༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་ཉིན་ཇར་མན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མཧི་ཀལ་བེ་རེན་ (Michael Brand) ལགས་ཀྱིས་༧གོང་ས་མཆོག་ལ་འཁྲུངས་སྐར་གྱི་འཚམས་འདྲི་ཞུས་གནང་འདུག

དེ་ཡང་འཚམས་འཕྲིན་ནང་སྐུ་ཞབས་མཧི་ཀལ་བེ་རེན་ལགས་ཀྱིས། བོད་མི་ཙམ་མ་ཡིན་པར་འཛམ་གླིང་ཁྱོན་ཡོངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཁོང་གི་དབུ་མའི་ལམ་གྱི་སྲིད་བྱུས་ལ་གུས་བཀུར་ཞུ་མཁན་ཧ་ཅང་མང་པོ་ཡོད། རྒྱ་ཕྱོགས་ནས་བོད་ལ་དྲག་གནོན་བྱེད་བཞིན་ཡོད་ནའང་༸གོང་ས་མཆོག་དང་བོད་མིའི་དབུ་ཁྲིད་རྣམས་ཀྱིས་དབུ་མའི་ལམ་གྱི་སྲིད་བྱུས་བརྒྱུད་ལོ་ངོ་སྟོང་གི་ལོ་རྒྱུས་ཡོད་པའི་བོད་ཀྱི་ཐ་དད་པའི་རིག་གཞུང་དང་། རྒྱ་ནག་དམར་ཤོག་གཞུང་བར་ཞི་བའི་སྒོ་ནས་འདས་པའི་ལོ་ངོ་བཅུ་ཕྲག་རིང་འགྲིགས་འཇགས་ཡོང་ཐབས་འབད་རྩོལ་གནང་ཡོད། དེ་ལྟ་བུའི་བསམ་བློ་འཁྱེར་སོ་དང་ཐབས་བྱུས་ལ་འཛམ་གླིང་རང་དབང་རྒྱལ་ཁབ་ཚང་མས་རྒྱབ་སྐྱོར་གནང་འོས་པ་ཡིན། བོད་མི་རྣམས་ཀྱིས་འཇིག་རྟེན་སྤྱི་ཡོངས་སུ་དམིགས་བསལ་བཟོད་སྒོམ་གྱི་བསླབ་བྱ་བསྟན་པར་བརྟེན་བོད་མི་དང་བོད་མིའི་དབུ་ཁྲིད་རྣམས་ཇར་མ་ནཱའི་རང་བཞིན་གྱི་ཕྱག་སྦྲེལ་དང་། ང་ཚོའི་རྒྱལ་ཁབ་ཀྱིས་རྒྱབ་གཉེར་ཞུས་པའི་བཟང་སྤྱོད་ལྡན་པའི་ཕྱི་འབྲེལ་སྲིད་བྱུས་ཀྱི་རྩ་འཛིན་དུ་གྱུར་ཡོད། ཅེས་སོགས་དང་།

དེ་བཞིན་མུ་མཐུད་ཁོང་གིས་མགོན་པོ་མཆོག་གི་འཁྲུངས་སྐར་ཉིན་འཚམས་འདྲི་དང་བཅས་གང་ཉིད་སྐུ་ཚེ་ཡུན་རིང་བརྟན་པའི་སྨོན་འདུན་ཞུས་གནང་འདུག

ཕྱོགས་མཚུགས་ཇར་མན་སྲིད་གཞུང་གི་འགྲོ་བ་མིའི་ཐོབ་ཐང་འགན་འཛིན་ལྕམ་ལུ་ཡི་སི་ཨམ་བྷག་ (Luise Amtsberg) ལགས་ཀྱིས་ཀྱང་༧གོང་ས་མཆོག་ལ་འཚམས་འདྲི་དང་ཆབས་ཅིག་མགོན་པོ་མཆོག་གིས་ཆོས་དད་དང་རིག་གཞུང་གི་ཐད་བགྲོ་གླེང་གནང་རྒྱུའི་དགོངས་བཞེད་གནང་བར་ཐུགས་རྗེ་ལེགས་འབུལ་ཞུས་པ་མ་ཟད། བོད་ནང་དྲག་གནོན་མྱོང་བཞིན་པའི་བོད་མི་རྣམས་རྣམས་གདུང་སེམས་མཉམ་སྐྱེ་གནང་འདུག་པ་བཅས།།