༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དང་སྟབས་བསྟུན་ལྡི་ལི་སྐུ་ཚབ་དོན་ཁང་ངོས་ནས་ལོ་ལྟར་གནད་ཡོད་མི་སྣ་ཁག་གཅིག་ལ་དགོང་དྲོའི་གསོལ་སྟོན་འདེགས་འབུལ་ཞུ་སྲོལ་ཡོད་པ་ལྟར། ཐེངས་འདིར་རྒྱ་གར་གཞུང་གི་མངའ་སྡེའི་རིག་གཞུང་བློན་ཆེན་ལྕམ་མཱི་ནཱ་ཀྵཱི་ལེ་ཁཱི་ (Meenakshi Lekhi) མཆོག་སྐུ་མགྲོན་གཙོ་བོར་གདན་ཞུས་ཐོག་མངའ་སྡེའི་ཁྲིམས་དོན་བློན་ཆེན་སྐུ་ཞབས་བྷ་གེལ་ (S.P. Singh Baghel) མཆོག་དང་། གྲོས་ཚོགས་གོང་མའི་འཐུས་མི་སྐུ་ཞབས་ཨ་ཊི་སིངྒ་(A.D. Singh) ལགས། རྒྱལ་ཡོངས་གྲངས་ཉུང་མི་རིགས་ལྷན་ཚོགས་ཀྱི་ཚོགས་མི་རིན་ཆེན་ལྷ་མོ་ལགས། ལྡི་ལིར་རྟེན་གཞི་བྱས་པའི་ཕྱི་རྒྱལ་གཞུང་ཚབ་ཁང་ཁག་གི་གཞུང་ཚབ་དང་། གཞུང་ཚབ་ཀྱི་ལས་ཚབ་སོགས་གནད་ཡོད་མི་སྣ་དྲུག་ཅུ་ཙམ་མཉམ་ཞུགས་གནང་འདུག སྐུ་མགྲོན་གཙོ་བོ་ལྕམ་ལེ་ཁི་ལགས་རང་ཉིད་བོད་མི་དང་ཡུན་རིང་འབྲེལ་འདྲིས་ཡོད་པར་བརྟེན་མཛད་སྒོར་སྒེར་ངོས་ཆེད་ཕེབས་གནང་ཞིང་། ཁོང་མོས་རྒྱ་གར་ནི་༸གོང་ས་ཏཱ་ལའི་བླ་མ་སྐུ་འཁྲུངས་ཡུལ་མ་ཡིན་ནའང་། མགོན་པོ་གང་ཉིད་ཀྱིས་རྒྱ་གར་ལ་ཐུགས་མཉེས་པོ་དང་གུས་བརྩི་ཆེན་པོ་གནང་གི་ཡོད། ༸གོང་ས་མཆོག་གིས་རྒྱ་གར་རང་ཉིད་ཀྱི་མ་ཡུམ་ལྟར་བརྩི་གནང་ཞིང་། མགོན་པོ་གང་ཉིད་རྒྱ་གར་གྱི་ཕྲུ་གུར་ངོས་འཛིན་གནང་གི་ཡོད་ཅེས་སོགས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རྨད་བྱུང་དགོངས་གཞི་རྣམས་ད་ལྟའི་དུས་སུ་འཛམ་གླིང་ལ་དགོས་མཁོ་སྔར་ལྷག་ཡོད་ཚུལ་ངོ་སྤྲོད་གནང་འདུག སྐབས་དེར་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱིས་ཚོགས་བཅར་བ་རྒྱ་གར་གཞུང་གི་སྲི་ཞུ་བ་ཟུར་པ་དང་། བསམ་མཛོད་བསྟི་གནས་ཁང་གི་མི་སྣ། གསར་འགོད་པ་སོགས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་འཇིག་རྟེན་ཡོངས་སུ་མཚན་སྙན་ཆེ་བའི་ཆོས་ཀྱི་དབུ་ཁྲིད་ཅིག་ཡིན་པ་དང་། མགོན་པོ་གང་ཉིད་མཆོག་སྐུ་ཚེ་ཧྲིལ་པོ་ཡ་རབས་བཟང་སྤྱོད་གོང་འཕེལ་དང་། ཆོས་ལུགས་མཐུན་འབྲེལ། བོད་ཀྱི་སྐད་ཡིག་རིག་གཞུང་ཁོར་ཡུག་དང་བཅས་པ་སྲུང་སྐྱོབ། གནའ་བོའི་རྒྱ་གར་གྱི་ཤེས་རིག་སླར་གསོ་གནང་རྒྱུའི་ཐད་སྐུ་ལས་སྐྱོན་ཡོད། དེ་བཞིན་བོད་རྒྱའི་དཀའ་རྙོག་ཐད་༸གོང་ས་མཆོག་གིས་རྒྱུན་རིང་པོ་ནས་གཉིས་སྨན་ཆེད་འཚེ་བ་མེད་པ་དང་གྲོས་མོལ་ལམ་ནས་སེལ་ཐབས་གནང་ཡོད་པ་མ་ཟད། བོད་མིའི་སྒྲིག་འཛུགས་དེ་ཉིད་མང་གཙོའི་ལམ་སྲོལ་དང་མཐུན་པའི་ཐོག་ནས་དེང་རབས་ཅན་དུ་སྒྱུར་ཐབས་སུ་སྐུ་ངལ་རྒྱ་ཆེ་གནང་ཡོད་ཅེས་དང་། 

མཐར་ཁོང་གིས་རྒྱ་གར་དབུས་དང་མངའ་སྡེའི་གཞུང་གི་དཔོན་རིགས་རྣམ་པ་གཙོས་པའི་ཚོགས་བཅར་བ་ཡོངས་ནས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཏེ་མཛད་སྒོ་ལེགས་པར་གྲོལ་འདུག་པ་བཅས།།