༄༅། །ཕྱི་ལོ་ ༢༠༢༢ ཟླ་བ་ ༠༦ ཚེས་ ༣༠ ཉིན་འཕྲིན་ལས་ཆོས་སྐྱིད་ལགས་ཀྱི་སུད་སི་སྐུ་ཚབ་དོན་གཅོད་ཀྱི་ལས་འཁུར་དངོས་སུ་དབུ་འཛུགས་ཞུས་ཡོད།
དེ་ཡང་ཕྱི་ཚེས་ ༢༩ དང་ ༣༠ བཅས་ཉིན་གཉིས་རིང་སྤྲོད་དཔང་བལ་ཇེམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་དབུ་བཞུགས་ཐོག་སུད་སི་སྐུ་ཚབ་དོན་གཅོད་གསར་རྙིང་བར་རྩིས་སྤྲོད་རྩིས་ལེན་གནང་ཡོད་པ་དང་། ཕྱི་ཚེས་ ༣༠ ཉིན་རྩིས་སྤྲོད་རྩིས་ལེན་ལེགས་གྲུབ་བྱུང་རྗེས་མཛད་སྒོ་སྟབས་བདེ་ཞིག་ཚོགས་ཤིང་། སྐབས་དེར་ལས་འཁྱུར་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་སྐུ་ཚབ་དོན་གཅོད་གསར་པ་འཕྲིན་ལས་ཆོས་སྐྱིད་ལགས་སུ་དགའ་བསུའི་འཚམས་འདྲི་དང་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་གནང་རྗེས་ཚབ་གསར་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ལས་འཁྱུར་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་བོད་དོན་སྤྱི་དང་སྒོས་སུ་བོད་མིའི་སྒྲིག་འཛུགས་སུ་སྲི་ཞུ་ཞབས་འདེགས་ཡུན་རིང་བསྒྲུབས་པར་ཐུགས་རྗེ་ལེགས་འབུལ་ཞུས་ཡོད།
ལས་འཁྱུར་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་མི་ལོ་བཅུ་ཕྲག་གཉིས་ཙམ་རིང་བོད་མིའི་སྒྲིག་འཛུགས་སུ་ལས་གནས་སྣ་ཚོགས་ཐོག་ཞབས་ཞུ་བསྒྲུབས་ཡོད་པ་དང་། ཕྱི་ལོ་༢༠༡༩ ལོར་སུད་སི་སྐུ་ཚབ་དོན་གཅོད་དུ་བསྐོ་བཞག་མ་གནང་སྔོན་ཁོང་ཉིད་ཀྱིས་ནང་སྲིད་ལས་ཁུངས་ཀྱི་དྲུང་ཆེ་གནང་ཡོད་པ་རེད།
ཚབ་གསར་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ནི་ཨ་རིའི་ཧར་ཝཊ་ཁྲིམས་ལུགས་མཐོ་སློབ་ནས་སློབ་ཐར་སོན་ཞིང་། ཕྱི་ལོ་ ༢༠༡༩ ཟླ་བ་ ༠༩ ནས་ཕྱི་ལོ་ ༢༠༢༡ ཟླ་བ་ ༠༨ བར་སུད་སི་སྐུ་ཚབ་དོན་ཁང་གི་འགྲོ་བ་མིའི་ཐོབ་ཐང་དང་འབྲེལ་བའི་དམིགས་བསལ་ལས་བྱེད་དུ་བསྐོ་བཞག་གནང་ཡོད་པ་དང་། དེའི་སྔོན་ཕྱི་ལོ་ ༢༠༡༨ ནས་ཕྱི་ལོ་ ༢༠༡༩ བར་ལོ་གཅིག་རིང་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་ནང་ཉམས་ཞིབ་པའི་ཕྱག་ལས་གནང་ཡོད་པ་རེད།།
