༄༅། །བོད་ཀྱི་དུས་བབ་གསར་ཁང་ནས་གནས་ཚུལ་སྤེལ་བ་ལྟར་ན། ཉེ་སྔོན་རྒྱ་ནག་གཞུང་གིས་འཛིན་བཟུང་བྱས་པའི་བོད་ནག་ཆུ་ཨ་མདོ་རྫོང་ཁོངས་ནས་ཡིན་པའི་བོད་རིགས་བུད་མེད་འཛུམ་དཀར་ལགས་ཀྱི་གཅུང་མོ་གཡུ་སྒྲོན་ལགས་འཛིན་བཟུང་བཙན་ཁྲིད་བྱས་ཡོད་འདུག
དེ་ཡང་ཟླ་འདིའི་ཕྱི་ཚེས ༡༡ ཉིན་རྒྱ་གཞུང་ཉེན་རྟོག་པས་བོད་ནག་ཆུ་ཨ་མདོ་རྫོང་རྩ་རིང་གྲོང་རྡལ་ནས་ཡིན་པའི་བོད་རིགས་བུད་མེད་གཡུ་སྒྲོན་ཞེས་པ་ཞིག་འཛིན་བཟུང་བཙན་ཁྲིད་བྱས་ཡོད་པ་དང་། ཁོང་མོ་ནི་ཟླ་སྔོན་མའི་ཕྱི་ཚེས་ ༢༣ ཉིན་༧གོང་ས་མཆོག་གི་སྐུ་པར་བཤམས་ཡོད་ལུགས་ཀྱི་ཉེས་མིང་འོག རང་ཁྱིམ་ནས་འཛིན་བཟུང་བྱས་པའི་བོད་རིགས་བུད་མེད་འཛུམ་དཀར་ལགས་ཀྱི་ཕ་མ་གཅིག་གི་གཅུང་མོ་ཡིན་འདུག
འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། ཟླ་འདིའི་ཕྱི་ཚེས་ ༡༡ ཉིན་གྱི་ཐོ་རེངས་ཙམ་ལ་འཛུམ་དཀར་ལགས་ཀྱི་གཅུང་མོ་གཡུ་སྒྲོན་ལགས་འཛིན་བཟུང་བྱས་ཏེ། ལྷ་སའི་བཀག་ཉར་ཁང་ཞིག་ཏུ་བཙན་ཁྲིད་བྱས་ཡོད་ལུགས་དང་། འཛུམ་དཀར་ལགས་བཙན་ཁྲིད་བྱས་ནས་ཉིན་གྲངས་ ༢༠ ལྷག་འགྲོ་ཡི་ཡོད་ནའང་། ཁོང་སྤུན་གཉིས་ཀྱི་གནས་ཚུལ་ཁ་གསལ་གང་ཡང་ཤེས་རྟོགས་ཐུབ་ཀྱི་མེད་སྐོར་བརྗོད་བྱུང་།
འདི་ལོའི་ཕྱི་ཟླ་ ༥ ནས་བཟུང་བོད་ཀྱི་རྒྱལ་ས་ལྷ་ས་གཙོ་བྱས་ཏེ་བོད་ཀྱི་ས་ཁུལ་མང་པོར་ཡུལ་མི་དང་ཡུལ་སྐོར་བ་སོགས་ལ་གང་བྱུང་ལག་ཁྱེར་ཁ་པར་དང་ཁྱིམ་དུ་སྔོག་བཤེར་བྱས་ཏེ། ༧གོང་ས་མཆོག་གི་སྐུ་པར་ཡོད་མེད་དང་། བཙན་བྱོལ་ནང་སྤུན་མཆེད་དང་ངོ་ཤེས་གྲོགས་པོ་སོགས་ཡོད་མེད་འདྲི་རྩད་དང་ཉེས་འདོགས་སྣ་ཚོགས་བྱས་དང་བྱེད་མུས་ཡིན་ལ། སྲིད་གཞུང་གི་ལས་བྱེད་དང་སློབ་ཕྲུག་རྣམས་དགོན་པར་མཇལ་སྐོར་དང་གསུང་ཆོས་ཞུ་ས་སོགས་སུ་འགྲོ་མི་ཆོག་པའི་བཙན་བཀའ་གཏོང་གི་ཡོད་པ་རེད།
བུད་མེད་གཡུ་སྒྲོན་ལགས་ནི་རང་ལོ་ ༢༠ ཡས་མས་ཤིག་ཡིན་འདུག་ལ། བོད་ནག་ཆུ་ས་ཁུལ་ཨ་མདོ་རྫོང་རྩ་རིང་གྲོང་བརྡལ་ནས་ཡིན་པ་དང་། ཁོང་མོའི་གཅེན་མོ་འཛུམ་དཀར་ལགས་ནི་རང་ལོ་ ༢༧ ཡིན་ཞིང་། ཆུང་དུས་ནས་ཕ་མ་གཉིས་དང་ལྷན་དུ་འབྲོག་ལས་བྱས་ཏེ་འཚོ་བ་བསྐྱལ་ཡོད་པ་དང་། ཁྱིམ་ཚང་གི་གཞི་འཛིན་ཡང་ཡིན་འདུག །
