༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་ལྡན་སྟོད་རྒྱུད་གྲྭ་ཚང་དང་དཔལ་ལྡན་སྨད་རྒྱུད་གྲྭ་ཚང་གཉིས་ནས་ཇི་ལྟར་སྔོན་ནས་གསོལ་བ་བཏབ་པ་ལྟར་བཀའ་བཞེས་བཟང་པོ་སྨིན་སྩལ་གྱིས་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་སྩལ་གཏན་ཁེལ་འདུག
དེ་ཡང་དགའ་ལྡན་ཕོ་བྲང་གི་དྲ་རྒྱའི་སྟེང་འཁོད་པ་ལྟར་ན། ཕྱི་ལོ་ ༢༠༢༢ ཟླ་བ་ ༧ ཚེས་ ༨ ནས་ ༡༠ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་ལྡན་རྒྱུད་སྨད་གྲྭ་ཚང་དང་སྟོད་རྒྱུད་གྲྭ་ཚང་གཉིས་ནས་ཇི་ལྟར་གསོལ་བ་བཏབ་པ་ལྟར་བཀའ་བཞེས་བཟང་པོ་སྨིན་སྩལ་གྱིས་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་སྩལ་རྒྱུ་དང་། དེ་ཡང་ཚེས་ ༨ ཉིན་གྱི་སྔ་དྲོ་བཀའ་དབང་གི་སྔོན་འགྲོའི་སྟ་གོན་གྱི་རིམ་པ་དང་། ཚེས་ ༩ ཉིན་གྱི་སྔ་དྲོ་ལཱུ་ཨི་པའི་བཀའ་དབང་དངོས་གཞི་དབུ་འཛུགས་གནང་རྒྱུ། ཚེས་ ༡༠ ཉིན་གྱི་སྔ་དྲོ་དཔལ་ལྡན་རྒྱུད་སྨད་གྲྭ་ཚང་དང་སྟོད་རྒྱུད་གྲྭ་ཚང་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ།
དཔལ་འཁོར་ལོ་སྡོམ་པ་ལཱུ་ཨི་པའི་བཀའ་དབང་སྐབས་ཆོས་ཞུ་བ་ཡོངས་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དོན་གཉེར་སྦྱངས་པ་ཡོད་ཐོག བྱུང་ན་ལཱུ་ཨི་པའི་བདག་བསྐྱེད་དང་། མ་མཐའ་ནའང་དག་པ་གསུམ་གྱི་རྣལ་འབྱོར་ཁ་འདོན་དུ་ཁས་ལེན་ངེས་པར་དགོས་པ་དེ་ལུགས་དབང་ཞུ་བ་ཡོངས་ཀྱིས་དགོངས་འཇགས་ཡོད་པ་ཞུ། །
