༄༅། །ཨ་རི་དང་ལྡི་ལི་སྐུ་ཚབ་དོན་གཅོད་ཟུར་པ་ཕུན་ཚོགས་དོན་ལྡན་ལགས་ཕྱི་ལོ་ ༢༠༢༢ ཟླ་ ༧ ཚེས་ ༢༨ ཉིན་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་བྱུང་པར་དཔལ་ལྡན་བཀའ་ཤག་ནས་ཐུགས་ཕམ་དང་འབྲེལ་དམ་པ་ཁོང་གི་ཚེ་རབས་ཕྲེང་བར་བསགས་པའི་སྡིག་སྒྲིབ་བྱང་ཞིང་དག་ནས་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་འཐོབ་པའི་སྨོན་ལམ་གསོལ་འདེབས་ཞུ་ཕྱིར། དེ་རིང་སྟེ་ཕྱི་ལོ་ ༢༠༢༢ ཟླ་ ༧ ཚེས་ ༢༩ ཉིན་གྱི་ཉིན་རྒྱབ་ཆུ་ཚོད་ ༣ ཐོག་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དམ་པ་ཁོང་གི་ལོ་རྒྱུས་སྙིང་བསྡུས་སྒྲོགས་སྦྱང་དང་འབྲེལ་གསུང་བཤད་གནང་དོན། དམ་པ་ཁོང་གིས་གཞུང་ཞབས་ཀྱི་ལས་འགན་བཞག་རྗེས་སྤྱི་ཚོགས་ནང་འགན་ཁུར་ཏེ་མུ་མཐུད་ཕྱག་ལས་གནང་བ་རེད། ལྷག་པར་དམ་པ་ཁོང་དང་ཁོང་གི་བུ་མོ། མག་པ་བཅས་ཀྱི་མཚན་ཐོག་དགེ་རྩའི་ཐེབས་རྩ་ཞིག་ཡོད་པ་རེད། ཐེབས་རྩ་དེས་དེ་སྔ་བོད་མིའི་སྒྲིག་འཛུགས་ཀྱི་ལས་འཆར་མང་དག་ཅིག་ལ་དངུལ་གང་ཙམ་གནང་བ་དེ་འདྲ་བྱུང་ཡོད། ཕྲན་རང་བོད་མི་མང་སྤྱི་འཐུས་ཚོགས་གཙོ་ཡིན་པའི་སྐབས་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཚོགས་སླད་རོགས་དངུལ་སོགས་ཀྱི་མཐུན་འགྱུར་གནང་ཡོད། དེར་བརྟེན་དེ་རིང་སྲི་ཞུའི་ལས་བྱེད་ཡོངས་ནས་བསྔོ་བ་སྨོན་ལམ་ཡག་པོ་སྐྱོན་རོགས་གནང་། དམ་པ་ཁོང་གི་ཤུལ་ལུས་ནང་མི་ཁོངས་སྐུ་ཟླ་པདྨ་ལགས་དང་། བུ་མོ་འཆི་མེད་ལགས་དང་གཡུ་སྒྲོན་ལགས་བཅས་ཡོད་པ་རེད། ཁོང་རྣམ་པ་ཚང་མར་ཐུགས་གསོ་ཞུ་རྒྱུ་ཡིན། ཞེས་གསུང་བཤད་གནང་རྗེས་བསྔོ་སྨོན་གསུང་འདོན་དང་། དམ་པ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་སླད་ཉིན་རྒྱབ་ཆུ་ཚོད་ ༤ ནས་དབུས་ཀྱི་ལས་ཁུངས་ཁག་ལས་མཚམས་བཞག་ཡོད།
དམ་པ་ཁོང་ནི། ཕྱི་ལོ་ ༡༩༣༧ ཟླ་ ༠༡ ཚེས་ ༡༦ ཉིན་བོད་ཀྱི་རྒྱལ་ས་ལྷ་སར་ཕ་འཇམ་དབྱངས་ཕུན་ཚོགས་ལགས་དང་མ་ཚེ་རིང་སྒྲོལ་དཀར་གཉི
ཕྱི་ལོ་ ༡༩༦༤ ཕྱི་ཟླ་ ༧ ནང་སྲི་ཞུའི་ལས་བྱེད་ཁོངས་འཛུལ་ཞུགས་གནང་སྟེ་ཕྱི་སྲིད་ལས་ཁུངས་ཀྱི་དྲུང་ལས་རོགས་དང་། ཕྱི་ལོ་ ༡༩༦༥ ལོར་ཨ་རི་སྐུ་ཚབ་དོན་གཅོད་ལས་རོགས་ཀྱི་འགན་འཁུར་ཞུས། ཕྱི་ལོ་ ༡༩༦༧ ནས་ ༡༩༧༣ བར་ཨ་རི་སྐུ་ཚབ་དོན་གཅོད་ཀྱི་འགན་འཁུར་ཞུས། ཕྱི་ལོ་ ༡༩༧༣ ནས་ ༡༩༧༦ བར་ལྡི་ལི་སྐུ་ཚབ་དོན་གཅོད་ཀྱི་ལས་འཁུར་ཞུས། ཕྱི་ལོ་ ༢༠༢༢ ཟླ་ ༧ ཚེས་ ༢༨ ཉིན་གྱི་ཆུ་ཚོད་ ༡༢།༡༧ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་བྱུང་ཡོད་པ་བཅས། །
