༄༅། །ཕྱི་ལོ་ ༢༠༢༢ ཟླ་ ༧ ཚེས་ ༡༠ ཉིན་དཔལ་ལྡན་རྒྱུད་སྨད་གྲྭ་ཚང་དང་སྟོད་རྒྱུད་གྲྭ་ཚང་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་སྐབས་མགོན་པོ་གང་ཉིད་མཆོག་གིས་སྐུའི་འཁྲུངས་སྐར་ལ་འཚམས་འཕྲིན་ཕུལ་མཁན་རྣམས་ལ་བཀའ་སློབ་སྩལ་དོན། དེ་རིང་གོ་སྐབས་འདི་བཟུང་ནས་ངོས་ཀྱི་སྐྱེས་སྐར་གྱི་དུས་ཆེན་ལ་ཡུལ་ལུང་འདྲ་མིན་ཧ་ཅང་མང་པོ་ནས་ངོ་ཤེས་པ་དང་། མི་ཤེས་པ་མང་པོས་སྐྱེས་སྐར་ལ་བཀྲ་ཤིས་བདེ་ལེགས་ཞེས་ཡི་གེ་མང་པོ་འབྱོར་སོང་། དེ་དག་གཏོང་མཁན་ཁྱོད་ཚོ་ཚང་མ་ལྷག་བསམ་གཅིག་ཏུ་དཀར་བ་རེད། གལ་ཆེ་ཤོས་ངོས་ཀྱིས་ད་ལྟའི་བར་དུ་ཧུར་ཐག་བྱས་པ་དེ་ངོས་ལེན་ཡོད་པའི་ཐོག་ནས་ཁྱེད་ཚོས་ངོས་ལ་རྒྱབ་སྐྱོར་བྱེད་ཀྱི་ཡོད་པ་རེད། དེར་བརྟེན་གོ་སྐབས་འདི་བཟུང་ནས་ངོས་ཀྱི་སྐྱེས་སྐར་གྱི་རྟེན་འབྲེལ་ལ་བཀྲ་ཤིས་བདེ་ལེགས་ཟེར་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན།
ཁྱོད་རང་ཚོས་རེ་བ་དང་སྨོན་ལམ་བརྒྱབ་པ་ལྟར་ངོས་ཀྱིས་ཀྱང་མུ་མཐུད་ནས་འཛམ་གླིང་གི་མི་དུང་ཕྱུར་བདུན་ཅུ་ལ་དངོས་དང་བརྒྱུད་པའི་སྒོ་ནས་ཕན་ཐོགས་གང་འཚམ་བྱེད་ཐུབ་པ་དང་། བྱེ་བྲག་ཏུ་ངོས་ཀྱིས་སངས་རྒྱས་པའི་ཆོས་འདི་དངོས་གནས་རིག་པ་དང་ལྡན་པ་ཞིག་ཡིན་པ་དེ་ངོ་སྤྲོད་བྱེད་བཞིན་ཡོད། དེས་ནང་པ་བྱེད་དགོས་པ་རེད་ཟེར་གྱི་མེད། ཆོས་བྱེད་དགོས་པ་རེད་ཅེས་བཤད་ཀྱི་མེད་པར་སེམས་པ་བཟང་པོ་བྱོས། ཆོས་ནས་བཤད་པའི་བསླབ་བྱ་གཙོ་བོ་ནི་སེམས་པ་བཟང་པོ་བྱེད་རྒྱུ་དེ་རེད། སྐྱེ་བ་སྔ་ཕྱི་ཁས་བླངས་མ་བླངས་ཇི་ལྟར་ཡང་མི་ཚེ་འདི་ལ་སེམས་པ་བཟང་པོ་བྱོས། ཆུང་ཆུང་སྐབས་ནས་ཨ་མས་བྱམས་བརྩེས་བསྐྱངས་པ་ལས་ཨ་མས་རླུང་བསྟན་ནས་འགྲོ་གི་མེད་པར་བྱམས་བརྩེས་སྐྱོང་གི་ཡོད་པས་ང་ཚོའི་མི་ཚེའི་མགོ་དེ་ལྟར་བཙུགས་པ་རེད།
མི་ཚེའི་འཕྲོ་དེ་དག་ཀྱང་བྱམས་བརྩེ་ལྡན་པ་ཞིག་གིས་བསྐྱལ་བ་ཡིན་ན། སོ་སོའི་སེམས་སྐྱིད་པ་དང་། རོགས་པ་ཚོའང་སེམས་སྐྱིད་པ། དེ་བརྒྱུད་ནས་བསྡོམས་ཡོང་སྐབས་འཛམ་གླིང་སྤྱི་ལ་དངོས་གནས་དྲང་གནས་སེམས་ཀྱི་ཞི་བདེ་ཡོད་པ་དང་། ཞི་བདེ་ཡོང་བའི་གོ་སྐབས་ཡོད་པ་རེད། དེ་རིང་གོ་སྐབས་འདིར་ངོས་ཀྱི་གྲོགས་པོ་ཚང་མར་དུས་རྒྱུན་དུ་ཆོས་ཁས་བླངས་ཀྱང་མ་བླངས་ཀྱང་སེམས་པ་བཟང་པོ་བྱེད་པ་དང་། སུ་ལ་ཡིན་ནའང་ཕན་ཐོགས་བྱེད་པའི་བསམ་བློ་ཐོངས། ཞེས་ཞུ་འདོད་བྱུང་། བཀྲ་ཤིས་བདེ་ལེགས། ཞེས་བཀའ་སློབ་སྩལ་ཡོད། །
