྟེ་བཞུགས་ཁྲིར་༸ཞབས་སོར་འཁོད་མཚམས་བཀའ་སློབ་སྩལ་དོན། དེ་རིང་གཙོ་བོ་དཔལ་ལྡན་སྟོད་རྒྱུད་པས་བདེ་མཆོག་གི་བཀའ་དབང་གནང་རོགས་ཞེས་ཞེན་སྐུལ་གནང་བྱུང་། དེ་རིང་འདིར་བདེ་མཆོག་གི་བཀའ་དབང་འབུལ་རྒྱུ་ཡིན། དེ་ཡང་སངས་རྒྱས་བཅོམ་ལྡན་འདས་ཀྱིས་གདུལ་བྱའི་ཁམས་དང་མོས་པའི་ཁྱད་པར་གཟིགས་པའི་སྒོ་ནས་སྤྱི་ཡོངས་ལ་བདེན་བཞིའི་ཆོས་འཁོར་དང་། དབང་པོ་རྣོན་པོ་རྣམས་ལ་ཤེར་ཕྱིན་གྱི་ཆོས་འཁོར། དེ་ནས་གསང་སྔགས་རྡོ་རྗེ་ཐེག་པའི་ཆོས་སྐོར་གསུངས་པ་དེ་ལྟར་རེད། དེའི་ཁྱད་པར་ནི་སྤྱིར་བཏང་ང་རང་ཚོས། སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་རང་ལས་རྒྱུད་ཐ་དད་པའི་མཆོག་གསུམ་གསལ་བཏབ་ནས་དེ་ལ་གསོལ་བ་འདེབས་བཞིན་པ་རེད། གསང་སྔགས་ཀྱི་ཆོས་སྐོར་ཞེས་པ་ནི་སངས་རྒྱས་གཞན་ནས་མི་འཚོལ་བར་སངས་རྒྱས་ནང་ནས་འཚོལ་བ་ཞིག་ཆགས་ཀྱི་ཡོད། དེར་བརྟེན་སྐུ་གསུམ་གྱི་གོ་འཕང་ཞེས་པ་ནི། ང་ཚོ་ལ་སྐྱབས་སུ་མཆི་སའི་རྒྱུ་སྐྱབས་ཤིག་ཡོད་མོད་ཀྱང་གཙོ་བོ་རང་གི་ཐོབ་བྱར་གྱུར་བའི་སྐུ་གསུམ་པོ་དེ་འབྲས་སྐྱབས་ཡིན་པས་སྐྱབས་སུ་མཆི་ས་དངོས་ནི་དེ་ཡིན། 
སེམས་བསྐྱེད་ཀྱི་སྐབས་སུ། རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གི་འགྲོན་དུ་གཉེར། །ཞེས་གསུངས་པ་བཞིན་སངས་རྒྱས་ཕྱི་ནས་མི་འཚོལ་བར་ནང་ནས་འཚོལ་དགོས་པ་ཞིག་ཡིན། སྒོ་ལྔའི་དབང་ཤེས་ཀྱི་སྟེང་ནས་སྐུ་བཞིའི་ས་བོན་བཤད་ཐུབ་པ་མེད་པས་གཙོ་བོ་ཡིད་ལུགས་རེད། ཡིད་ལུགས་ལའང་ཕྲ་རགས་མང་པོ་ཞིག་ཡོད་པའི་ནང་ནས་སྣང་བའི་རང་བཞིན་གྱི་རྟོག་པ་སོ་གསུམ། མཆེད་པའི་རང་བཞིན་གྱི་རྟོག་པ་བཞི་བཅུ། ཉེར་ཐོབ་རང་བཞིན་གྱི་རྟོག་པ་བདུན་བཅས་རང་བཞིན་བརྒྱད་ཅུའི་རྟོག་པ་འགགས་པའི་རྗེས་སུ་གཉུག་མའི་འོད་གསལ་འབྱུང་ཞིང་། ཤེས་པ་རགས་པ་ལ་ཐོག་མ་དང་མཐའ་མ་ཡོད་ཀྱང་གཉུག་མ་ལྷན་ཅིག་སྐྱེས་པའི་འོད་གསལ་ལ་ཐོག་མ་དང་མཐའ་མ་མེད་པས། སངས་རྒྱས་ཀྱི་ས་ལ་འགྲོ་མཁན་ངོ་མ་ནི་གཉུག་མ་ལྷན་ཅིག་སྐྱེས་པའི་འོད་གསལ་དེ་ཡིན།
སྔགས་ཀྱི་ཟབ་ཁྱད་ནི་རགས་པ་གློ་བུར་བའི་ཤེས་པ་རྣམས་ལ་ལས་ཀ་མ་བཀོལ་བར་གཙོ་བོ་གཉུག་མ་ལྷན་ཅིག་སྐྱེས་པའི་འོད་གསལ་དེ་མངོན་དུ་གྱུར་པ་ཞིག་དང་། འོད་གསལ་དེའི་བཞོན་པའི་རླུང་ལས་སྒྱུ་ལུས་སྒྲུབ་པ་ནི་གསང་སྔགས་བླ་མེད་ཀྱི་ཟབ་ཁྱད་རེད། གང་ལྟར་སངས་རྒྱས་ཕྱི་ནས་མི་འཚོལ་བར་སངས་རྒྱས་རང་གི་ནང་ན་ཡོད་པ་དེ་ངོ་ཤེས་པར་བྱས་ནས་དེ་ལྟར་སྐུ་བཞིའི་གོ་འཕང་མངོན་དུ་བྱེད་རྒྱུ་གསུང་གི་ཡོད། དེ་ལ་རགས་པ་གློ་བུར་བའི་ཤེས་པ་དེ་དག་འགགས་ནས་གཉུག་མ་ལྷན་ཅིག་སྐྱེས་པའི་འོད་གསལ་མངོན་དུ་བྱེད་དགོས་པ་རེད།
ཐ་མལ་པ་ཞིག་ཡིན་ན་འཆི་བའི་སྐབས་སུ་རང་བཞིན་བརྒྱད་ཅུའི་རྟོག་པ་འགགས་པའི་རྗེས་སུ་འོད་གསལ་གྱི་རླུང་སེམས་རྐྱང་པ་ལྷག་གི་ཡོད། དེ་ནི་ང་རང་ཚོ་ཐ་མལ་པ་ལ་ཡིན་ན་བར་དོ་བསྒྲུབ་རྒྱུ་ཆགས་ཀྱི་ཡོད། དེ་ནི་གཞི་ལ་ཡོད་པ་ལས་བསྒོམས་ནས་བཟོས་པ་ཞིག་མིན། དེའི་ཕྱིར་སྤྱིར་གསང་སྔགས་ཀྱི་ཆོས་སྐོར་དང་། དེའི་ནང་ཚན་ནས་ང་ཚོའི་གཞི་ལ་རང་ཆས་སུ་ཡོད་པའི་གསང་སྔགས་བླ་མེད་ཀྱི་ཆོས་སྐོར་འདི་དག་ནི་ལག་ལེན་བཀལ་ནས་ལམ་གྱི་ངོ་བོར་བསྐྱེད་དགོས། རགས་པ་གློ་བུར་བའི་རླུང་སེམས་འདི་དག་ཆ་ཚང་མར་ཐིམ་ནས་ཕྲ་བ་གཉུག་མའི་བློ་ཆགས་ཡོང་དུས་གཞི་ནས་གཉུག་མ་ལྷན་ཅིག་སྐྱེས་པའི་བློས་ལས་ཀ་བྱས་པ་ལྟ་བུ་དང་། རགས་པ་གློ་བུར་བའི་སེམས་ཐིམ་ཞིང་ཕྲ་བ་གཉུག