༄༅། །འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་གི་སྐལ་བཟང་ཉིན་མོར་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་མགོན་པོ་མཆོག་ལ་འཚམས་འདྲི་ཞུས་འདུག 

དེ་ཡང་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོའི་ལས་རོགས་ཨན་དེ་རི་གྷི་སི་བུར་ (Andrea Geissbühler) ལགས་དང་། ཚོགས་གཞོན་མ་ཡ་ག་རཕ་ (Maya Graf) ལགས། ཚོགས་མི་ནིག་གུ་གར་ (Nik Gugger) ལགས། ཚོགས་མི་ཕ་བྷིན་མོ་ལི་ན་ (Fabian Molina) ལགས། ཚོགས་མི་ནི་ཀོ་ལས་ཝལ་ཊར་ (Nicolas Walder) ལགས་བཅས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ལ་འཚམས་འདྲི་དང་སྦྲགས་སྐུ་ཚེ་ཡུན་རིང་བརྟན་པའི་སྨོན་འདུན་ཞུས་པ་མ་ཟད། མགོན་པོ་མཆོག་གི་དགོངས་བཞེད་ལྟར་བོད་ལ་མིང་དོན་མཚུངས་པའི་རང་སྲིད་རང་སྐྱོང་མྱུར་དུ་ཐོབ་པའི་རེ་བ་ཡོད་ཅེས་དང་། ཆབས་ཅིག་གྲོས་ཚོགས་འཐུས་མི་རྣམ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཧྲིལ་པོར་འཚེ་བ་མེད་པ་དང་། ཆོས་ལུགས་མཐུན་འབྲེལ་གོང་མཐོར་གཏང་རྒྱུའི་དགོངས་བཞེད་ལ་ངོས་འཛིན་གཙང་མ་གནང་འདུག 

དེ་བཞིན་གྲོས་ཚོགས་འཐུས་མི་རྣམས་ཀྱིས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་མུ་མཐུད་རྡོག་རོལ་གཏོང་བཞིན་པར་ཐུགས་འཚབ་དང་སྦྲགས། སུད་སི་གཞུང་ནས་རྒྱ་ནག་གཞུང་ལ་བོད་མི་རྣམས་ཀྱི་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་དགོས་པའི་རེ་སྐུལ་གནང་སྐྱོང་ཡོང་བའི་འབོད་སྐུལ་ཞུས་འདུག ད་དུང་ཁོང་རྣམས་ནས་ད་ཆ་ཨུ་རུ་སུས་ཡུ་ཀེ་རེན་ལ་བཙན་འཛུལ་བྱེད་པའི་སྐྱི་གཡའ་བའི་གནས་སྟངས་ལྟར་བོད་ནི་ལོ་ངོ་བདུན་ཅུའི་རིང་དྲག་རྩུབ་ཆེ་བའི་ཁྱིམ་མཚེས་རྒྱལ་ཁབ་ཀྱི་བཙན་གནོན་གཏོང་ཡུལ་དུ་གྱུར་ཡོད་ཅེས་གསུངས་འདུག 

སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་བྷུ་ཆི་ལི་ (Thomas Büchli) ལགས་དང་ཚོགས་གཞོན་ལྷ་དབང་ངོར་ཁང་གསར་ལགས་རྣམ་གཉིས་ཀྱིས་བོད་དོན་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་སུད་སི་གྲོས་ཚོགས་སུ་གླེང་སློང་ཡོང་བར་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་ལྷན་དུ་མཉམ་ལས་གནང་རྒྱུའི་ཆོད་སེམས་བརྟན་པོ་ཡོད་སྐོར་སོགས་གསུངས་འདུག་པ་བཅས།།