༄༅། །ལྡི་ལི་བསམ་ཡས་གླིང་ས་གནས་འགོ་འཛིན་ལས་
དེ་ཡང་གོང་ཚེས་ཉིན་གྱི་སྔ་དྲོར་མི་མང་རྣམས་བོད་ཁྱིམ་ཉིན་སློབ་མདུན་ཐང་དུ་ཚང་འཛོམས་ཀྱིས་དཀར་ཕྱོགས་སྐྱོང་བའི་ལྷ་སྲུང་རྣམས་ལ་འཕྲིན་བསྐུལ་དང་བསང་གསོལ་གཟབ་རྒྱས་འབུལ་བསྟུན་དེར་འདུས་སྐུ་མགྲོན་རྣམ་པ་དང་མི་མང་ཡོངས་ནས་འབྲུག་སྟོང་ལྡིར་བ་ལྟར་ལྷ་རྒྱལ་འཐེན།
དེ་ནས་མཛད་སྒོ་དངོས་གཞི་དབུ་འཛུགས་ཀྱི་ཐོག་མར་སྐུ་མགྲོན་གཙོ་བོའི་དབུས་སྐུ་མགྲོན་རྣམ་པ་དང་། ས་གནས་འགོ་འཛིན། བརྒྱ་འཐུས་བཅས་ནས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་གདན་ཞུས་ཀྱིས་ས་གནས་འགོ་འཛིན་དང་། བརྒྱ་འཐུས་བཅས་ནས་སྐུ་པར་མཐོང་གྲོལ་རིན་པི་ཆེ་བཞུགས་ཁྲིར་འཁོད་མཚམས་མཎྜལ་རྟེེན་གསུམ་འདེགས་འབུལ་ཞུས། དེ་ནས་སྐུ་མགྲོན་རྣམ་པ་དང་མི་མང་རྣམས་ནས་རིམ་བཞིན་མཇལ་ཁ་ཞུས།
དེ་རྗེས་བོད་ཁྱིམ་ཉིན་སློབ་ཀྱི་སློབ་ཕྲུག་རྣམས་ནས་བོད་དང་རྒྱ་གར་རྒྱལ་གླུ་འབུལ་མཚམས་སྐུ་མགྲོན་གཙོ་བོ་རྒྱ་གར་གཞུང་གི་རྒྱལ་ཡོངས་གྲངས་ཉུང་མི་རིགས་ལྷན་ཚོགས་ཀྱི་ཚོགས་མི་རིན་ཆེན་ལྷ་མོ་ལགས་དང་། སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་རྣམ་གཉིས་ཀྱིས་མངར་ཟས་ཀེཀ་ (Cake) གཅོད་འབྲེག་གནང་སྟེ་མི་མང་ལ་མངར་ཟས་བགོ་འགྲེམས་ཞུས་རྗེས་ལྡི་ལི་སྐུ་ཚབ་དོན་གཅོད་ཁང་གི་དྲུང་ཆེ་དོན་གྲུབ་རྒྱལ་པོ་ལགས་ཀྱིས་བཀའ་ཤག་གི་གསུང་བཤད་སྒྲོགས་སྦྱང་གནང་།
དེ་ནས་ས་གན་རང་བདེན་ཚོགས་ཆུང་གི་ཚོགས་གཙོ་ཐུབ་བསྟན་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་གྲུབ་མཚམས་སྐུ་མགྲོན་གཙོ་བོ་རིན་ཆེན་ལྷ་མོ་ལགས་ཀྱིས་གསུང་བཤདགནང་དོན། མགོན་པོ་གང་ཉིད་ཀྱི་དྲུང་ནས་གསུང་ཆོས་དང་བཀའ་དབང་སོགས་ཞུ་སྐབས་བཞུགས་གྲལ་དུ་འཁོད་རྒྱུར་འཚང་ཁ་རྒྱག་བཞིན་པ་ལྟར། མགོན་པོ་གང་ཉིད་ཀྱི་བཀའ་སློབ་ལམ་སྟོན་རྣམ་ཉིན་རེའི་འཚོ་བའི་ནང་དེ་དེ་བཞིན་ལག་བསྟར་གནང་གལ་ཆེ་བ་དང་། དེ་བཞིན་མགོན་པོ་གང་ཉིད་ལྟ་བུའི་རླབས་ཆེན་གྱི་དབུ་ཁྲིད་སྙིགས་དུས་ཀྱི་དུས་འདིར་འཛམ་གླིང་སྐྱེས་འགྲོ་ཡོངས་ལ་དགོས་གལ་ཤིན་ཏུ་ཆེ་བ་སོགས་དང་། མགོན་པོ་གང་ཉིད་མཆོག་གང་མྱུར་བོད་གངས་ཅན་ཞིང་དུ་༸ཞབས་སོར་འཁོད་ཐུབ་པ་དང་། སྐུ་ཚེ་ཡུན་གནས། ཐུགས་བཞེད་ལྷུན་གྲུབ་ཡོང་བའི་སྨོན་འདུན་ཞུས་སོང་།
དེ་ནས་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་ཟུར་པ་ཨཅརྱ་ཡེ་ཤེས་ཕུན་ཚོགས་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་དང་དུས་ཀུན་ཏུ་མགོན་པོ་གང་ཉིད་ཀྱི་བཀའ་དྲིན་རྗེས་སུ་དྲན་པའི་ཐོག་ནས་བཀའ་གསུང་ཅི་སྒྲུབ་ཞུ་དགོས་སོགས་ཀྱི་གསུང་བཤད་གནང་།
གཞན་ཡང་སྐུ་མགྲོན་དུ་མངའ་སྡེའི་གྲོས་ཚོགས་འཐུས་མི་དང་། ལྡི་ལི་སྐོར་སྲུང་བའི་སྤྱི་ཁྱབ་ལས་རོགས་སྐུ་ཞབས་པི་ཨེན་ཁིར་མི་ (PN Khirmey) ལགས། རྒྱ་གར་བོད་དོན་རྒྱབ་སྐྱོར་ཚོགས་པ་ (BTSM) ཞེས་པའི་དྲུང་ཆེ་སོགས་ཕེབས་ཡོད།
དེ་བཞིན་མཛད་སྒོའི་སྟེང་ས་གནས་བུད་མེད་ཚོགས་པ་དང་། དབུས་གཙང་ཆོལ་ཁ། ཆོལ་གསུམ་གསར་འབྱོར་ཚོགས་པ། ལ་དྭགས་རྡ་རམ་ས་ལ། ཨོམ་ཤེས་ཡོན་བསྟི་གནས་ཁང་སོགས་ནས་བོད་ཀྱི་སྲོལ་རྒྱུན་དང་དེང་དུས་ཀྱི་རྐང་བྲོ་གླུ་གཞས་འཁྲབ་སྟོན་གཟིགས་འབུལ་ཞུས་ཡོད། དེ་ཉིན་སྐུ་མགྲོན་རྣམ་པ་དང་མི་མང་ཡོངས་ལ་ཉིན་དགུང་གསོལ་ཚིགས་ཡང་འདེགས་འབུལ་ཞུས་ཡོད།
མཛད་སྒོའི་འཕྲེད་དར་དང་སྐུ་མགྲོན་རྣམ་པའི་དཔུང་རྟགས་ས་གནས་འགོ་འཛིན་ལས་ཁུངས་ནས་གོ་སྒྲིག་ཞུས་ཡོད་པ་དང་། དེ་མིན་མཛད་སྒོའི་འགྲོ་གྲོན་ཡོངས་རྫོགས་འདི་གའི་བརྒྱ་འཐུས་ལས་ཁུངས་ནས་སྔར་ལམ་བཞིན་ནར་གཏོང་ཞུས་པ་ཞིག་དང་། མཛད་སྒོའི་ཐོག་མཐའ་བར་གསུམ་དུ་གྲ་སྒྲིག་སླད་ས་གནས་ཀྱི་ཚོགས་སྐྱིད་ཁག་ནས་མཉམ་ཞུགས་གནང་ཡོད་པ་བཅས་ལ་བརྟེན་ནས་མཛད་སྒོ་རྒྱལ་ཁའི་ངང་ཚོགས་ཐུབ་པ་བྱུང་ཡོད།།
