༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་རྡ་ས་མེག་གྷན་དུ་རྟེན་གཞི་བྱས་པའི་བོད་ཀྱི་གསོལ་མགྲོན་ཁང་དུ་ཕྱི་ལོ་ ༢༠༢༢ ཟླ་ ༧ ཚེས་ ༢༦ ནས་ ༢༨ བར་ཉིན་གྲངས་གསུམ་རིང་སློབ་གྲྭ་ཁག་གི་མདུན་ལམ་སློབ་སྟོན་པ་དང་། དགེ་རྒན། དེ་བཞིན་འཕྲོད་ལས་པ་བཅས་ལ་མྱོས་རྫས་ལང་ཤོར་སྔོན་འགོག་དང་འབྲེལ་བའི་ཚོགས་འདུ་དང་ཟབ་སྦྱོང་ཞིག་དབུ་འཛུགས་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། དྲུང་འཕར་བྱམས་པ་ཕུན་ཚོགས་ལགས། ཟུང་དྲུང་བསྟན་འཛིན་ཀུན་བཟང་ལགས། འབྲེལ་ཡོད་ལས་བྱེད། དེ་བཞིན་ཚོགས་བཅར་བ་བཅས་ལྷན་འཛོམས་ཀྱིས་ཐོག་མར་ཟུང་དྲུང་བསྟན་འཛིན་ཀུན་བཟང་ལགས་ཀྱིས་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་འཚམས་འདྲི་དང་འབྲེལ་གསུང་བཤད་གནང་དོན། རང་རེའི་སྤྱི་ཚོགས་ནང་མི་འབོར་འཕེལ་རྒྱས་འགྲོ་གི་མེད་པ་ཧ་ཅང་གསལ་པོ་རེད། མི་འབོར་ཉུང་དུ་ཕྱིན་ན། འཛམ་གླིང་སྟེང་འགྲོ་བ་མི་ཐེར་འབུམ་བདུན་ཡོད་པའི་ནང་རིམ་བཞིན་བརླག་འགྲོ་བའི་ཉེན་ཀ་ཧ་ཅང་ཡོད་པ་ང་ཚོ་ཚང་མའི་བསམ་བློ་ནང་དགོངས་དགོས། མི་འབོར་ཉུང་དུ་འགྲོ་བའི་སྐབས་སུ་སློབ་གྲྭ་ཁག་གི་གནས་སྟངས་སྐོར་རྣམ་པ་ཚོས་མཁྱེན་གྱི་རེད། བཙན་བྱོལ་བོད་མིའི་སློབ་གྲྭ་ཁག་གི་ནང་སློབ་ཕྲུག་ཉུང་དུ་འགྲོ་བཞིན་ཡོད་པ་དང་། དེ་བཞིན་དགོན་སྡེ་ཁག་གི་ནང་བོད་པའི་དགེ་འདུན་པ་གསར་ཞུགས་གནང་མཁན་ཉུང་དུ་འགྲོ་བཞིན་ཡོད་པ་ནི་ཁྱོན་ཡོངས་ནས་བོད་མིའི་མི་འབོར་ཉུང་དུ་འགྲོ་བཞིན་པའི་རྟགས་མཚན་ཧ་ཅང་གསལ་པོ་རེད། མི་འབོར་ཉུང་ངུ་ཡོད་ནའང་སྤུས་ཀ་དག་པོ་ཡོད་པ་ཞིག་དགོས། དེ་ལྟར་ཡོང་བར་ནུས་པ་མཉམ་སྤུངས་དགོས། ནུས་པ་མཉམ་སྤུངས་ཡོང་བར་ཁྱོན་ཡོངས་ཀྱི་གནས་སྟངས་ཤེས་དགོས།
ནུས་པ་མཉམ་དུ་སྤུངས་པར་ཕྲུ་གུ་ཆུང་ཆུང་སྐྱེས་པ་ནས་བཟུང་མཐོ་སློབ་མ་འཐོན་གྱི་བར་ལུས་སེམས་བདེ་ཐང་དགོས། ལུས་སེམས་བདེ་ཐང་མེད་ན་སློབ་སྦྱོང་བྱེད་ཐུབ་ཀྱི་མ་རེད། དེང་སྐབས་འཁྲུག་ཆ་དོད་པོའི་སྤྱི་ཚོགས་ནང་དགེ་རྒན་ངོས་ནས་རྩུབ་པོ་བྱས་ནས་བསླབ་བྱ་བརྒྱབ་ན་འགྲོ་ས་མེད་པ་རེད། དེར་བརྟེན་སེམས་ཁམས་དང་མཐུན་པའི་བསླབ་བྱ་བརྒྱབ་ནས་བཟང་ཕྱོགས་སུ་འཁྲིད་རྒྱུའི་སྟོབས་དང་ནུས་པ་གཙོ་བོ་དེ་རེད། ཅེས་སོགས་ཀྱི་གསུང་བཤད་གནང་གྲུབ་མཚམས་དྲུང་འཕར་བྱམས་པ་ཕུན་ཚོགས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས། །
