༄༅། །ཕྱི་ལོ་ ༢༠༢༢ ཟླ་ ༧ ཚེས་ ༢༤ ཉིན་སུད་སི་མདོ་སྨད་ས་གནས་རྒྱུན་ལས་ཀྱི་གོ་སྒྲིག་འོག་སུད་སིར་རྟེན་གཞི་བྱས་པའི་རི་ཀོན་ཆོས་འཁོར་དགོན་དུ་བོད་ཀྱི་ཆབ་སྲིད་བཙོན་ཟུར་གྲགས་ཅན་འཇིགས་མེད་རྒྱ་མཚོ་ལགས་ཀྱི་ཆེད་མཆོད་འབུལ་སྨོན་ལམ་ཚོགས་ཡོད།
དེ་ཡང་མཆོད་འབུལ་སྨོན་ལམ་ཐོག་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། ཡོ་རོབ་སྤྱི་འཐུས་ཟུར་པ་རྣམ་པ། སུད་སི་དང་ལིག་ཊིན་སི་ཊེན་བོད་རིགས་མི་མང་གི་ཚོགས་གཞོན། ས་གནས་ཀྱི་མདོ་སྟོད་དང་མདོ་སྨད། དབུས་གཙང་ཆོལ་ཁ་བཅས་ཀྱི་ཚོགས་གཙོ། ས་གནས་བོད་མི་སོགས་མཉམ་འཛོམས་ཐོག་རི་ཀོན་ཆོས་འཁོར་དགོན་པའི་མཁན་པོ་ཐུབ་བསྟན་ལེགས་སྨོན་ལགས་ཀྱིས་མཆོད་འབུལ་སྨོན་ལམ་འགོ་འཛུགས་གནང་།
སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས། སུད་སི་མདོ་སྨད་ས་གནས་རྒྱུན་ལས་ནས་བོད་ཀྱི་ཆབ་སྲིད་བཙོན་ཟུར་གྲགས་ཅན་འཇིགས་མེད་རྒྱ་མཚོ་ལགས་ཀྱི་ཆེད་མཆོད་འབུལ་སྨོན་ལམ་གོ་སྒྲིག་གནང་བར་བསྔགས་བརྗོད་དང་། ཆབ་སྲིད་བཙོན་ཟུར་གྲགས་ཅན་འཇིགས་མེད་རྒྱ་མཚོ་ལགས་ཀྱིས་རྒྱ་ནག་གི་བཙོན་ཁང་ནང་ཇི་ལྟར་སྡུག་སྦྱོང་མནར་གཅོད་མྱངས་པའི་སྐོར་བརྙན་ཐུང་བརྒྱུད་བདེན་དཔང་གཟབ་རྒྱས་གནང་ཡོད་སྟབས། བོད་མི་ཚོས་བརྙན་ཐུང་དེར་གཟིགས་རྒྱུ་གལ་གནད་ཆེ་བའི་སྐོར་དང་། གཞིས་ལུས་བོད་མི་རྣམས་ཀྱིས་ཞུམ་པ་མེད་པའི་ཐོག་ནས་བོད་མིའི་བདེན་དོན་རྩོད་བཞིན་ཡོད་པས་བོད་མི་ཚང་མ་མཉམ་རུབ་ཀྱིས་བོད་མིའི་བདེན་དོན་རྩོད་དགོས་པའི་རེ་སྐུལ་ཞུས་གནང་ཡོད།
བོད་ཀྱི་ཆབ་སྲིད་བཙོན་ཟུར་གྲགས་ཅན་བླ་བྲང་འཇིགས་མེད་རྒྱ་མཚོ་ལགས་སུ་རྒྱ་གཞུང་གིས་བཙོན་ཁང་དུ་མནར་གཅོད་ཚད་མེད་བཏང་རྐྱེན་མཐར་ཕྱི་ལོ་ ༢༠༢༢ ཟླ་བ་ ༠༧ ཚེས་ ༠༢ ཉིན་ཀན་ལྷོ་ཞིང་ཆེན་བོད་རིགས་ས་ཁུལ་གྱི་ཕུག་སྡེར་རང་ཁྱིམ་དུ་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་ཐོན་ཡོད། འཇིགས་མེད་རྒྱ་མཚོ་ལགས་ཐོག་མར་ཕྱི་ལོ་ ༢༠༠༦ ལོར་རྒྱ་གར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་ཆོས་ལ་བཅར་ནས་ཕྱིར་ལོག་རྗེས་འཛིན་བཟུང་བྱས་ཡོད་པ་དང་། དེ་རྗེས་ཕྱི་ལོ་ ༢༠༠༨ ལོར་རྒྱ་གཞུང་གི་གོ་སྒྲིག་བྱས་པའི་གསར་འགོད་པའི་སྐོར་སྐྱོད་སྐབས་གློ་བུར་དུ་ངོ་རྒོལ་སྐད་འབོད་ལངས་ཤིང་། སྐབས་དེར་རྒྱ་གཞུང་གིས་ཁོང་འཛིན་བཟུང་གིས་གཅར་རྡུང་དྲག་པོ་བཏང་ནས་ལོ་གཅིག་རྗེས་འདས་གྲོངས་སུ་འགྲོ་ཉེན་ཡོད་པ་མཐོང་སྟེ་འཕྲལ་དུ་གློད་བཀྲོལ་བཏང་།
ཕྱི་ལོ་ ༢༠༡༠ ལོར་ཁོང་སླར་ཡང་འཛིན་བཟུང་བྱས་ཏེ་ཟླ་དྲུག་རིང་མགྲོན་ཁང་དུ་བཀག་ཉར་གྱིས་ཆབ་སྲིད་ཀྱི་སློབ་གསོ་ཞེས་པ་སྤྲད་ནས་གློད་བཀྲོལ་བཏང་། དེ་ནས་བསྐྱར་དུ་ཕྱི་ལོ་ ༢༠༡༡ ལོར་ཀན་ལྷོ་མི་མང་འབྲིང་རིམ་ཁྲིམས་ཁང་གིས་ཁོང་ལ་རྒྱལ་ཁབ་ཁ་བྲལ་བཏང་བའི་ཉེས་མིང་འོག་ལོ་ལྔ་བཙོན་འཇུག་ཁྲིམས་ཐག་བཅད། ཕྱི་ལོ་ ༢༠༡༦ ཟླ་བ་ ༡༠ ཚེས་ ༢༦ ཉིན་བཙོན་གྲོལ་ཐོབ་པ་དང་རྒྱ་གཞུང་གིས་ཁོང་གི་ནང་མི་ཚོར་སྣེ་ལེན་རིགས་གོ་སྒྲིག་ཞུ་མི་ཆོག་པ་མ་ཟད། འཇིགས་མེད་རྒྱ་མཚོ་ལགས་ཀྱིས་གྲྭ་ཆས་ནམ་ཡང་གྱོན་མི་ཆོག་པའི་ཁར་དགོན་པར་སླར་ལོག་མི་ཆོག་པའི་བཙན་བཀའ་བཏང་ཡོད།
བླ་བྲང་འཇིགས་མེད་རྒྱ་མཚོ་ལགས་ཀྱིས་ཕྱི་ལོ་ ༢༠༢༢ ལོར་རྒྱ་ནག་གཞུང་གིས་ཁོང་ལ་མནར་གཅོད་ཚབས་ཆེ་བཏང་ཡོད་པའི་བདེན་དཔང་བརྙན་ཞིག་བཏོན་པ་དེ་ཉིད་དྲ་རྒྱའི་སྟེང་ཁྱབ་བརྡལ་ཆེན་པོ་བྱུང་ཞིང་། སྐབས་དེར་ཁོང་ལ་བཙོན་ཁང་ནང་རྡུང་རྡེག་མནར་གཅོད་དྲག་པོ་བཏང་ཚུལ་དང་། ཐེངས་མང་སྨན་ཁང་དུ་ལུས་པ། ཉིན་མང་པོ་ཟས་དང་ཆུ་མ་སྤྲད་པ། བཙན་པོས་ནོར་འཁྲུལ་ངོས་ལེན་བྱེད་དུ་བཅུག་པ་སོགས་ཀྱིས་རྐྱེན་བྱས་ཏེ་འདས་གྲོངས་སུ་འགྱུར་གྲབས་བྱས་པའི་གནས་ཚུལ་ཕྱིར་བསྒྲགས་གནང་ཡོད།།
