༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༠༦ ཉིན་རྒྱ་གར་ས་གནས་གང་སར་ཡོད་པའི་རྒྱ་གར་བོད་དོན་རྒྱབ་སྐྱོར་ཚོགས་པ་ཁག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་འདུག 

དེ་ཡང་ས་གནས་སོ་སོའི་བོད་དོན་རྒྱབ་སྐྱོར་ཚོགས་པ་རྣམས་ནས་ལས་གཞི་སྣ་ཚོགས་བརྒྱུད་མགོན་པོ་གང་ཉིད་མཆོག་གི་མཛད་པ་འཕྲིན་ལས་དང་། ལམ་སྟོན་བཀའ་སློབ་རྣམས་དྲིལ་བསྒྲགས་གནང་རྒྱུའི་མཛད་སྒོ་ཚོགས་པ་མ་ཚད་དྲ་ཐོག་བགྲོ་གླེང་དང་། ཤིང་སྣ་འདེབས་འཛུགས། མར་མེ་མཆོད་འབུལ། བགྲོ་གླེང་ཚོགས་འདུ། གཞས་སྣ་འཁྲབ་སྟོན། མངར་ཟས་བགོ་འགྲེམས་སོགས་གནང་འདུག་ཅིང་། སྐབས་དེར་མཛད་སྒོའི་སྐུ་མགྲོན་དང་གསུང་བཤད་གནང་མཁན་ས་གནས་སོ་སོའི་གནད་ཡོད་མི་སྣ་གདན་ཞུས་ཀྱིས་༧གོང་ས་མཆོག་གི་མཛད་འཕྲིན་དང་། མགོན་པོ་གང་ཉིད་ཀྱི་ལམ་སྟོན་བཀའ་སློབ་ཀྱི་གལ་གནད་རྣམས་ལག་བསྟར་གནང་ཕྱོགས་སོགས་ཀྱི་ཐད་གསུང་བཤད་དང་བགྲོ་གླེང་སོགས་ཀྱི་ལས་རིམ་བསྒྲིགས་གནང་འདུག་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་ཆེས་མཐོའི་གཟེངས་རྟགས་བྷཱ་རཏ་རཏྣ་དབུལ་རྒྱུར་རྒྱ་གར་གཞུང་ལ་ཞུ་གཏུག་གནང་ཕྱོགས་སྐོར་ཡང་གྲོས་བསྡུར་ལྷུག་པོ་གནང་ཡོད་འདུག 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལོ་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་རྒྱ་གར་གྱི་མངའ་སྡེ་ཇཱར་ཁནྜ། བི་ཧཱར། གུཇ་རཱཏ།  རཱཇསྠན།  མཧཱ་རཱཥཊྲ། ཀརནཱ་ཊཀ ཨུཏྟར་པྲདེཤ།  ཨུཏྟརཱ་ཁནྜ། ཧ་རི་ཡཱ་ཎཱ། ཨ་སམ། ནུབ་བངྒཱལ། ལྡི་ལི་སོགས་སུ་ཡོད་པའི་རྒྱ་གར་བོད་དོན་རྒྱབ་སྐྱོར་ཚོགས་པ་ཁག་གིས་ལས་གཞི་བྱེད་སྒོ་སྣ་ཚོགས་བརྒྱུད་སྲུང་བརྩི་ཞུས་འདུག་པའི་ཁར། མགོན་པོ་གང་ཉིད་མཆོག་སྐུ་ཚེ་བརྟན་པའི་གསོལ་འདེབས་སྨོན་ལམ་ཡང་གནང་འདུག་པ་བཅས།།