༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༡༤ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་ཐེངས་བདུན་པ་བསྐོང་ཚོགས་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་དགུ་པའི་ཐོག་སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། སྐུ་བཅར་སྨན་པ་བསྟན་འཛིན་ལྷ་སྒྲོན་ལགས། བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས། བོད་ཀྱི་སྨན་རྩིས་ཁང་གི་འགན་འཛིན་ཐུབ་བསྟན་ཚེ་རིང་ལགས། འཕྲོད་བསྟེན་དྲུང་འཕར་བྱམས་པ་ཕུན་ཚོགས་ལགས་ཀྱིས་གཙོས་ཕྱོགས་མཐའ་ཁག་ནས་ཕེབས་པའི་སྨན་པ་དང་། སྨན་ཁང་གི་འགན་འཛིན། འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་བཅས་ལྷན་འཛོམས་ཐོག་ཚོགས་འདུའི་དབུ་འབྱེད་མཛད་སྒོ་ཚོགས་ཡོད་པ་དང་། སྐབས་དེར་སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཐེངས་འདིའི་འཕྲོད་བསྟེན་བསྐྱར་ཞིབ་ཚོགས་འདུ་འདི་བརྒྱུད་བོད་མིའི་འཕྲོད་བསྟེན་ལྟ་རྟོག་གནང་ཕྱོགས་ཐད་ལམ་སྟོན་གསལ་པོ་ཡོང་བའི་རེ་བ་ཡོད་སྐོར་དང་། ཚོགས་འདུ་འདི་བཞིན་གཙོ་བོ་འདས་པའི་ལོ་ཤས་ནང་བཙན་བྱོལ་བོད་མིའི་སྤྱི་ཚོགས་ཁྲོད་ཁྱབ་གདལ་ཆེ་ཞིང་ནད་པའི་གྲངས་ཚད་མཐོ་པོར་ཡོད་པའི་ནད་གཞི་རིགས་ལ་དམིགས་སུ་བཀར་ནས་སྔོན་འགོག་དང་སྨན་བཅོས་ཐབས་ལམ་ཐད་བགྲོ་གླེང་གནང་རྒྱུ་ཡིན་པ་དང་ཆབས་ཅིག སེམས་ཁམས་འཕྲོད་བསྟེན་ཡང་དེང་སྐབས་སྤྱི་ཚོགས་ཁྲོད་དགོས་གལ་ཆེ་བ་བཞིན་དེའི་ཐོག་ཀྱང་བགྲོ་གྲེང་གནང་རྒྱུ་ཡིན་པ་ངོ་སྤྲོད་གནང་སོང་།
དེ་མཚུངས་ཁོང་གིས་ཚོགས་འདུའི་དགོས་དམིགས་གཙོ་བོ་ནི་བོད་མིའི་སྤྱི་ཚོགས་ཀྱི་མ་འོངས་པའི་འཕྲོད་བསྟེན་ལམ་སྟོན་ཐད་བགྲོ་གླེང་གནང་རྒྱུ་དང་། དེ་དང་ཆབས་ཅིག་བཙན་བྱོལ་བོད་མིའི་འཕྲོད་བསྟེན་དང་འབྲེལ་བ་ཡོད་པའི་གཞུང་སྒེར་ཚོགས་སྡེ་སོ་སོའི་ཁྱབ་ཁོངས་སྨན་ཁང་དང་སྨན་པ་ཕན་ཚུན་བར་ལེགས་སྤེལ་ཉེས་འགོག་གི་བསམ་ཚུལ་བརྗེ་ལེན་ཡོང་རྒྱུའི་ཆེད་ཡིན་པ་ངོ་སྤྲོད་གནང་སོང་།
དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་སྒྲ་འཇུག་གསུང་འཕྲིན་ཀྱང་བསྟན་གནང་ཡོད་ཅིང་། དཔལ་ལྡན་སྲིད་སྐྱོང་མཆོག་གིས། དེ་རིང་འཕྲོད་བསྟེན་ལས་ཁུངས་ཀྱིས་འཕྲོད་བསྟེན་བསྐྱར་ཞིབ་ཀྱི་ཚོགས་འདུ་ཐེངས་བདུན་པ་གོ་སྒྲིག་ཞུས་ནས་ཉིན་གཉིས་རིང་འཚོག་རྒྱུའི་གཏན་ཁེལ་ཡོད། དེ་སྔ་འཕྲོད་བསྟེན་དྲུང་ཆེས་གསུངས་པ་ལྟར་ཚོགས་འདུར་བཅར་ནས་གོ་བསྡུར་ཞུ་དགོས་རིགས་གོ་བསྡུར་ཞུས་ན་བསམ་པ་རེད། འོན་ཀྱང་གློ་བུར་དུ་ལྡི་ལིར་འགྲོ་དགོས་བྱུང་སོང་། ཚོགས་བཅར་བ་རྣམས་ས་གནས་ཁག་འདྲ་མིན་ནས་ཕེབས་ཡོད་ཙང་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
