༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༠༨ ཉིན་ཉི་ཧོང་གི་སྲིད་བློན་ཟུར་པ་ཤིན་ཛོ་ཨ་བེ་མཆོག་ལ་མེ་མདའ་བརྒྱབ་རྗེས་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་ཐོན་མ་ཐག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་གི་བཟའ་ཟླ་ཨ་བེ་ཨ་ཀི་ལགས་སུ་ཐུགས་གསོའི་གསུང་འཕྲིན་ཞིག་སྩལ་འདུག
དེ་ཡང་ཐུགས་གསོའི་གསུང་འཕྲིན་ནང་མགོན་པོ་གང་ཉིད་མཆོག་གིས། དེ་རིང་ཞོགས་པ་ངོས་ཀྱི་མཛའ་གྲོགས་སྐུ་ཞབས་ཤིན་ཛོ་ཨ་བེ་ལགས་ལ་མེ་མདའ་བརྒྱབ་རྗེས་འདས་གྲོངས་སུ་གྱུར་པའི་གནས་ཚུལ་ཐོས་པར་བློ་ཕམ་ཆེན་པོ་བྱུང་། ངོས་ཀྱིས་འདས་པོ་ཁོང་ལ་སྨོན་ལམ་འདེབས་རྒྱུ་མ་ཟད་སྐུ་ཉིད་དང་ནང་མི་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་ཡིན།
སྐུ་ཉིད་ཀྱིས་མཁྱེན་གསལ་ལྟར་དམ་པ་ཁོང་ནི་བོད་ཀྱི་བློས་ཐུབ་གྲོགས་པོ་ཞིག་ཀྱང་ཡིན། ངོས་ཀྱིས་ཁོང་གི་མཛའ་འབྲེལ་དང་། ནང་པའི་རིག་གཞུང་ཕྱུག་པོ་གཅེས་ཉར་སླད་རྒྱབ་སྐྱོར་གནང་བར་བསྔགས་བརྗོད་ཞུ་གི་ཡོད། ཅེས་དང་།
མཐར་མགོན་པོ་གང་ཉིད་མཆོག་གིས་སྐུ་ཞབས་ཨ་བེ་ལགས་ཀྱིས་གཞན་ཕན་ལྷུར་དུ་བླངས་ཏེ་མི་ཚེ་དོན་དང་ལྡན་པ་བསྐྱལ་ཡོད་ཅེས་གསུངས་འདུག །