་མའི་སེམས་རྐྱང་པ་ལྷག་པའི་སྐབས་སུ་གཉུག་སེམས་དེ་གའི་སྟེང་ནས་གསང་སྔགས་ཀྱི་ནང་ནས་རླུང་སེམས་གཉིས་བཤད་པའི་ཤིན་ཏུ་ཕྲ་བའི་སེམས་དེའི་བཞོན་པར་གྱུར་པའི་ཤིན་ཏུ་ཕྲ་བའི་རླུང་ཞེས་དེ་ལྟ་བུའི་རླུང་སེམས་གཉིས་པོ་ལས་ཐ་མལ་པ་ལ་བར་དོ་འགྲུབ་པའི་ཚོད་དེ་ལ་རྣལ་འབྱོར་བའི་རྒྱུ་ཚོགས་ཆ་ཚང་སྨིན་ཡོང་སྐབས་འོད་གསལ་འཆར་པའི་སྐབས་སུ་དཔེའི་འོད་གསལ་དུ་གྱུར། དཔེའི་འོད་གསལ་གྱི་བཞོན་པའི་རླུང་ལས་སྒྱུ་ལས་ལ་ལྡང་བ་དེ་ཟབ་ཁྱད་ཧ་ཅང་ཆེན་པོ་རེད། ལས་སླ་བོ་མེད་ཀྱང་འདི་ལྟར་བསམ་བློ་བཏང་ན་དེ་ནི་ཡོང་ཆོག་བསམ་པ་ཞིག་བློ་ལ་འཆར་ཐུབ།
གསང་སྔགས་བླ་མེད་ཀྱི་ཆོས་སྐོར་གྱིས་རང་ལ་ཐོག་མ་མེད་པ་ནས་རང་ཆས་སུ་ཡོད་པའི་ཤིན་ཏུ་ཕྲ་བའི་རླུང་སེམས་འདི་བེད་སྤྱོད་བྱས་ནས་ལམ་གྱི་ངོ་བོར་བསྐྱེད་པ་ཞིག་བཤད་ཀྱི་ཡོད། ཕ་རྒྱུད་གསང་བ་འདུས་པ་ལས་གཉུག་མའི་འོད་གསལ་གྱི་བཞོན་པའི་རླུང་ལས་སྒྱུ་ལུས་ཤར་བ་གཙོ་འདོན་བྱས་ཏེ་གསུང་གི་ཡོད། འཁོར་ལོ་སྡོམ་པ་མ་རྒྱུད་ལས་འོད་གསལ་ལམ་བྱེད་ཅེས་གཉུག་མ་ལྷན་ཅིག་སྐྱེས་པའི་འོད་གསལ་དེ་ཉིད་ལམ་གྱི་ངོ་བོ་དང་དོན་གྱི་འོད་གསལ་གྱི་ངོ་བོར་བསྐྱེད་པ་བཤད་ཀྱི་ཡོད། ང་ཚོ་འཆི་བའི་སྐབས་སུ་འཆི་བ་འོད་གསལ་ལས་དབང་གིས་འཆར་ཡོང་གི་ཡོད། དེ་དུས་ཐིམ་རིམ་དེ་དག་ངོ་ཤེས་པར་བྱས་ཏེ་ཉེར་ཐོབ་ཀྱི་སྟེང་དུ་འོད་གསལ་ཡོང་བ་ཡིན་བསམས་ནས་རྩེ་གཅིག་ཏུ་སྟོང་པ་ཉིད་ལ་མཉམ་པར་བཞག་ནས་འོད་གསལ་རང་ཉིད་ཀྱི་སྐབས་སུ་ལས་དང་པོ་བས་སྟོང་ཉིད་ལ་རིགས་པས་དཔྱད་ནས་སྒོམ་མི་ཐུབ་ཀྱང་། སྣང་བ་དང་མཆེད་པ་སོགས་རིམ་བཞིན་རླུང་སེམས་ཕྲ་རུ་ཕྲ་རུ་ཕྱིན་པའི་སྐབས་སུ་ག་ཚོད་ཐུབ་ཐུབ་ཀྱིས་སྟོང་ཉིད་ལ་མཉམ་པར་བཞག་ནས་དེའི་རྒྱུན་གྱི་འོད་གསལ་འཆར་ཡོང་སྐབས་སྟོང་པ་ཉིད་ལ་མཉམ་པར་འཇོག་བཞིན་པ་ཞིག་རེད། དེའི་ཕྱིར་ང་རང་ཚོས་འདིར་གསང་སྔགས་ཀྱི་འབྲས་བུ་ལམ་བྱེད་ཅེས་པ་རང་ལ་རང་ཆས་སུ་ཡོད་པའི་གཉུག་མ་ལྷན་ཅིག་སྐྱེས་པའི་འོད་གསལ་དེ་ལམ་གྱི་ངོ་བོར་བསྐྱེད་ནས་ཕ་རྒྱུད་གསང་བ་འདུས་པ་ཡིན་ན་འོད་གསལ་དེ་ལས་སྒྱུ་ལུས་ལྡང་བ་གཙོ་བྱས། མ་རྒྱུད་འཁོར་ལོ་སྡོམ་པ་ལས་གཉུག་མ་ལྷན་ཅིག་སྐྱེས་པའི་འོད་གསལ་དེ་སྒྲིབ་པའི་གཉེན་པོ་ལ་ཡག་པོ་བསྐྱེད་ཐུབ་པ་ཞིག་རེད་འདུག
ཐིམ་རིམ་དེ་དག་རིམ་བཞིན་ཐིམ་ཟིན་པའི་རྗེས་སུ་བློ་རགས་པ་དེ་དག་ཐིམ་ཟིན་པ་རེད། ང་རང་ཚོས་ད་ལྟར་བསམ་བློ་གཏོང་བ་འདི་ལ་བློ་དེ་དག་མེད། ཕྲ་བ་གཉུག་མའི་སེམས་ཀྱི་སྔ་རོལ་དུ་བློ་རགས་པའི་གནས་སྐབས་སུ་ག་ཚོད་ཐུབ་ཐུབ་ཀྱིས་སྟོང་ཉིད་ལ་མཉམ་པར་བཞག་སྟེ། སྟོང་ཉིད་ལ་མཉམ་པར་འཇོག་བཞིན་པའི་ངང་ནས་བློ་ཕྲ་རུ་ཕྲ་རུ་ཕྱིན་ནས་མཐའ་མ་རགས་པ་གློ་བུར་བའི་སེམས་མར་ཐིམ་ནས་ཐམས་ཅད་སྟོང་པ་འོད་གསལ་འཆར་བའི་གནས་སྐབས་སུ་སྟོང་པ་ཉིད་ཀྱི་དོན་སྔར་ནས་བསམ་བློ་མུ་མཐུད་ནས་བསྡད་པ་དེས་སྟོང་པ་བཞི་བསྐྱེད་ཡོང་སྐབས་སྟོང་པ་ཉིད་ཀྱི་ལྟ་བ་ལ་གྲོགས་བྱེད་པ་ཕལ་ཆེར་ཡོད་ཚོད་འདུག འདི་སྔགས་བླ་མེད་ཀྱི་ཟབ་ཁྱད་རེད། ཅེས་སོགས་བོད་དང་རྒྱ་ནག་ཉི་ཧོང་སོགས་སུ་མགོན་པོ་གང་ཉིད་མཆོག་ལ་དད་དམ་འགྱུར་མེད་དུ་སྡོད་ཅིང་། ས་བབས་བཀག་རྒྱའི་དབང་གིས་བཀའ་དབང་ལ་བཅར་མ་ཐུབ་པ་རྣམས་དམིགས་འོག་ཏུ་བཅུག་ཡོད་པ་བཀའ་སློབ་བཀའ་དྲིན་སྩལ་རྗེས་བཀའ་དྲིན་གཏང་རག་གི་མཎྜལ་ཕུལ་བ་སོགས་བཀའ་དབང་གི་སྔོན་འགྲོའི་སྟ་གོན་ལེགས་པར་གྲུབ་སྟེ་ཕོ་བྲང་དུ་ཆིབས་སྒྱུར་བསྐྱངས་ཡོད་པ་བཅས། །
