༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༢༠ ཉིན་བེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་ཡུ་རོབ་མཐུན་ཚོགས་ནང་ཡོད་པའི་ཀ་ཊ་ལོ་ནི་ཡ་ (Catalonia) གཞུང་གི་སྐུ་ཚབ་གྷོར་ཀ་ནོར་ (Gorka Knörr) ལགས་དང་མཇལ་འཕྲད་ཀྱིས་འཚམས་འདྲི་ཞུས་འདུག 

དེ་ཡང་མཇལ་འཕྲད་སྐབས་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་ཕྱི་ལོ་ ༢༠༠༧ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བྷར་སི་ལོ་ན་དང་ཀ་ཊ་ལོ་ནིའི་གྲོས་ཚོགས་སུ་ཆིབས་སྒྱུར་བསྐྱངས་པ་དང་། དེ་རྗེས་བོད་མིའི་སྒྲིག་འཛུགས་ཀྱི་དབུ་ཁྲིད་རིམ་པ་དེར་ཕེབས་པའི་གནས་ཚུལ་དྲན་གསོ་གནང་བ་དང་འབྲེལ། རྒྱ་ནག་གཞུང་གིས་བོད་ནང་མུ་མཐུད་དྲག་གནོན་དང་། ཆོས་དད་རང་དབང་རྡོག་རོལ་བཏང་བའི་རྐྱེན་གྱིས་ད་བར་བོད་མི་གྲངས་ ༡༥༧ གྱིས་རང་ལུས་མེར་སྲེག་བཏང་ཡོད་པའི་སྐོར་དང་། གཞན་ཡང་བོད་ནང་རྒྱ་ནག་གཞུང་གིས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་གསར་འཛུགས་ཀྱིས་བོད་ཀྱི་སྐད་ཡིག་རིག་གཞུང་དང་བཅས་པ་རྩ་མེད་གཏོང་རྩིས་བྱེད་ཀྱི་ཡོད་སྐོར་ཀྱང་ངོ་སྤྲོད་གནང་འདུག 

སྐུ་ཞབས་གྷོར་ཀ་ནོར་ལགས་ཀྱིས་ཞུས་དོན་ཁག་ལ་གསན་བཞེས་གནང་བ་མ་ཟད་ཕྱི་ལོ་ ༡༩༩༠ ཙམ་ལ་ཁོང་ཉིད་གྲོས་ཚོགས་འཐུས་མི་ཡིན་པའི་སྐབས་ཡུ་རོབ་རང་དབང་མཐུན་ཚོགས་(European Free Alliance Group) ཞེས་པ་གསར་འཛུགས་གནང་བའི་རིམ་པ་དང་། སྐབས་དེར་བོད་དོན་ཚོགས་པ་དང་འབྲེལ་བ་བྱུང་ཚུལ་དྲན་གསོ་གནང་འདུག 

སྐུ་ཚབ་རྣམ་པ་གཉིས་ཀྱི་མཇལ་མོལ་སྐབས་གནད་དོན་སྣ་ཚོགས་ཐད་བགྲོ་གླེང་གནང་ཡོད་པ་དང་། སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་སྐུ་ཞབས་གྷོར་ཀ་ནོར་ལགས་ཀྱིས་གུ་ཡངས་ཀྱིས་གསན་བཞེས་དང་མཉམ་ལས་གནང་རྒྱུའི་ཐུགས་འདོད་གནང་བར་ཐུགས་རྗེ་ཆེ་ཞུས་ཡོད་འདུག ། ཐེངས་འདིའི་མཇལ་འཕྲད་དེ་བཞིན་སྐུ་ཚབ་གཉིས་བར་གྱི་མཇལ་འཕྲད་ཐོག་མ་ཡིན་པ་རེད། རེས་གཟའ་ཟླ་བའི་ཉིན་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་ཁེ་ན་ཊའི་སྐུ་ཚབ་དང་ལྷན་དུ་མཇལ་འཕྲད་གནང་འདུག་པ་བཅས།།