༄༅། །ཡུ་རོབ་རྐང་རྩེད་སྤོ་ལོ་རྩེད་འགྲན་ཐེངས་བཅུ་གཉིས་པ་དེ་བཞིན་ཕྱི་ལོ་ ༢༠༢༢ ཟླ་ ༧ ཚེས་ ༡༨ ནས་ ༢༣ བར་བེལ་ཇམ་གྱི་གྲོང་སྡེ་ཨན་ཊི་ཝར་པེན་ (Antwerpen) གྱི་ཉེ་འཁྲིས་སུ་ཆགས་པའི་ཌུར་ནེ་རྫོང་ (Deurne) དུ་ཚོགས་ཡོད་པ་དང་། འདི་ལོའི་ཡུ་རོབ་རྐང་རྩེད་སྤོ་ལོ་རྩེད་འགྲན་ནང་བེལ་ཇམ་དང་། ཕ་རཱན་སི། སུད་སི་བཅས་ནས་རྐང་རྩེད་སྤོ་ལོ་རུ་ཁག་གྲངས་ ༡༥ མཉམ་ཞུགས་གནང་ཡོད།

དེ་ཡང་ཡུ་རོབ་རྐང་རྩེད་སྤོ་ལོ་འགྲན་བསྡུར་མཐའ་མ་ཕྱི་ལོ་ ༢༠༢༢ ཟླ་ ༧ ཚེས་ ༢༣ ཉིན་པེ་རི་སི་ནས་ཡིན་པའི་གཡག་རུ་ཁག་ (Yak Boyz) དང་སུད་སིའི་སྦེན་ (Bern) ནས་ཡིན་པའི་བོད་གཅིག་སྒྲིལ་རུ་ཁག་ (Tibet United FC Bern ) དབར་འགྲན་བསྡུར་གནང་ཡོད། སྐབས་དེར་སུད་སིའི་སྦེན་ (Bern) ནས་ཡིན་པའི་བོད་གཅིག་སྒྲིལ་རུ་ཁག་གིས་སྤོ་ལོ་གཉིས་དང་པེ་རི་སི་ནས་ཡིན་པའི་གཡག་རུ་ཁག་གིས་སྤོ་ལོ་གཅིག་བླུགས་ཏེ་ཕྱི་ལོ་ ༢༠༢༢ ལོའི་ཡུ་རོབ་བོད་ཀྱི་ཕོར་པ་སྟེ་ཡུ་རོབ་རྐང་རྩེད་སྤོ་ལོ་འགྲན་བསྡུར་གྱི་རྒྱལ་ཁ་སུད་སིའི་སྦེན་(Bern) ནས་ཡིན་པའི་བོད་གཅིག་སྒྲིལ་རུ་ཁག་ལ་ཐོབ་ཡོད། བསྟན་འཛིན་རབ་རྒྱས་ལགས་ (Pundha United FC) ཀྱིས་སྤོ་ལོ་བརྒྱད་བླུངས་ཏེ་གསེར་ལྷམ་གྱི་རྟགས་མ་ཐོབ་ཡོད། ཐེངས་འདིའི་ཡུ་རོབ་རྐང་རྩེད་སྤོ་ལོ་འགྲན་བསྡུར་གྱི་ལས་རིམ་ཆ་ཚང་བེལ་ཇམ་ས་གནས་གཞོན་ནུ་ཚོགས་པས་ངོ་དེབ་དང་ཡུ་ཊུབ་བརྒྱུད་ཐད་གཏོང་གནང་ཡོད།ཡུ་རོབ་རྐང་རྩེད་སྤོ་ལོ་འགྲན་བསྡུར་མཐའ་མའི་མཛད་སྒོར་སྐུ་མགྲོན་གཙོ་བོ་བེལ་ཇམ་སྐུ་ཚབ་དོན་གཅོད་ཁང་གི་དྲུང་ཆེ་འཕྲིན་ལས་དབང་འདུས་ལགས་ཕེབས་ཡོད། འཕྲིན་ལས་དབང་འདུས་ལགས་དང་བེལ་ཇམ་ས་གནས་བོད་རིགས་ཚོགས་པའི་ཚོགས་གཙོ་དཔལ་ལྡན་ཚེ་རིང་ལགས་ཀྱིས་རྒྱལ་ཁ་ཐོབ་མཁན་རྣམས་ལ་གཟེངས་རྟགས་གནང་ཡོད། བེལ་ཇམ་ས་གནས་གཞོན་ནུ་ཚོགས་པའི་ངོས་ནས་ཕྱི་ལོ་ ༢༠༠༨ ལོ་ནས་བཟུང་ཡུ་རོབ་རྐང་རྩེད་སྤོ་ལོ་འགྲན་བསྡུར་གོ་སྒྲིག་གནང་ཡོད་པ་དང་། ཡུ་རོབ་རྐང་རྩེད་སྤོ་ལོ་འགྲན་བསྡུར་གོ་སྒྲིག་ཚོགས་ཆུང་གི་ཚོགས་གཙོ་ཐུབ་བསྟན་འཕེལ་རྒྱས་ལགས་ཀྱིས་འདི་ལོའི་ཡུ་རོབ་རྐང་རྩེད་སྤོ་ལོ་འགྲན་བསྡུར་དེ་བཞིན་ཧ་ཅང་ཚགས་ཚུད་བྱུང་ཡོད་སྐོར་གསུངས།

བེལ་ཇམ་སྐུ་ཚབ་དོན་གཅོད་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་ཕྱག་རོགས་རྣམ་པས་རྐང་རྩེད་སྤོ་ལོའི་རྩེད་ཐང་དུ་བཙན་བྱོལ་བོད་མིའི་མི་འབོར་གྲངས་བཤེར་གནང་ཡོད་པ་བཅས།།