༄༅། །ཕྱི་ལོ་ ༢༠༢༢ ཟླ་བ་ ༠༧ ཚེས་ ༡༦ ཉིན་ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་ལྡན་སྐྱིད་ལགས་ཀྱིས་བེལ་ཇམ་གནས་འཁོད་ཀརྨ་བསོད་ནམས་རྒྱ་མཚོ་ཆོས་ཚོགས་སུ་ས་གནས་བོད་མི་རྣམས་ལ་དང་བླངས་བོད་དོན་ཞུ་གཏུག་ལས་འགུལ་སྐོར་ངོ་སྤྲོད་གནང་ཡོད། 

དེ་ཡང་ཐོག་མར་བེལ་ཇམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ཀྱིས་ངོ་སྤྲོད་གསུང་བཤད་གནང་གྲུབ་མཚམས་འབྲུག་བསྟན་སྐྱིད་ལགས་ཀྱིས་འདུ་འཛོམས་ཐོག་དང་བླངས་བོད་དོན་ཞུ་གཏུག་ལས་འགུལ་གྱི་དམིགས་ཡུལ་དང་། ལས་དོན་བྱེད་ཕྱོགས། ཚོགས་ཞུགས་གནང་སྟངས་སོགས་ཀྱི་ཐད་ངོ་སྤྲོད་གནང་བའི་ཁར། དེ་འབྲེལ་དོགས་གཞི་ཁག་ལ་ལན་འདེབས་གསལ་བཤད་གནང་ཡོད།

དེ་ཡང་བཀའ་ཤག་སྐབས་བཅུ་དྲུག་པའི་ལས་གཞི་དང་བླངས་བོད་དོན་ཞུ་གཏུག་ལས་འགུལ་དེ་བཞིན་འཛམ་གླིང་གང་སར་གནས་པའི་གཞོན་སྐྱེས་གཙོ་གྱུར་བོད་མི་རྣམས་ཀྱིས་ས་གནས་སོ་སོའི་སྲིད་གཞུང་དང་། གྲོས་ཚོགས་འཐུས་མི་སོགས་ལ་བོད་ཀྱི་གནད་དོན་ཞུ་གཏུག་གིས་རྒྱལ་སྤྱིའི་སྟེང་སྔར་ཡོད་བོད་དོན་ཞུ་གཏུག་ལས་གཞི་ཚགས་ཚུད་གཏང་རྒྱུ་ཡིན་པ་རེད།

ཐེངས་འདིའི་ཚོགས་འདུ་དེ་ནི་བེལ་ཇམ་ཁུལ་དུ་དང་བླངས་བོད་དོན་ཞུ་གཏུག་ལས་འགུལ་དང་འབྲེལ་བའི་ཚོགས་འདུ་གཉིས་པ་ཡིན་ཞིང་། སྔ་ལོ་སུད་སིར་ལས་གཞི་དེ་ཉིད་ཐོག་མར་དབུ་འབྱེད་གནང་བའི་རྗེས་སོར་བེལ་ཇམ་གྱི་ཨན་ཝེབ་ས་གནས་སུ་གཞོན་སྐྱེས་ཁག་གཅིག་ལ་ལས་འགུལ་དེའི་ངོ་སྤྲོད་གནང་ཡོད་པ་བཅས།།