༄༅། །ཕྱི་ལོ་ ༢༠༢༢ ཟླ་ ༧ ཚེས་ ༡༨ ཉིན་རྒྱ་གར་གྱི་རཱཇསྠན་ (Rajasthan) མངའ་སྡེའི་རྒྱལ་ས་ཇཡ་པུར་ནང་རྟེན་གཞི་བྱས་པའི་རེ་ནེ་སི་ཊི་གསོལ་མགྲོན་ཁང་ (Renest Hotel) གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་འགན་འཛིན་སྡེ་ཚན་ཁོངས་གཏོགས་ཀྱི་སྲི་ཞུའི་ལས་བྱེད་ཁག་གཅིག་གི་སླད་དུ་འགོ་ཁྲིད་ཟབ་སྦྱོང་གི་དབུ་འབྱེད་མཛད་སྒོ་ཚོགས་ཡོད་པ་དང་། དབུ་འབྱེད་མཛད་སྒོར་སྐུ་མགྲོན་གཙོ་བོ་བྷརཏ་ཏི་བྦཏ་སམནྭཡ་སཾགྷ་ཞེས་པའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་སྐུ་ཞབས་སོ་རབ་སཱ་རཱས་བྷཏ་ (Sh. Saurabh Saraswat) ལགས་དང་། ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས། ཟབ་སྦྱོང་གི་ཁྱད་སྟོན་མི་སྣ་གཙོ་བོ་ཨ་ཤིཤ་ཇོ་རི་ (Dr. Ashish Johri ) ལགས་སོགས་ཕེབས་ཡོད།

དེ་ཡང་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་དབུ་འབྱེད་མཛད་སྒོར་ཕེབས་བསུའི་གསུང་བཤད་གནང་སྐབས་ཟབ་སྦྱོང་གི་གལ་གནད་དང་།  མཉམ་ཞུགས་པ་ཡོངས་ཀྱིས་ཟབ་སྦྱོང་གི་སྐབས་སུ་རྣམ་གཡེང་མེད་པར་དོ་སྣང་གནང་སྟེ་སློབ་སྦྱོང་གནང་དགོས་པ་སོགས་ཀྱི་སྐོར་གསུངས་ཡོད། གཞན་ཡང་ཁོང་གིས་ཟབ་སྦྱོང་གྲུབ་རྗེས་མཉམ་ཞུགས་པ་རྣམས་ནས་སོ་སོའི་ལས་ཁུངས་སུ་བརྗོད་གཞི་གང་རུང་ཞིག་གི་ཐོག་སྤྱན་བསྟར་དང་ཉམས་མྱོང་སྤེལ་རེས་གནང་དགོས་པ་སོགས་ཀྱི་སྐོར་གསུངས་ཡོད།ཟབ་སྦྱོང་གི་ཁྱད་སྟོན་མི་སྣ་གཙོ་བོ་ཨ་ཤིཤ་ཇོ་རི་ (Dr. Ashish Johri ) ལགས་ཀྱིས་འགོ་ཁྲིད་སྦྱོང་བརྡར་བསྟི་གནས་ཁང་ (Synergie HR) ཞེས་པའི་སྐོར་དང་། ཐེངས་འདིའི་འགོ་ཁྲིད་ཟབ་སྦྱོང་གི་སྐོར་ངོ་སྤྲོད་གསུང་བཤད་གནང་བ་དང་། སྐུ་མགྲོན་གཙོ་བོ་སྐུ་ཞབས་སོ་རབ་སཱ་རཱས་བྷཏ་ལགས་ཀྱིས་ལས་ཀ་དང་ཞབས་ཞུ་གཉིས་ཀྱི་ཁྱད་པར་སྐོར་འགྲེལ་བརྗོད་དང་། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པ་ཡོངས་ནས་བོད་མིའི་ཆབ་སྲིད་ཀྱི་མངོན་འདོད་མ་འགྲུབ་བར་དུ་སྲི་ཞུ་བསྒྲུབ་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་ཡོད།

མཐར་ལས་བྱེད་འདེམས་བསྐོ་ལྷན་ཁང་གི་འབྲེལ་ཡོད་ལས་བྱེད་བཀྲ་ཤིས་བདེ་སྐྱིད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་དབུ་འབྱེད་མཛད་སྒོ་ལེགས་པར་གྲུབ་ཡོད་པ་དང་།  ཐེངས་འདིའི་འགོ་ཁྲིད་ཀྱི་ཟབ་སྦྱོང་དེ་བཞིན་ཕྱི་ཚེས་ ༡༨ ཉིན་དབུ་འཛུགས་ཀྱིས་ཉིན་གྲངས་དྲུག་རིང་ཚོགས་གཏན་ཁེལ་ཡོད་པ་བཅས།།