༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་ཉིན་བྷལ་གེན་མཐུན་གྲོགས་ (Union Bouddhiste Belge) ཀྱི་ཚོགས་གཙོ་ཀར་ལོ་ལུ་སིག་ (Carlo Luyckx) ལགས་ཀྱིས་འཚམས་འདྲི་ཞུས་འདུག

དེ་ཡང་འཚམས་འཕྲིན་ནང་ཁོང་གིས། ངས་བྷལ་གན་ནང་པའི་མཐུན་གྲོགས་ཀྱི་ཚོགས་གཙོ་དང་། ཡུ་རོབ་མཐུན་ཚོགས་ནང་གི་ཡུ་རོབ་ནང་པའི་ལྷན་ཚོགས་ཀྱི་སྐུ་ཚབ་ཡིན་པའི་ཆ་ནས་བྷལ་གན་ནང་པ་འབུམ་གཅིག་དང་ཕྱེད་ཀ་དང་། ཡུ་རོབ་ཁུལ་གྱི་ནང་པ་ས་ཡ་བཞིའི་ཚབ་ཞུས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་ལ་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་སྦྲགས། འཇིག་རྟེན་སྟེང་གི་འགྲོ་བ་སྤྱི་དང་སྒོས་སུ་བོད་མི་རྣམས་ཀྱི་ཕན་བདེའི་སླད་མགོན་པོ་མཆོག་སྐུ་ཚེ་བརྟན་པའི་སྨོན་འདུན་ཞུ། ཞེས་དང་།

དེ་བཞིན་ཁོང་གིས་བྷལ་གན་དང་ཡུ་རོབ་ཁུལ་གྱི་ནང་པ་ཡོངས་ཀྱི་ཚབ་ཞུས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་མིའི་བླ་སྤྲུལ་རྣམ་པའི་ཡང་སྲིད་ངོས་འཛིན་སྲོལ་རྒྱུན་ནང་པའི་ཆོ་ག་ཕྱག་ལེན་ལྟར་གནང་དགོས་པ་ལས་རྒྱ་ནག་གཞུང་ནས་དེར་ཐེ་གཏོགས་བྱེད་ཆོག་གི་མེད་ཅེས་གསུངས་འདུག །