༄༅།།ཕྱི་ལོ་ ༢༠༢༢ ཟླ་ ༧ ཚེས་ ༡༥ ཉིན་རྒྱབ་ཆུ་ཚོད་ ༢།༡༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལྡི་ལི་བོད་སྒར་བསམ་ཡས་གླིང་དུ་འཚམས་གཟིགས་སུ་ཕེབས་འབྱོར་སྐབས་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་ལགས་དང་། ལྡི་ལི་དོན་གཅོད་ཁང་གི་དྲུང་ཆེ་དོན་གྲུབ་རྒྱལ་པོ་ལགས། ལྡི་ལི་བསམ་ཡས་གླིང་ས་གནས་འགོ་འཛིན་རྡོ་རྗེ་ཚེ་རིང་ལགས། བསམ་ཡང་གླིང་གི་བརྒྱ་དཔོན་ཀརྨ་རྡོ་རྗེ་ལགས།  དེ་བཞིན་ས་གནས་བོད་ཀྱི་གཞོན་ནུ་ཚོགས་པ་དང་། ས་གནས་བོད་ཀྱི་བུད་མེད་ཚོགས་པ་སོགས་ཚོགས་པ་སྐྱིད་སྡུག་ཁག་གི་སྐུ་ཚབ་རྣམ་པ་དང་། གཞན་ཡང་བོད་ཁྱིམ་ཉིན་སློབ་ཀྱི་སློབ་ཕྲུག་དང་སེར་སྐྱ་མི་མང་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།དེ་ཡང་དཔལ་ལྡན་སྲིད་སྐྱོང་མཆོག་གིས་ལྡི་ལི་བསམ་ཡས་གླིང་ས་གནས་འགོ་འཛིན་ལས་ཁུངས་དང་། ཡན་ལག་སྨན་རྩིས་ཁང་། ས་གནས་འཕྲོད་བསྟེན་སྨན་ཁང་། བོད་ཁྱིམ་ཉིན་སློབ། ས་གནས་གཞོན་ནུ་དང་བུད་མེད་ལྷན་ཚོགས། ས་གནས་རང་བདེན་ཚོགས་ཆུང་། བརྒྱ་འཐུས་ལས་ཁུངས་བཅས་སུ་འཚམས་གཟིགས་དང་། འབྲས་སྤུངས་སྔགས་པ་གྲྭ་ཚང་དང་བྱང་ཆུབ་ལྷ་ཁང་བཅས་སུ་གནས་གཟིགས་གནང་རྗེས་དཔལ་ལྡན་སྲིད་སྐྱོང་མཆོག་གིས་བོད་ཁྱིམ་ཉིན་སློབ་ཏུ་མང་ཚོགས་ལ་གསུང་བཤད་གནང་དོན།

བཀའ་ཤག་ལ་ལས་འགན་གཙོ་བོ་གཉིས་ཡོད་པའི་ནང་ནས་གཅིག་ནི། བོད་རྒྱའི་དཀའ་རྙོག་སེལ་རྒྱུ་དང་། གཉིས་པ་ནི། བཙན་བྱོལ་ནང་ཡོད་པའི་བོད་མིའི་བདེ་དོན་ལྟ་རྒྱུ་དེ་རེད། བོད་མི་མང་སྤྱི་འཐུས་ལྷན་ཚོགས་ནས་གཏན་ལ་ཕབ་པའི་སྲིད་བྱུས་དེ་ཡང་བོད་རྒྱའི་དཀའ་རྙོག་སེལ་སླད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གྲོས་འགོ་བཏོན་པ་དང་། མང་ཚོགས་ནང་བསམ་ཚུལ་བསྡུས་པའི་ཐོག་ནས་མང་ཚོགས་མང་བས་དེར་རྒྱབ་སྐྱོར་གནང་ཡོད་པ་དང་། མཐར་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བའི་སྐབས་རྒྱ་ནག་ནང་གི་ཆབ་སྲིད་འགྱུར་འགྲོས་དང་བོད་ནང་གི་ཆབ་སྲིད་འགྱུར་འགྲོས། རྒྱལ་སྤྱིའི་ཆབ་སྲིད་འགྱུར་འགྲོས་བཅས་གཞི་ལ་བཞག་ནས་སྐབས་དུས་སོ་སོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་ཐག་གང་བཅད་པ་ཡིན་ནའང་དེར་ཤར་བསྐྱོད་བྱེད་རྒྱུར་མི་མང་མང་ཆེ་བས་དགོངས་ཚུལ་གསུངས་པ་ལྟར་བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཐོག་གཏན་ལ་ཕབ་ཡོད། དེར་བརྟེན་དབུ་མའི་ལམ་གྱི་སྲིད་བྱུས་ནི་བོད་མི་མང་སྤྱི་འཐུས་ལྷན་ཚོགས་ནས་གཏན་ལ་ཕབ་པའི་སྲིད་བྱུས་ཤིག་རེད། འདི་མུ་མཐུད་རང་སོར་གནས་རྒྱུ་དུས་རྒྱུན་དུ་ང་ཚོས་ཞུ་བཞིན་པ་དེ་རེད།

བཀའ་ཤག་སྐབས་ ༡༦ པས་ལས་དོན་གང་བྱེད་པ་ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཟུང་སྒྲུབ་ཀྱི་ཡིན་ཞེས་པའི་ཆ་ཤས་ཐོག་ནས་ཆབ་སྲིད་ཀྱི་ལས་དོན་དེ་འདིའི་ཐོག་ནས་བསྒྲུབ་དགོས། དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་དགོས་ན། རྒྱ་ནག་གཞུང་དང་མཉམ་དུ་སྐད་ཆ་བཤད་ནས་མ་གཏོགས་སེལ་རྒྱུ་མེད་པ་ཤེས་དགོས། གང་ལྟར་སྐད་ཆ་བཤད་ནས་སེལ་དགོས་ཀྱི་ཡོད་སྟབས། རྒྱལ་ནག་ལ་ཕར་སྙོབ་རྒྱུའི་ཐབས་ཤེས་ང་ཚོས་བྱེད་དགོས་ཀྱི་ཡོད། ད་ལྟའི་དུས་སུ་ང་ཚོས་འབྲེལ་བ་གང་དུ་བྱེད་བཞིན་ཡོད་པ་དང་ཇི་ལྟར་བྱེད་བཞིན་པ་་ཡོད་པ་དེ་དག་མང་ཚོགས་ལ་ཞུ་མི་དགོས་པ་གྱིས། གང་ཡིན་ཟེར་ན་དེ་དག་མང་ཚོགས་ལ་ཞུ་པ་ཡིན་ན། འབྲེལ་བ་ཕྲན་བུ་ཡོང་བཞིན་ཡོད་པ་དེར་ཕན་གྱི་ཡོད་དམ་གནོད་ཀྱི་ཡོད། གང་འདྲ་ཆགས་ཀྱི་ཡོད་ཞུ་དཀའ་བར་བརྟེན། གནད་དོན་འདི་དང་འབྲེལ་བའི་གནས་ཚུལ་ཁ་ཤས་ཤིག་ད་ལྟའི་ཆར་མང་ཚོགས་ལ་ཞུ་ཐུབ་ཀྱི་མ་རེད། འོན་ཀྱང་གནས་ཚུལ་བྱུང་རྗེས་གནས་སྟངས་གང་ཆགས་ཡོད་མེད་གསལ་པོ་བཟོ་ཆོག་གི་རེད།

རྒྱ་ནག་དང་མཉམ་དུ་སྐད་ཆ་བཤད་ནས་བོད་རྒྱའི་དཀའ་རྙོག་སེལ་མ་ཐུབ་ཀྱི་བར་བོད་མིའི་སྒྲིག་འཛུགས་ཀྱི་ལངས་ཕྱོགས་ནི། བོད་རྒྱ་ནག་གི་ཆ་ཤས་ཡིན་ཞེས་དུས་ནམ་ཡང་རྩིས་ཐུབ་རྒྱུ་མེད། བཙན་བྱོལ་དུ་ཡོད་པའི་བོད་མི་རྣམས་གཞིས་བཞུགས་བོད་མིའི་མགྲིན་ཚབ་པ་དང་སྐུ་ཚབ་ཡིན་ཞེས་བརྗོད་ཀྱི་ཡོད། དེར་བརྟེན་བོད་ནང་ད་ལྟའི་དངོས་ཡོད་གནས་ཚུལ་གང་ཆགས་ཀྱི་ཡོད་པ་ཞིབ་འཇུག་ཚད་དང་ལྡན་པ་བྱེད་མ་ཐུབ་ན། རྒྱལ་སྤྱིའི་སྟེང་བོད་ནང་གི་བོད་མིའི་མགྲིན་ཚབ་པ་བྱས་ཏེ་འགྲོ་བའི་སྐབས་གནས་ཚུལ་དངོས་བདེན་མིན་པ་དེ་འདྲ་བཤད་པ་ཡིན་ན། ང་ཚོ་དང་རྒྱ་ནག་དབར་ཁྱད་པར་མེད་པ་ཆགས་ཀྱི་ཡོད། དེར་བརྟེན་དངོས་ཡོད་གནས་ཚུལ་གང་ཡིན་པ་ཇི་མ་ཇི་བཞིན་རྒྱལ་སྤྱིའི་སྤྱི་ཚོགས་ནང་སྐྱེལ་ཐུབ་པ་བྱེད་རྒྱུ་ཧ་ཅང་གལ་ཆེན་པོ་རེད། ཅེས་དང་།གཙོ་བོ་རྒྱ་ནག་དམར་ཤོག་གཞུང་གི་བཅིངས་གྲོལ་དམག་གིས་བོད་ལ་དབང་བསྒྱུར་མ་བྱས་གོང་བོད་ནི་རང་བཙན་གཙང་མའི་རྒྱལ་ཁབ་ཅིག་ཡིན་པ་མཁས་དབང་དང་ཉམས་ཞིབ་པ་སོགས་ཀྱིས་ཁ་གཅིག་གྲག་ཏུ་བརྗོད་ཀྱི་ཡོད་སྐོར་དང་། བོད་ཀྱི་མི་རབས་གསར་པའི་གཞོན་སྐྱེས་རྣམས་ནས་བོད་ཀྱི་དངོས་ཡོད་ལོ་རྒྱུས་སྐོར་སློབ་སྦྱོང་བྱེད་དགོས་པ།  ཕྱི་ལོ་ ༢༠༢༢ ཟླ་ ༠༦ ཚེས་ ༢༢ དང་ ༢༣ བཅས་ཉིན་གྲངས་གཉིས་རིང་ཨ་རིའི་རྒྱལ་ས་ཝ་ཤིན་ཊོན་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པ་ཚོགས་པ་དང་བསྟུན་ཕྱི་ཚེས་ ༢༣ ཉིན་ཨ་རིའི་གྲོས་ཚོགས་ཀྱི་ཚོགས་ཁང་ནང་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་མདུན་དུ་བོད་དོན་སྐོར་ཉན་ཞིབ་ལས་རིམ་ཞིག་ཚོགས་ཡོད་པ་དང་། སྐབས་དེར་རྒྱལ་སྤྱིའི་ཁྲིམས་ལུགས་མཁས་དབང་སྐུ་ཞབས་མཱ་ཡི་ཀེལ་ཝན་ཝལ་ཊི་ (Michael Van Walt) ལགས་དང་རྒྱ་རིགས་མཁས་དབང་སྐུ་ཞབས་ལིག་ཧན་ཁྲིན་ (Hon-Shiang Lau) ལགས་རྣམ་གཉིས་ནས་ལོ་རྒྱུས་ཐོག་བོད་འདི་རྒྱ་ནག་གི་ཆ་ཤས་སུ་གྱུར་མྱོང་མེད་པའི་དཔང་རྟགས་ཁུངས་སྐྱེལ་ར་སྤྲོད་གནང་བ་མ་ཟད། ད་ལྟ་རྒྱ་ནག་གཞུང་གིས་ཆེད་མངགས་བོད་ཀྱི་ལོ་རྒྱུས་ལོག་བཤད་བྱས་ཏེ་འཛམ་གླིང་མི་མང་ལ་བསླུ་བྲིད་བྱེད་བཞིན་པ་ནི་རྒྱལ་སྤྱིའི་ཁྲིམས་དང་འགལ་ཡོད་པ་སོགས་གསུངས་པའི་སྐོར་དྲན་གསོ་གནང་ཡོད།གཞན་ཡང་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་བཅུ་དྲུག་པའི་ལས་གཞི་གསར་པ་དང་བླངས་བོད་དོན་ཞུ་གཏུག་གི་རྒྱབ་ལྗོངས་དམིགས་ཡུལ་སྐོར་གསུངས་པ་མ་ཟད། བོད་མིའི་སྒྲིག་འཛུགས་ནས་བཙན་བྱོལ་བོད་མིའི་མི་འབོར་གྲངས་བཤེར་གྱི་ལས་གཞི་སྤེལ་བཞིན་ཡོད་པས་བོད་མི་མང་ཚོགས་ནས་ལས་གཞི་དེར་མཉམ་ཞུགས་གནང་དགོས་པའི་འབོད་སྐུལ་གནང་གྲུབ་མཚམས་མང་ཚོགས་ཀྱི་དྲི་བ་ཁག་ལ་ལན་འདེབས་གསལ་བཤད་གནང་ཡོད།

དེ་རྗེས་དཔལ་ལྡན་སྲིད་སྐྱོང་མཆོག་གིས་ལྡི་ལིའི་བྷུད་ཝི་ཧར་དུ་རྟེན་གཞི་བྱས་པའི་བོད་ཀྱི་སྣེ་ལེན་ཁང་དུ་འཚམས་གཟིགས་དང་། སྒྲོལ་མ་ལྷ་ཁང་ལ་གནས་གཟིགས་སུ་ཕེབས་ཡོད། མཐར་དཔལ་ལྡན་སྲིད་སྐྱོང་མཆོག་གིས་བོད་པའི་གསར་འགོད་པ་ཁག་གི་བཅར་འདྲི་ལ་དང་ལེན་གྱིས་ལན་འདེབས་ཁ་གསལ་གནང་ཡོད་པ་བཅས།།