དོན་དག་སྙིང་པོ་བསྐྱར་ཞིབ་བྱེད་པའི་སྐབས་ད་ལྟའི་གནས་སྟངས་ཐད་བསམ་བློ་གཏོང་དགོས། ང་ཚོ་ས་གནས་སུ་བཅར་སྐབས་ས་གནས་ཁག་ཏུ་ཁང་པ་དང་འཛུགས་སྐུན་གྱི་གནས་སྟངས་ཡག་པོ་འདུག ནང་གི་མཐུན་རྐྱེན་རིགས་ཀྱང་ཡག་པོ་ཡོད་པ་ལྟ་བུ་འདུག གཙོ་བོ་ས་གནས་སོ་སོར་བོད་མིའི་མི་འབོར་ག་ཚོད་འདུག་གམ། འཕྲོད་བསྟེན་ཡན་ལག་སྨན་ཁང་དུ་མཐུན་རྐྱེན་གང་དང་གང་འདུག རྒྱ་གར་གྱི་སྨན་ཁང་ཐག་ཉེ་ཤོས་གང་ཆགས་ཀྱི་འདུག དེ་དག་ལ་བལྟས་ནས་ང་ཚོས་མཐུན་རྐྱེན་གང་དང་གང་སྒྲུབ་དགོས་པ་བལྟ་རྒྱུ་གལ་ཆེན་པོ་རེད། གལ་ཆེ་ཤོས་དེ་ང་ཚོས་སྔོན་འགོག་གི་ལས་གཞི་སྒང་ལ་ཤུགས་རྒྱག་དགོས། དེ་འདྲ་སོང་ཙང་དེ་རིང་འདིར་ས་གནས་སྨན་ཁང་གི་འགན་འཛིན་དང་སྨན་པ། གཞན་འབྲེལ་ཡོད་སུ་ཕེབས་ཡོད་ནའང་གྲོས་བསྡུར་ལྷུག་པོ་གནང་རོགས། འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་སུ་ཚོགས་འདུའི་གཙོ་སྐྱོང་གནང་རོགས་ཞེས་མངགས་ཡོད། ཚོགས་འདུར་ཕྲན་རང་བཅར་མ་ཐུབ་པར་དགོངས་སེལ་ཞུ་རྒྱུ་དང་མ་འོངས་པར་མཇལ་ཆོག་པ་ཞུ་རྒྱུ། ཞེས་གསུངས་སོང་།
སྤྱིར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་བཙན་བྱོལ་བོད་མིའི་འཕྲོད་བསྟེན་བདེ་སྡུག་ལྟ་རྟོག་གི་ལམ་སྟོན་གཏན་འབེབས་ཆེད་ལོ་གཉིས་རེའི་མཚམས་སུ་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་འདུ་འཚོག་གི་ཡོད་པ་ལྟར། ཚོགས་ཐེངས་བདུན་པ་ཕྱི་ལོ་༢༠༢༢ ཟླ་བ་ ༠༧ ཚེས་ ༡༤ དང་། ༡༥ བཅས་ཉིན་གཉིས་རིང་འཚོག་གི་ཡོད་པ་རེད། ཚོགས་འདུའི་ཐོག་རྡ་ས་གཙོས་ས་གནས་ཁག་བཅུ་གསུམ་གྱི་སྨན་པ་དང་སྨན་ཁང་འགན་འཛིན། དེ་བཞིན་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་བཅས་ཁྱོན་མི་གྲངས་ ༥༠ ཙམ་མཉམ་ཞུགས་གནང་གི་འདུག སྐབས་དེར་ཚོགས་བཅར་བ་རྣམས་ནས་གཙོ་བོ་བཙན་བྱོལ་བོད་མིའི་སྤྱི་ཚོགས་ཁྲོད་ནད་གཞི་གྲངས་ཐོ་མང་བ་ལྔའི་སྐོར་དང་། གཞན་ཡང་སེམས་ཁམས་འཕྲོད་བསྟེན། སྨྱོ་རྫས་ངན་གོམས་དང་གཉན་ནད་རེག་དུག་གི་གནས་སྟངས་སོགས་ཀྱི་ཐོག་གྲོས་བསྡུར་གནང་རྒྱུ་ཡིན་འདུག་པ་བཅས།།
